ГӀакъилал рагӀаби 20
20
БЕТӀЕР 20
1Чагъир яхӀ-намус гьечӀеб жо буго, чӀагӀа гьалагаб жо буго.
Гьеб кӀиялъго къосинавурасулги гӀакълу биххула.
2ПарччахӀасул ццидахин гъалбацӀалъул гӀергӀедиялда релълъуна;
гьесул ццин бахъинабулев чиясги хвел тӀаде цӀала.
3ДагӀба-къецалдаса цӀунун чӀеялъ инсанасул къадру борхула,
амма цониги гӀабдаласда кӀоларо жиндирго квелъ къан вукӀине.
4КӀвахӀалас хур заманалда бекьуларо,
хур лъилъулъ гьев хӀалухъен балагьизе лъугьуна, амма батуларо.
5Инсанасул рекӀел ният-къасд – гъваридаб ралъад,
цӀодорав чиясда гьелъул тӀину батула.
6Жидеда божизе бегьулин ахӀдолел гӀадамал гӀемер рукӀуна,
амма божизе бегьулев ватизе лъихъаха бажарулеб?
7Муъминчи хӀалаллъиялда хьвадула,
гьардарал гурищ гьесдасан лъугьарал лъимал.
8Диван къотӀизе тахида тӀад гӀодов чӀарав парччахӀас,
бер речӀчӀизабун, кинабго квешлъи цӀалкӀица гӀадин цӀалкӀула.
9Лъидаха абизе кӀолеб дица дирго ракӀ бацӀцӀад цӀунанилан,
дун мунагьалдаса вацӀцӀад вугилан.
10БитӀун цӀаларел гирабиги къокълъизабураб натӀги
БетӀергьанасе рихарал руго.
11Лъимергицин лъала гӀамалалъухъ балагьун,
гьесул ишал рацӀцӀадал ва ритӀухъал рукӀиналъухъ балагьун.
12РагӀизе гӀинги бихьизе берги БетӀергьанас бижараб буго.
13Дуе макьу бокьуге – мунго мискинлъулевин,
берал ричӀун чӀезаре – хинкӀ-чед гьарзалъулебин.
14Бичун босулес абула квешаб бугилан, квешаб бугилан,
амма гьебги босун довегӀан араб мехалъ беццизе лъугьуна.
15Меседги буго, маргъал-якъутги гӀемер буго,
амма цӀодораб кӀал къанагӀатаб жо буго.
16Чияе гъоркье чӀарав чиясухъа ретӀелги бахъе,
гьес рахъ ккуразе гӀоло гьесухъа гъоркьлъелалъе жоги босе.
17ХӀарамго щвараб чедги чиясе гьуинлъула,
амма хадуб гьесул кӀал чабхил цӀола.
18ГӀакълу дандбани, мурадалде щвела;
гӀакълучагӀигун ургъун гурони рагъги гьабуге.
19МацӀихъанас божилъи хвезабула;
кӀалгӀемерилгун гӀахьаллъиги гьабуге.
20Эбел-инсуе нагӀана кьолесул чирахъ
бищунго бецӀаб бакӀалда свина.
21БачӀинахъего хехго щвараб боцӀи-рикъзиялда
ахиралда баркат лъоларо.
22«Дуца гьабураб квешлъи дица бецӀила», – ян абуге,
БетӀергьанасде тӀамун те, Гьес кумек гьабила дуе.
23БитӀун цӀаларел гираби БетӀергьанасе рихарал руго,
хӀилла-рекӀкӀ гьабурал цӀадирабиги рокьуларо Гьесие.
24БетӀергьанасул амру гьечӀого гали бахъуларо инсанас.
Кинха гьесда лъалеб жиндирго нухалъ гьев киве вачуневали.
25УргъичӀого цо жо БетӀергьанасе назруги гьабун,
цинги дица гьабураб щибилан абиялъ инсанасе къор гъола.
26ГӀакъилав парччахӀас квешал гӀадамал цӀалкӀица гӀадин цӀалкӀула,
цинги гьезда тӀад лал тӀамула.
27БетӀергьанас инсанасул рухӀ чирахъалъ гӀадин гвангъизабула,
гьесул рекӀел тӀиналда бугелъулги хӀалбихьула.
28ГурхӀел-рахӀмуялъ ва божилъиялъ цӀунула парччахӀ,
лъикӀлъиялъин гьесул тахги цӀунулеб.
29ГӀолохъабазе машгьурлъи жидерго къуват-жаналъ щвезабула,
хералги хъахӀаб расалъ берцинлъизарула.
30Вухи-кьабиялъ квешав чи лъикӀлъизавула,
ругънацаги гьесул черх бацӀцӀад гьабула.
Currently Selected:
ГӀакъилал рагӀаби 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
