ГӀакъилал рагӀаби 29
29
БЕТӀЕР 29
1КигӀан гӀемер кантӀизавуниги,
тӀирун чӀун, габур кьуризабуларев чи тохлъукьего гьалаглъила,
гьесие кумек щвеларо.
2Муъминзаби тӀадегӀанлъараб мехалъ, халкъ бохула,
пасикъаз ханлъи гьабулеб мехалъ, халкъ зигардула.
3ГӀакъиллъи бокьулев васас эмен вохизавула,
хъахӀбабазул гьудулас инсул бечелъи пасат гьабула.
4РитӀухъаб диван къотӀулев парччахӀас
улка щулалъизабула,
халкъалда тӀад лъураб магъало цӀикӀкӀинабулес
улка чӀунтизабула.
5Мадугьаласе бадибе рецц гьабулев чи ккола
досул хӀатӀазда цебе гьин гъолев чи.
6Квешав чиясе жиндирго мунагьалъ къор гъола,
муъминчи ахӀулев-абулев вукӀуна.
7Муъминчияс хӀаракат бахъула
мискинчиясе ритӀухъаб диван къотӀизе,
пасикъав чиясе гьелъул ургъелцин кколаро.
8ЯхӀ-намус гьечӀез шагьаралда питна багъаризабула,
амма гӀакъилаз гӀадамазул ццин гӀодоцинабула.
9ГӀакъилас гӀабдал диваналде ахӀани,
гӀабдалас гьениб гъалмагъир гьабула,
яги гӀагӀадун велъанхъула, – гьезул рахӀат хвезабула.
10Бидухъ гӀашикъасе ритӀухъав чи рихуна,
муъминзаби чӀвазе хӀаракат бахъула.
11ГӀабдалас жиндирго кинабго ццин къватӀибе гьулчула,
гӀакъиласда кӀола жиндаго квелъ базе.
12ХӀакимас гьерсазухъ гӀинтӀамулеб бугони,
гьесул киналго хъулухъчагӀи квешлъула.
13Мискинчиги зулмучиги релълъарал руго,
гьел кӀиязулгоги беразе БетӀергьанаслъидалха канлъи кьолеб.
14ПарччахӀас мискинзабазе битӀараб диван къотӀулеб бугони,
гьесул парччахӀлъи киданиги биххун унаро.
15НасихӀаталъул хьопоца гӀакълу щвезабула,
тӀалаб гьабичӀого тараб лъимаца эбелалъе рогьо-нич гьабула.
16Пасикъал кӀодолъиялде рахараб мехалъ,
мунагьалги кӀодолъула,
амма муъминзабазда бихьила
гьел кӀалагъоркье речӀчӀараб заман.
17Дурго васасе гӀадлу гьабе, – гьес мун вохизавила
ва дур рекӀел хӀалхьезабила.
18Аллагьасул калам рехун тараб халкъ пасалъула,
гьардарав гурищха Къануналда рекъон хьвадулев чи.
19Малъунилан лагъасул гӀамал хисуларо, –
дуца абураб гьесда бичӀчӀаниги, гьес гӀадахъ босуларо.
20КӀалъазе гӀедегӀулев чи вихьанищ дуда?
Гьесиеялдаса лъикӀ букӀина гӀабдаласе.
21ГьитӀинаб мехалдасаго лагъ гогьдаризавуни, –
хадуб гьес балагь бачӀинабула.
22Ццидалав чияс питна багъаризабула,
ццин хехасулги мунагьал гӀемерлъула.
23ГӀамалкӀодолъиялъ инсан гӀодовегӀанлъизавула,
рекӀелъ хӀеренлъи-хӀалимлъи бугес хӀурмат-хъатир тӀаде цӀала.
24ЦӀогьорасулгун гьудуллъи гьабулев чи
живго жиндиего рихарав чи ккола.
Диванбегзабазда цебе гьа гьеданиги, гьес битӀараб бицунаро.
25Инсанасукьа хӀинкъиялъ къор гъола,
БетӀергьанасде тӀамун тарасе хӀинкъи букӀунаро.
26ГӀемерисезе бокьула дагӀба-рагӀиялъулъ
хӀакимзабаз жидер рахъ кквезе,
амма ритӀухъаб диван БетӀергьанасул хъатикь буго.
27Муъминзабазе квешал чагӀи рихуна,
пасикъазе иман бугелги рихуна.
Currently Selected:
ГӀакъилал рагӀаби 29: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
