ГӀакъилал рагӀаби 21
21
БЕТӀЕР 21
1ПарччахӀасул ракӀ БетӀергьанасул ихтияралда буго.
Бокьаралъуре лъарал чвахизарулел гӀадин,
Гьес парччахӀги жиндие бокьухъе хьвадизавула.
2Щивав чиясда ккола жиндир нух битӀараб бугилан,
амма БетӀергьанас борцуна гьесул рекӀелъ бугеб жо.
3Къурбан хъвеялдаса хирияб буго БетӀергьанасда цебе
ритӀухълъи цӀуниги вацӀцӀадго хьвадиги.
4Берзул чӀухӀиги рекӀел пахрулъиги –
гьеле пасикъазул чирахъ, мунагьги ккола гьеб.
5КӀвахӀ гьечӀесул пикрабаз-къасдаз пайда-хайиралде рачуна,
хехдариялъ мискинлъиялде рачуна.
6Гьересиялдалъун данде гьабураб хазина –
гьороца хъамун унеб хӀухьел.
Гьединаб хазинаялъ хвел тӀаде цӀала.
7Пасикъал гӀадамал зулму-хӀалалъ паналъизарула,
битӀараб нухдасан унарелъулха гьел.
8ГӀайиб бугесул нух кӀичӀ-кӀичӀараб букӀуна,
гӀайиб гьечӀесул ишал ритӀарал рукӀуна.
9ТӀохил рагӀалда гӀумру гьаби лъикӀ,
кӀалквешай лъадуда цадахъ цо рокъов чӀеялдаса.
10Пасикъасул рекӀелъ квешал къасдал рукӀуна,
мадугьаласдаги бихьиларо гьесдасан гурхӀел-рахӀму.
11ЯхӀ-намус гьечӀесе тамихӀ гьабулеб бихьани,
жагьилчиги цӀодорлъула.
ЦӀодорасул малъа-хъваялъухъ гӀенеккани, гӀелму-лъай щола.
12Пасикъасул рокъоб кколебщинаб бихьулев
ритӀухъав БетӀергьанас гьев паналъизавула.
13Мискинасул ахӀи рагӀичӀого букӀине гӀин бацулев чи
ахирги живго ахӀдезе ккола,
амма лъицаниги гьесие жаваб гьабуларо.
14Балъго кьураб сайигъаталъ ццин гӀодоцинабула,
лъороб лъун бачӀаралъ ццидал цӀа свинабула.
15БитӀараб диван къотӀиялъ муъминзаби рохизарула,
квешлъи гьабулесде хӀинкъи рещтӀинабула.
16ГӀакъиллъиялъул нухдаса тарарас
хӀухьбахъи гьабула хваразул агьлуялда гьоркьоб.
17Кеп-ихтилат хирияв чи язихълъиялде ккола,
чагъирги тӀагӀамаб квенги бокьулев чи бечелъуларо.
18Пасикъав чи муъминчиясе аманатлъун вукӀуна,
хиянатчиги ритӀухъасе аманатлъун вукӀуна.
19ГӀицӀаб авлахъалда гӀумру гьаби лъикӀ,
кӀалквешай ва ццидалай лъадуда аскӀов чӀеялдаса.
20ГӀакъиласул рокъоб гьарзаяб нахърател букӀуна,
гӀабдалас рокъоб бугебщинабги гьородахъ биччала.
21РитӀухъавлъун ва гурхӀулевлъун вукӀине
хӀаракат бахъулев чиясул бетӀербахъи лъикӀлъула,
къадру-къимат борхула.
22ГӀакъилас гьужум гьабун бахъула гучал тушбабазул шагьар,
дозда щулиябин кколеб хъалаги кӀалагъоркье чӀвазабула.
23Жиндирго кӀалги кӀалдиб мацӀги цӀунарав чияс
жиндирго рухӀги балагьаздаса цӀунула.
24ГӀамал кӀудияв ва нич гьечӀев инсанасдайин абулеб
яхӀ-намус гьечӀев чийилан,
хӀаталдаса араб чӀухӀи-пахрулъи букӀунелъулха гьесул рекӀелъ.
25Анищилан ккарабщиналъин кӀвахӀалав чи паналъизавулев,
квалквадиларилан чӀолелъулха гьесул кверал.
26Бер хъантӀарабщинаб щвелародайилан
анищазда вукӀуна гьев тӀубараб къоялъ,
муъминчи жиндиего щварабги
щибго барахщичӀого кьезе къачӀан вукӀуна.
27Пасикъазул къурбан – сурукъаб-къабихӀаб жо,
хасго гьеб къурбан рекӀелъ квешаб къасдгун хъолеб бугони.
28Гьересиго нугӀлъи гьабулев чи паналъула,
нугӀзабазухъ гӀенеккун, къадияс къотӀараб хӀукму нахъе хутӀула.
29Пасикъав чиясул гьурмада нич букӀунаро,
ритӀухъав чияс ургъун гурони гали тӀамуларо.
30БетӀергьанасдаса бергьунеб гӀакъиллъиги гьечӀо,
цӀодорлъиги гьечӀо, ният-къасдги гьечӀо.
31Рагъде рачине чуял къачӀала,
амма бергьенлъи БетӀергьанасдасан букӀуна.
Currently Selected:
ГӀакъилал рагӀаби 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
