ГӀакъилал рагӀаби 28
28
БЕТӀЕР 28
1Хадув лъугьунев чи гьечӀониги, пасикъав чи лъутун унев вуго,
муъминчиясе гъалбацӀалъегӀанги хӀинкъи гьечӀо.
2Улкаялда мунагь гӀемерлъани, хӀакимзабиги гӀемерлъула,
амма гӀакъилав-цӀодорав чияс гӀадлу-низам букӀинабула.
3Язихъазе зулму гьабулев мискинчи релълъуна
хуриб бугебщинаб чучазабулеб
ва хӀалухъен бижизе биччалареб чвахунцӀадалда.
4Къанун рехун толес пасикъав чи веццула,
Къануналда рекъон хьвадулев чи пасикъасда данде къеркьола.
5Квешал гӀадамазда лъаларо щиб битӀараб бугебали,
жидеца БетӀергьан валагьулезда кинабго бичӀчӀула.
6ВацӀцӀадго хьвадулев мискинчи лъикӀ,
мекъаб-тӀекъаб нухдасан хьвадулев бечедав чиясдаса.
7ЦӀодорав вас Къануналъ малъухъе хьвадула,
чехьквешазул гьудулас инсуе рогьо-нич гьабула.
8Налъуда кьуралдаги тӀаде гӀарац бахъулев рибачияс данде бакӀарула
ахирги мискинзабазда гурхӀулев чиясе щвезе бугеб бечелъи.
9Къануналъухъ гӀенеккиларилан гӀин добехун буссинабулев чиясул гьари-дугӀаги
БетӀергьанасда цебе сурукъаб-къабихӀаб жо буго.
10Муъминчи квешлъиялъул нухде вуссинавурав чи
жинцаго бухъараб гвандиниве ккола,
амма ракӀбацӀцӀадав чиясе лъикӀлъи насиблъула.
11Бечедав чиясда ккола жив гӀакъилавилан,
цӀодорав мискинчиясдани гьесда гьоркьосан канлъи бихьула.
12Муъминзабазе бергьенлъи щведал, кӀудияб рохел тӀаде рещтӀуна,
амма пасикъал тӀаде ккедал, гӀадамаз рахчизе бакӀ балагьула.
13Жиндирго мунагь бахчулесе талихӀ кьоларо,
мунагьазда мукӀурлъун, квешлъи тарасда баркат лъола.
14Гьардарав гурищ кидаго БетӀергьанасукьа хӀинкъун вугев чи,
жиндирго ракӀ бицалъизе биччарасде балагь бачӀуна.
15ГӀергӀедулеб гъалбацӀалдаги хъантӀараб циялдаги релълъуна
загӀипаб халкъалда тӀад тарав пасикъав хӀаким.
16ГӀакълу гьечӀев хӀаким кӀудияв зулмучи ккола,
хӀарамаб боцӀи-рикъзи рихарасул гӀумру халалъула.
17Чи чӀвай сабаблъун валагьулев вугев бидулав
хабал мицӀиралде щвезегӀан векерула,
лъихъениги кквезе щунгутӀизе.
18РакӀбацӀцӀадго хьвадарасе хӀинкъи букӀунаро,
мекъал-тӀекъал нухаздасан хьвадулев чи
ракӀалдаго гьечӀого гӀодов ккола.
19Хур бекьулев чи чадица гӀорцӀула,
гӀададисел анищазул хур бекьарасе тӀубанго мискинлъи щола.
20РитӀухъав чиясда баркат лъола, бечелъиги щола,
бечелъизе гӀедегӀаравги тамихӀ-жаза гьечӀого хутӀуларо.
21Гьурмахъ балагьун диван къотӀи лъикӀаб жо гуро,
чадил мочӀу сабаблъунги чи мунагь-хӀакъалда гъоркье ккола.
22Барахщарав чи бечелъиялъухъ хъантӀун вукӀуна,
ва гьесда лъаларо жинда тӀаде мискинлъи бачӀине букӀин.
23Бадибе рецц гьабун гаргадарасдаса ахирги цӀикӀкӀун рекӀее гӀола инсанасе,
жив кантӀизе гӀоло, какун кӀалъарав чи.
24Жиндирго эбел-эмен тала гьарулев ва гьелъул мунагь букӀунарин абулев чи ккола
гьалаглъи-пасалъи гьабулесул гьалмагъ.
25ХъантӀиялъ дагӀба-рагӀи ккезабула,
БетӀергьанасде тӀамун тарасда баркат лъола.
26Жиндаго ракӀалде ккараб гьабулев чи гӀабдал вуго,
гӀакълуялда рекъон хьвадарав хвасарлъула.
27Мискинасе кьолев чи гьечӀолъигун хутӀуларо,
кьезе бокьичӀого, берал къанщарасе щолеб нагӀана гӀемерлъула.
28Пасикъал тӀаде ккедал, гӀадамаз рахчизе бакӀ балагьула,
пасикъал паналъараб мехалъ, муъминзаби тӀадегӀанлъула.
Currently Selected:
ГӀакъилал рагӀаби 28: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
