ГӀакъилал рагӀаби 6
6
БЕТӀЕР 6
ХӀалихьатав-къадарав чи довегӀан те
1Я дир вас, мунго гӀадав чиясе гӀоло мун гъоркье чӀани,
чияр чиясе гӀоло къотӀи гьабун, къан кверги бачани,
2дур кӀалдисан бачӀараб рагӀуца мун къорикье ккезавула,
дуца кьураб рагӀуцаги къахӀан ккола мун.
3Мунго гӀадав чиясул кверзукье ккун вугелъул,
щиб гьабунги гьелдаса ворчӀизе гӀамал гьабе, дир вас.
Инеги ун, инжитаб хӀалалда гьесда цеве чӀун, гьарде.
4Беразда макьу хурхине биччаге,
макьие берзул тӀелхалги данде рачунге.
5Чанахъанасдаса борчӀизе
жайраналъ гьабулеб гӀадин,
хӀанчӀи кколев чиясул кверзукьа борчӀизе
хӀанчӀица гьабулеб гӀадин,
мунго хвасарлъизе гӀамал гьабе.
6Ле кӀвахӀалав чи, дуего гӀакълу щвезе, мун
цӀунцӀраялъухъе а,
гьеб хьвадулеб куцалъухъ валагье.
7Гьелъул я хӀаким гьечӀо,
я тӀад хъаравуллъун тарав чи гьечӀо, я хан гьечӀо.
8Амма риидал жиндиего нахърателги гьабула гьелъ,
хур лъилъулеб заманалда квинежоги бакӀарула.
9Ле кӀвахӀалав чи, кидалъагӀан мун кьижун вукӀинев?
Кида мун макьидаса вигьинев?
10Цодагьалъги кьижила, цодагьалъги бер данде бачина,
тӀатӀала квералги лъун цодагьалъги вегун чӀела мун.
11Гьебмехалъ, хъачагъ гӀадин, бачӀина духъе мискинлъи,
талавурчи гӀадин, бачӀина духъе ресукълъиги.
12РекӀкӀал рагӀабазул кӀалги цӀезабун хьвадула
хӀалихьатав-къадарав чи.
13Гьес бер къинкӀула, хӀатӀаз наку бачуна,
килщаца ишанал гьарула.
14Гьесул рекӀелъ хӀилла-рекӀкӀ буго;
кидаго квешлъиялъе ургъулев вукӀуна гьев
ва гӀадамазда гьоркьоб кьал ккезабула.
15Амма тохлъукьего паналъи рещтӀуна гьесда тӀаде,
цойидасанго гьалаглъи насиблъула гьесие –
гьесие кумек щвеларо.
16Гьале БетӀергьанасе бокьулареб анлъго жо
ва Гьев рекӀекълъулеб анкьабилебги:
17беразул чӀухӀараб балагьи, гьереси бицунеб мацӀ,
багьана-гӀайиб гьечӀеб би гӀодобе тӀолел кверал,
18квешаб къасд рещтӀараб ракӀ,
квешлъиялде гӀедерал хӀатӀал,
19гьерсал хъурулев гьересинугӀ
ва вацазда гьоркьоб кьал ккезабулев чиги.
20Я дир вас, инсул гьаб амру-насихӀат цӀуне,
эбелалъ малъарабги рехун тоге.
21Гьеб кинабго дуца абадиялъего рекӀелъ бухьун те,
гарбида жемун те.
22Мун кивениги унелъул, гьелъ нух бихьизабила дуда,
кьижизе вегараб мехалъги гьелъ цӀунила мун,
макьидаса вигьараб мехалъги гьелъ накъит гьабила дургун.
23Гьеб амруги – чирахъ буго, насихӀатги – нур буго,
малъа-хъваялдалъун кантӀизариги – гӀумруялъул нух буго.
24Квешай чӀужугӀадамалдасаги,
чияр лъадул бахьинаб кӀалалдасаги цӀунула мун гьез.
25Гьелъул берцинлъиялъ ракӀ асир гьабизе биччаге дуца,
гьелъ бер къинкӀунилан, гьелда хадувги унге.
26ХъахӀбаяй чӀужугӀадамалъ мун хинкӀ-чедалдаса махӀрум гьавула,
чияр лъадуцайин абуни, дуе хирияб гӀумру хвезабула!
27ЦӀа квенчӀелтӀа лъуни, гурде бухӀичӀого хутӀулищ?
28ЦӀа рекӀарал тӀорччол гӀеркъазда
тӀасан хьвадарасул хӀатӀал рухӀичӀого хутӀулищ?
29Чияр лъадуда аскӀове лъугьарав,
гьелда квер хъварав чиги тамихӀалдаса ворчӀуларо.
30Вакъун хутӀараб мехалъ
живго гӀорцӀизейилан жо бикъарав цӀогьор
гьедигӀанго хӀакъир гьавуларо.
31Амма цӀогьотӀа ккун хадуб,
анкьго нухалъ цӀикӀкӀун бецӀизе ккола гьес,
рокъоб бугебщинабцин кьезе ккола.
32ЧӀужугӀадамалъулгун зина гьабулев чи –
гӀакълу гьечӀев чи вуго.
Гьес жиндирго гӀумру хвезабула.
33Вухи-кьабиги рогьо-ничги насиблъула гьесие.
ХӀакъирлъиги киданиги тӀаса унаро гьесдаса.
34Росасул щакдари гӀасияб ццидал цӀураб букӀуна,
къисас босулеб къоялъ гьесда гурхӀел-рахӀмуги лъаларо.
35КигӀан гӀемераб гӀарац-месед кьуниги,
гьес гьеб къабул гьабуларо,
кигӀан гӀемерал сайигъатал дуца рачӀаниги,
дуда гьев гурхӀуларо.
Currently Selected:
ГӀакъилал рагӀаби 6: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
