ГӀакъилал рагӀаби 5
5
БЕТӀЕР 5
ХъахӀбаяй чӀужугӀадамалда аскӀове къаге
1Я дир вас, дир гӀакълу гӀадахъ босе,
дица бицунелда гъоркье гӀинги ккве.
2Гьелдалъун дуе гӀакъиллъи щвела,
дур кӀалзул каламалъулъ гӀелму-лъайги букӀина.
3Чияр лъадул кӀалдисан гьоцӀо бецӀцӀула,
нахалдаса хӀеренаб букӀуна гьелъ бицунеб хабарги.
4Амма гьей сабаблъун кколеб жо рикӀкӀгӀан кьогӀаб букӀуна,
кӀибалаб ханжаргӀан рекӀараб букӀуна.
5Гьелъул бохдуз хвалде рачуна,
жужахӀалде унел руго гьелъул хӀатӀалги.
6Жиндирго гӀумруялъул нухлул пикруцин гьабуларо гьелъ,
кӀичӀ-кӀичӀарал сухъмахъаздасан уней йиго гьей,
жиндагоцин лъачӀого.
7Гьанжеги дихъ гӀенекке, дир васал,
дир кӀалдисан рачӀарал рагӀабиги рехун тоге.
8Гьей чӀужугӀадамалдаса рикӀкӀад гьабе дурго нух,
гьелъул нуцӀил кӀалтӀеги къаге,
9дурго къуват чидае кьечӀого хутӀизе,
гурхӀел гьечӀесе дурго гӀумруялъул соналги кьечӀого хутӀизе;
10дур боцӀи-рикъзиялъ чияр чагӀи гӀорцӀизаричӀого хутӀизе,
дуда захӀмат бихьун гьабурабги чияр рокъобе инчӀого хутӀизе.
11Гурони – мун нахъа зигардизе вуго,
къуватги лъугӀараб черхги загӀиплъараб мехалъ.
12Ва дуца абила: «Малъа-хъвайги гӀакълуги
дида рихун рукӀарал куц,
кантӀизавулеб хабарги
дица сан гьабичӀеб куц!
13Дие малъа-хъвай гьабулезул калам гӀадахъ босичӀо дица,
гӀакълу-насихӀат кьолезда гъоркье гӀинги кквечӀо.
14КӀудияб балагьалде гъоркье ккезе вахъана дун
халкъалдаги жамагӀаталдаги цеве».
15Дурго иццдасан чвахулеб
ва дурго гъуялъусан бецӀцӀулеб лъим гьекъе.
16Дур иццул лъим къватӀаздасан чвахизе кколаро,
байдабаздасан иххал рахъун инеги кколаро гьеб.
17ГӀицӀго мун бетӀергьанаб букӀине ккола дур иццул лъим,
чияе гӀахьал гьабизе бегьуларо.
18-19Дур иццалда баркат лъеги,
гӀолохъанаб мехалдаго ячарай лъадуца вохизавеги.
Дуе хирияб ритӀучӀги гьей, гьайбатаб жайранги гьей!
Гьелъул берцинлъиялъ кидаго гӀорцӀизавеги мун,
гьелъул рокьуе мутӀигӀлъун хутӀаги мун даимго.
20Дуе щай, дир вас, чияр чӀужуялдехун женжедизе,
чияр лъади каранде къазе.
21БетӀергьанасул берда цебе буго инсанасул гӀумру,
инсанасул киналго нухалги лъала гьесда.
22Мунапикъ жиндирго квешал ишаз къахӀан кквела,
жиндирго мунагьаз гарацӀ бан вухьина гьев.
23Малъараб босичӀелъул, паналъила гьев,
жиндирго ахӀмакълъиялъ къосинеги гьавила.
Currently Selected:
ГӀакъилал рагӀаби 5: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
