ГӀакъилал рагӀаби 7
7
БЕТӀЕР 7
1Я дир вас, дир рагӀаби гӀадахъ росе
ва дир амруялги дуца рекӀелъ цӀуне.
2Дир амруял дуца рекӀелъ цӀунани, мун чӀаго хутӀила.
Дица малъарабги ясбер гӀадин цӀуне.
3Дурго килщазда ххун те гьел,
рекӀел тӀанчазда хъван те гьел.
4ГӀакъиллъиялда дуца абе, мун дир яц йигилан,
гӀакълуялдаги абе дир хириябилан,
5чияр лъадудаса, кӀал бахьинай чияр чӀужугӀадамалдаса
мунго цӀунизе.
Жагьилав гӀолохъанчиги хъахӀбаяй чӀужугӀаданги
6Щаяли бицинин: горда бигъараб гьиналда гьоркьосан
дун дирго рукъалъул гордухъа къватӀиве ваккана.
7Дида вихьана жагьилал гӀадамазда гьоркьов,
гӀолохъабазда гьоркьов цо гӀакълу гьечӀев гӀолохъанчи.
8Цо гӀадамалъул бакӀалде
къватӀ къотӀун унев вукӀана гьев.
9Бакъ тӀерхьана, маркӀачӀумех щвана,
сордо бачӀана.
10Гьале гьесда данде къватӀие ячӀуней йиго
хъахӀбабазул ретӀел ретӀарай, макруяб ракӀалъул чӀужугӀадан.
11АхӀи-хӀур гӀемерай ва кквезе квелъ-чангит гьечӀей гӀадан йиго гьей.
Рокъойги гьей къанагӀатги йикӀунаро.
12Цин къотӀное яхъун, цин годекӀание ячӀун,
щибаб бокӀнилъ гъоркьчӀел гьабун чӀола гьей.
13Гьале къан ккуна гьелъ гьев гӀолохъанчи,
гьесда къочаризе лъугьана,
гьурмада нич гьечӀого, абула гьелъ:
14«Дица жакъа къурбан хъвезабуна,
гьелъул гьанги буго рокъоб.
Гьедин дирго назру тӀубазабуна жакъа дица.
15Гьедин яхъана дун дуда данде, мун валагьизе.
Гьале ватана гурищ дида мун.
16Халичаби тӀамун,
Мисриялдаса рачӀарал чӀухӀарал шаршаваз
къачӀан буго дица дирго бусен.
17Мирраялъул, алоэялъул ва дарчиналъул махӀал
гьарун руго дица бусада.
18Жаниве вилълъа, сордо рогьинегӀан
нилъецаго рокьул лазат босизе,
рокьул рохалилъ нилъго лъедезе.
19Дир росги рокъов гьечӀо.
РикӀкӀадаб сапаралъ ана гьев.
20ГӀарцул цӀураб киса ана цадахъ босун,
моцӀ рещалъизегӀан вуссунаро гьев».
21Жиндирго кӀалдир ругьунал гьединал рагӀабаз
сагьвил гьавуна гьелъ гьев,
хӀеренаб каламалъ
кодове восана гьев.
22ГъобсагӀатго гьелда хадув ана гӀолохъанчи.
Ана, хъвезе бачун унеб оц гӀадин.
Ана, жиб кквезе рехараб кӀичӀида данде ритӀучӀ гӀадин.
23РечӀчӀун бачӀараб чӀоралъ тӀул борлъула гьеб ритӀучӀалъул.
Хвалил кӀичӀ букӀин лъачӀого,
жиндиего гьин гъураб бакӀалде
гӀедегӀараб хӀинчӀ гӀадин ана гьев.
24Гьанже, дир васал, нуж дихъ гӀенекке,
дир кӀалдисан рачӀунел рагӀабазухъ гӀин тӀаме.
25Нужер ракӀал гьелъул нухдехун цӀагегиха,
гьелъул нухаздасан хьвадуге нуж.
26Чанги чи хвезавидалха гьелъ,
гьелъ чӀваралги цӀакъго гӀемер ругелъулха!
27Гьелъул рокъосан буго жужахӀалде рачунеб нух,
гьеб нухалъ рачуна хваразул агьлу бугеб бакӀалде.
Currently Selected:
ГӀакъилал рагӀаби 7: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
