ГӀакъилал рагӀаби 19
19
БЕТӀЕР 19
1ВацӀцӀадго хьвадулев мискинчи лъикӀ,
кӀалдиб мацӀги макирав
ва ботӀролъ гӀакълуги гьечӀев чиясдаса.
2ГӀелму-лъаялъе жанибе нух щвечӀеб бетӀерги лъикӀ гуро,
хӀетӀ хех гьабуравги хъущтӀичӀого, таричӀого хутӀуларо.
3Инсанасул гӀантлъиялъ гьесул иш мекъса ккезабула,
амма гьесул рекӀелъ БетӀергьанасде ццин бижула.
4Бечелъиялъ гьудулзаби гӀемер гьарула,
амма мискинчи цо вукӀарав гьудуласгицин рехун тола.
5ГьересинугӀ тамихӀалдаса ворчӀуларо,
гьерсал гӀемер рицунев чи хвасарлъуларо.
6ГӀемерисез гурхӀел гьарула къо-асс бугел гӀадамазда цере чӀун,
сайигъатал гьарзаясул гьудуллъун кинавго чи лъугьуна.
7Мискинчи гьесул вацазегицин рихуна,
гьудулги гьесдаса дагьавги цӀакъ рикӀкӀалъула.
Гьез кьун рукӀарал, амма киданиги
тӀуразе гьечӀел рагӀабазда хадув лъугьун хутӀула гьев.
8Живго вокьулес гӀакълу тӀалаб гьабила,
гӀакъилго-цӀодорго хьвадарасе битӀ ккела.
9Гьересиго нугӀлъи гьабурав чи тамихӀалдаса ворчӀуларо,
мекъаб-тӀекъаб рагӀи бицунев чиги паналъула.
10ГӀабдаласда гьарзалъи-бечелъи рекъоларо,
дагьабги цӀакъ рекъоларо
къо-асс бугезда тӀад лагъас ханлъи гьаби.
11Инсанасул гӀакълуялъ гьесулъ сабру цӀикӀкӀинабула,
гӀайиб-хатӀаялда тӀаса лъугьиналъ гьев машгьурлъизавула.
12ПарччахӀасул ццин бахъин релълъуна
гъалбацӀалъул гӀергӀедиялда,
гьесул лъикӀаб бербалагьиги релълъуна
харде ккараб щубалда.
13ГӀантав вас лъугьин – инсул талихӀ къосин,
лъадул дагӀба-рагӀи – нахъаса къотӀичӀого гӀекколеб тӀох.
14Мина-мулкги бечелъиги – умумузуздасан щолеб ирс,
амма цӀодорай лъади – БетӀергьанасдасан сайигъат.
15КӀвахӀаллъиялъ макьилъ къазарула,
гьавудизе бокьуларесул чехь бакъун хутӀула.
16БетӀергьанасул амруялда рекъон хьвадулес
жиндирго рухӀ цӀунула,
Гьесул нух къабул гьабичӀевги хола.
17Мискинасе кьураб садакъа ккола
БетӀергьанасухъе налъуе кьураб гӀарац,
гьабураб лъикӀлъи Гьес бецӀичӀого толаро.
18КӀудияв гӀелалде гьабе васасе гӀадлу, –
гӀадада хвезе гурин гьев.
19Ццин бахъунесе тамихӀ гьабизе ккола,
гьесда мун гурхӀани, – квеш ккезе гурин.
20Малъаралъухъ гӀенекке, насихӀатги гӀадахъ босе,
дудаго гӀакълу щвезе.
21Инсанасул рекӀелъе гӀемераб пикру-хиял рещтӀунеб,
амма БетӀергьанас хъвараб гурони лъугьунареб.
22ГурхӀел-рахӀмуялъ инсанасул ракӀ бохизабула,
гьерсал рициналдаса мискинлъиго лъикӀ.
23БетӀергьанасукьа хӀинкъулес гӀумру цӀунула,
гӀорцӀунги вукӀуна гьев, квешлъиги хъатӀуларо гьесда.
24КӀвахӀалас квер суркӀиде бегьула,
амма нахъбуссун кӀалалде гӀагар гьабуларо.
25ЯхӀ-намус гьечӀев чи вухе-кьабе –
жагьиласдаги гӀакълу щола,
гӀакълу бугесда малъе –
гьесие гӀелму-лъай щола.
26Инсул адаб гьабуларев
ва эбел къватӀие гъолев вас инжитлъула-къабихӀлъула.
27Малъа-хъваялъухъ гӀенеккичӀони,
гӀелму-лъаялдаса рикӀкӀалъила, дир вас, мун.
28ХӀилла-рекӀкӀ бугев нугӀ диван къотӀиялда тӀад велъанхъула,
квешав чиясул кӀал гьерсазул цӀун букӀуна.
29ЯхӀ-намус гьечӀесде тӀаде бачӀине къачӀан
тамихӀ-жаза букӀуна,
гӀабдалзабазул мугъзалъ кьабизе къачӀан тӀил букӀуна.
Currently Selected:
ГӀакъилал рагӀаби 19: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
