ГӀакъилал рагӀаби 30
30
БЕТӀЕР 30
Агурил гӀакъилал рагӀаби
1Якъейил вас Агурил – Массаъ къавмалъул чиясул рагӀаби,
гьес Итиэлидехун, гьединго Итиэлидехунги Ухалидехунги гьабураб калам.
2ГӀадамазда гьоркьов бищунго жагьилав чи вуго дун,
гӀадамазулъ букӀунеб бичӀчӀи-лъайги гьечӀо дилъ.
3ГӀакъиллъиги дие щвечӀо,
ТӀадегӀанав дида лъаялъул гӀелмуги насиблъичӀо.
4Зодиве щив вахарав
ва нахъ вуссун щив рещтӀарав,
дангъураялъ гьури лъица данде бакӀарараб,
гурдел квенчӀелалъ буххун ралъад лъугӀизабизе лъида кӀвараб?
Дуниялалъул рагӀал лъица чӀезабураб?
Гьединав чиясда цӀар щиб,
гьесул васасда цӀар щиб?
Дуда лъалеб батилаха гьеб?
5Аллагьасул щибаб рагӀи бацӀцӀадаб буго.
РакӀчӀун жинде хьул лъуразе хъалхъанлъунги вуго Гьев.
6Аллагьасул рагӀабазде тӀаде дуца щибго жубаге,
Гьес мун къватӀив чӀвазавулевин
ва мун гьерсихъан вукӀинги загьирлъулебин.
7Я БетӀергьан, кӀиго жо гьарила дица Дуда,
дун хвезегӀан тӀубазабе Дуца гьеб:
8пайда гьечӀеб чӀандаги гьересиги дидаса рикӀкӀад гьабе;
я мискинлъи, я бечелъи кьоге дие.
БетӀербахъиялъе чара гьечӀеб хинкӀ-чед гурони кьоге Дуца дие.
9Дун гӀорцӀараб мехалъ, дица Дудаса инкар гьабунгутӀизе,
БетӀергьан щивали дида лъазего лъаларилан абунгутӀизе.
Мискинлъараб мехалъги, цӀогьодизе байбихьун,
дица дирго Аллагьасул цӀар хъублъизабунгутӀизеги.
10Лагъ какун, гьесул бетӀергьанасде мацӀ гьабуге, –
гьев лагъас дуе нагӀана кьела ва гьеб нагӀанаги дудего буссина.
11Вай, жидерго инсуе нагӀана кьолеб,
баркат лъегиян жидерго эбелалда абулареб наслу!
12Вай, жидедаго жалго рацӀцӀадалин кколеб,
амма жидер хъублъи-чороклъи чурун тӀаса унареб наслу!
13Гьезул беразулъ чӀухӀи-пахрулъи буго,
берзул балагьиялъулъ гӀамалкӀодолъиги буго.
14Ракьалда ругел мискинзабазул рикъзиги
гӀаламалда гьоркьор ругел язихъалщиназул хинкӀ-чедги кваназе
цаби хвалчабазда релълъараб
ва гӀусалги нусазда релълъараб наслу!
15Гуренжалъул кӀиго яс йиго,
кӀиялдаго цӀарги «кье», «кье» буго.
ГӀорцӀиго лъалареб лъабго жо буго,
гӀелилан киданиги абулареб ункъабилебги буго:
16жужахӀ, къинлъулареб чехь,
регьелалъ гӀорцӀулареб ракь
ва цӀул гӀелилан киданиги абулареб цӀаги.
17Инсуда тӀад велъанхъулесул
ва эбелги сан гьаюларесул берал
авлахъалъул гъудуца рахъула
ва гьесул гьанги чудкаца кванала!
18Лъабго жо буго дие балъгояб,
ункъабилебги буго – дида лъалареб:
19зодисан боржунеб цӀудул нухги,
тӀалтӀасан шурулеб борхьил нухги,
ралъдадасан лъедолеб гамил нухги
ва гӀолохъанай ясалъухъе унев бихьинчиясул нухги.
20ХъахӀбалъи гьабулей гӀадамалъул гӀамал кинаб букӀунеб?
Кванала, кӀал бацӀцӀуна
ва щибниги квешаб жо гьабичӀилан абула гьелъ.
21Лъабго жо буго жинда гъоркь ракь гьаргьадулеб,
ункъабилебги буго – гьелда баччизе кӀолареб:
22парччахӀлъун вахъарав лагъги,
гӀорцӀизегӀан кваназе хинкӀ-чед щварав гӀабдалги,
23гӀадамазе инжитлъун росасе арай чӀужугӀаданги
ва жиндирго бетӀергьаналъул бакӀ ккурай гъаравашги.
24Гьаб ракьалда бищунго гӀисинал,
амма цӀакъаб цӀодорлъи-гӀакъиллъи щварал рухӀчӀаголъаби ункъо руго:
25цӀунцӀраби – гьел руго загӀипал жал,
амма риидал жидеего кванил нахърател гьабула гьез;
26мугӀрузул гӀункӀкӀалги кутакаб агьлу гуро,
амма кьурабазда гьоркьоб жидеего картӀал рахъула гьез;
27ракъул гарцӀал – цебехъанлъи гьабизе хан гьечӀониги,
амма рагъде унезул гӀадаб кьер букӀуна гьезул;
28кьинчӀборхьалги дуда квералъ кквезе кӀола,
амма парччахӀзабазул кӀалгӀабазухъги рукӀуна гьел.
29Лъабго жо буго ракьалдасан чӀухӀун хьвадулеб,
ункъабилебги – рилълъин берцинаб:
30гъалбацӀ – киналго жанавараздаса къуватаб буго гьеб
ва сундасаниги нахъе къаларо,
31цинги хӀелекоги, рехъадул цебехъан – чанил дегӀенги
ва кӀудияб бодул цевехъан – парччахӀги.
32ГӀамалкӀодолъиялдалъун дур цо гӀантлъи ккани,
яги духъа хӀилла-рекӀкӀ ккани,
гъобсагӀатго дурго кӀалалда хъат чӀвай.
33Щар чӀвани – нах лъугьуна,
къалазулъ зар бани – би бачӀуна,
ццин гьалаглъани – дагӀба-рагӀи ккола.
Currently Selected:
ГӀакъилал рагӀаби 30: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
