Румазухъе кагъат 1

1 бетӀер

Саламалъул рагӀаби

1Гьаб кагъат битӀулеб буго чапарлъун тӀаса вищарав ва Аллагьасдасан рещтӀараб Рохалил хабар лъазабизе тарав Павелица – ГӀиса МасихӀил лагъас.

2Гьеб буго аварагзабазухъе рещтӀарал ТӀухьдузда цебеккунго Аллагьас загьир гьабизе рагӀи кьун букӀараб Рохалил хабар. 3-4Инсан хӀисабалда Давудил наслуялъул васлъун кколев, Илагьияб РухӀалъул рахъалъ босани, кӀудияб къудраталъ хваралъуса вахъинавидал, Аллагьасул вас вукӀин загьирлъарав нилъер ТӀадегӀанав ГӀиса МасихӀил хӀакъалъулъ хабар буго гьеб. 5Гьесдалъун щвана дие баркат ва гьесие гӀоло киналго халкъазул гӀадамал божи-иманалдалъун Аллагьасе мутӀигӀлъейилан ахӀизе чапарлъи. 6ГӀиса МасихӀил умматлъун лъугьине ахӀаразда гьоркьор руго нужги.

7Нилъер Эмен – Аллагьасул ва ТӀадегӀанав ГӀиса МасихӀил баркатги саламги лъеги Рималда ругел киналго Аллагьасе рокьулел гӀадамазда, иман лъуразул агьлулъун лъугьине Аллагьас тӀаса рищаразда!

Павел чапарасе Рималде ине бокьун буго

8Бищунго цебе – тӀолабго дуниялалда нужер божи-иманалъул цӀар тӀибитӀун бугелъул, ГӀиса МасихӀги рехсон, дирго Аллагьасе рецц гьабула дица. 9-10Жиндир Васасул хӀакъалъулъ Рохалил хабар тӀибитӀизабун, ракӀ-ракӀалъго дица хъулухъ гьабулеб бугев Аллагьасда лъала: щибаб дир дугӀадулъ кидаго ва нахъаса къотӀичӀого рехсола нуж. Дица Аллагьасда гьарула, гьесие бокьани, гьанжегӀаги нужехъе вачӀине рес ккагиян.

11Дир гъира буго нуж рихьизе. Бокьун буго цо илагьияб хазина нужее бикьизе – нуж къвакӀун чӀезе, 12нижерги нужерги божи-иманалъ нилъер ракӀбатизабизе. 13Цогидал халкъазухъе араб мехалъ гӀадин, гьениб нужер гъотӀодасаги пихъ бетӀизе гӀоло, нужехъе вачӀине чанго нухалъ дица къасд гьабураблъиги нужеда лъачӀого хутӀизе бокьун гьечӀо, вацал, дие. Амма гьанжелъизегӀан дие квалквал ккана.

14Дун налъулавлъун ккун вуго адаб бугелги гьечӀелги халкъазул, лъай бугелги жагьилалги халкъазул. 15Гьединлъидалин нужеда, ай Рималда ругезда, гьоркьоб Рохалил хабар тӀибитӀизабизе дие цӀакъ бокьун бугеб.

Кагътил аслияб пикру

16Дун тӀубанго божула Рохалил хабаралда. Киналго иман лъуралал – цин жугьутӀал, цинги цогидал халкъал – хвасарлъизарулеб илагьияб къудрат буго гьеб. 17Гьелъ загьир гьабула, гӀицӀго божи-иманалъухъ балагьун гурони, инсан Аллагьас ритӀухъ гьавуларевлъи. ТӀухьдузда хъван бугелъул: «РитӀухъав инсан жиндирго божи-иманалдалъун чӀаго хутӀила».

Аллагьасда цере киналго гӀадамазул мунагьал

18Зобалаздасан Аллагьасул ццин рещтӀунеб буго жидер квешал ишаздалъун хӀакъабщинаб чӀинтӀизабулел гӀадамазул щибаб квешлъиялдеги пасалъиялдеги. 19Жив вукӀин гьес загьир гьабун, гьезухъе щун бугелъулха Аллагь лъаялъул гӀелму. 20Аллагь вихьунгутӀиялъул хӀикмат дуниял бижаралдаса нахъего якъинго загьирлъана, кинабго загьирлъана гьес бижанщиналдалъун. Гьеб хӀикмат ккола гьесул абадияб къудратги БетӀергьан вукӀинги. Гьединлъидал гьездаса гӀайиб кибе инеб? 21Аллагь вукӀин лъаниги, гьесие цӀар-рецц гьабичӀо гьез. Гьезул гьодорал пикраби гӀадада ана, гӀакълу гьечӀолъиялъ гьезул ракӀалги бецлъизаруна. 22Жал гӀакъилал ругилан чӀаниги, гӀабдалзаби ратана гьел. 23Хвел гьечӀев Аллагьасе гьабичӀого, гьез гӀибадат гьабуна холел-унел гӀадамазул, хӀанчӀазул, ункъхӀатӀилал хӀайваназул ва ракьалдасан шурулел жалазул суратазе. 24Гьеб сабаблъун Аллагьас гьел кьуна жидерго рекӀелъ рижарал хъубал къасдазул кверщаликье, – гьединлъидалин жидерго чурхдуздалъун гьез цоцазе хъублъи гьабулеб бугеб. 25Аллагьасул хӀакъаб рагӀи гьез гьерсихъ хисана. Кинабго жинца бижарасе гьабичӀого (Абадияб рецц гьесие, амин!), гьес бижаралъе гьабуна тӀагӀатги гӀибадатги. 26Гьеб сабаблъун Аллагьас гьел кьуна инжитал къасдазул кверщаликье. Гьезул гьениб руччабазгицин, чӀужугӀаданалъе тӀабигӀиябги хисун, хӀалтӀизабулеб буго тӀабигӀияб гуребаб. 27Гьединго бихьиналги, руччабазулгун бусен цолъиги рехун тун, жалго жидедего хӀасрат бергьун лъугьунел руго. Бихьинчияс бихьинчиясдехун хъублъи гьабун, гьез жидедаго тӀаде цӀалеб буго гьеб къосин сабаблъун жалго мустахӀикълъараб тамихӀ. 28Аллагь лъаялъул гӀелму гӀадахъ босизе бокьичӀелъул, гьес гьел кьуна пасалъиялъул кверщаликье, – гьабизего бегьулареб жо гьез гьабизе. 29Кина-щинабго пасалъиялъулги, квешлъиялъулги, хъантӀиялъулги, ццидалги цӀун руго гьел. ЖахӀда-хӀусудги, чӀвай-хъвейги, дагӀба-къецги, хӀилла-рекӀкӀги, инжитлъиги цӀикӀкӀун буго. 30Гьез мацӀ гьабула, нахъасан гаргадула, Аллагьги гьезда рихун вуго. Гьел чанкӀкӀунги руго, чӀухӀунги руго. Жалго жидецаго реццизе ва квешлъи ургъизе махщелги буго гьезул, эбел-инсухъги гьел гӀенеккуларо. 31Гьезда намус гьечӀо, рекӀелъ гурхӀел гьечӀо, рахӀмуги гьечӀо. 32Гьедин хьвадарав чи чӀвазе кколилан Аллагьасул амру букӀин лъаниги, жидецаго квешлъи гьабураб гӀечӀого, гьеб гьабулел цогидалги реццула гьез.

Currently Selected:

Румазухъе кагъат 1: АварАК

Highlight

Copy