Тархал 6
6
Назорейлъиялъул хӀакъалъулъ къанун
1БЕТӀЕРГЬАНАС Мусада абуна:
2«ГӀизраилазда абе: „Бихьинчияс яги чӀужугӀаданалъ назорейлъи#6:2 Назорей – гьаб рагӀул магӀна ккола «БетӀергьанасе назру гьавурав», ялъуни «БетӀергьанасе ватӀа гьавурав». тӀаде босизе, ай жиндирго гӀумру БЕТӀЕРГЬАНАСЕ назру гьабизе ният гьабуни, 3биччанте гьез чагъиралдасаги цогидал мехтизарулел жалаздасаги инкар гьабизе ва чагъиралъул яги цогидаб мехтизарулеб жоялъул гьабураб къанцӀаги гьекъонгутӀизе. Гьезие бегьуларо цӀолбол лъим, жибго цӀибил яги кишмиш. 4Жиндирго назорейлъиялъул тӀолалго къояз цӀолбол гъабуялдаса щибниги кваназе бегьуларо гьединав чияс – пихъил хьон яги хъалгицин.
5Назорейлъи тӀаде босун бугебгӀан заманалъ гьев чиясул расалда нус хъвазе бегьуларо. БЕТӀЕРГЬАНАСЕ назру гьабураб заман лъугӀизегӀан гьев вацӀцӀадав вукӀуна; биччанте гьес ботӀрол рас халалъизе тезе. 6БЕТӀЕРГЬАНАСЕ гӀумру назру гьабун бугебгӀан заманалда гьесие гьукъараб буго жаназаялда аскӀове къазе. 7Гьесул эмен, эбел, вац яги яц хванигицин, гьел сабаблъун жиндир ботӀрол рас хъублъизабизе бегьуларо гьес, щайгурелъул гьеб буго гьесул гӀумру БЕТӀЕРГЬАНАСЕ назру гьабиялъул гӀаламат. 8ГӀумру назру гьабун бугебгӀан заманалъ, гьев БЕТӀЕРГЬАНАСУЛАВЛЪУН ккола.
9Нагагь гьев вугеб бакӀалда тохлъукьего щивниги хвани, ва гьелдалъун гьесул ботӀрол рас хъублъани, биччанте гьес анкьабилеб къоялъ бетӀер кӀкӀвазе, нахъеги живго вацӀцӀалъизе вукӀине. 10Микьабилеб къоялъ гьес кашишасухъе ДандчӀваялъул Чадиралъул кӀалтӀе бачӀине ккола кӀиго рохьил микки яги кӀиго миккидул тӀинчӀ. 11Кашишас цо хӀинчӀ къабул гьабила мунагь чурулеб къурбанлъун ва цогидаб – тӀубан бухӀулеб къурбанлъун, щайгурелъул гьев жаназаялда аскӀовги вукӀун хъублъун вугелъул. Гьебго къоялъ гьес цӀи гьабизе ккола назорейлъи тӀаде босиялъул ният. 12Биччанте гьес цӀидасан БЕТӀЕРГЬАНАСЕ гӀумру назру гьабизе ва гӀайиб бецӀулеб къурбаналъе лъагӀараб кьегӀер кьезе.
Гьезул назорейлъиялъул арал къоял рикӀкӀунаро, щайгурелъул назорейлъи хъублъун букӀиндал.
13Гьале назорейлъиялъул къанун. Гьесул назорейлъиялъул заман ахиралде щвараб мехалда, гьев вачине ккола ДандчӀваялъул Чадиралъул кӀалтӀе. 14Биччанте гьес БЕТӀЕРГЬАНАСЕ къурбаналъе бачӀине: тӀубанго бухӀулеб къурбаналъе – кинабгӀаги жагъаллъи гьечӀеб лъагӀараб бихьинаб кьегӀер, мунагь чурулеб къурбаналъе – жагъаллъи гьечӀеб лъагӀараб цӀуяб кьегӀер, ракълил къурбаналъе – жагъаллъи гьечӀеб куй. 15Гьезда цадахъ букӀине ккола ролъул хирияб садакъаги къурбан-бакӀалде тӀолеб чагъирги, гьединго зайтуналъул нахуда руцарал бищунго лъикӀаб ролъул ханждал гьарурал бугьурго чадазул цӀураб чӀепги, тӀад нах бахарал реччеб жубачӀел бакарабиги.
16Кашишас гьел хириял садакъаби БЕТӀЕРГЬАНАСДА цере росила ва мунагь чурулеб къурбанги тӀубан бухӀулеб къурбанги тӀобитӀила. 17Хадуб БЕТӀЕРГЬАНАСДА цебе ракълил къурбаналъе цо куй хъвела, гьелда цадахъ реччеб гьечӀел чадазул чӀепги букӀине ккола. Гьединго кашишас ролъул хирияб садакъаги къурбан-бакӀалде тӀолел жалазул садакъаги къурбан-бакӀалда тӀад бухӀила.
18ДандчӀваялъул кӀалтӀа къунцӀизе ккола назореяс жиндирго назорейлъиялъул рас. Цинги гьеб рас рехизе ккола ракълил къурбан бухӀулеб цӀадулъе.
19Назореяс жиндирго рас къунцӀун хадуб кашишас гьесухъе кодобе кьела куйдул белъараб бугьналагаги, нахуда буцараб реччеб гьечӀеб чедги, тӀад нах бахараб реччеб гьечӀеб бакариги. 20Кашишас гьел эхедеги рорхун хьвагӀезарила БЕТӀЕРГЬАНАСДА цере, хасаб хирияб садакъа хӀисабалда; гьел хирияллъун ккола ва гьелги, мегьедги, куйдул бохги кашишасе рукӀине ккола. Гьелдаса хадуб назореяс чагъир гьекъезе бегьула.
21Гьединал руго БЕТӀЕРГЬАНАСЕ гӀумру назру гьабурав назореясда тӀадал ишал; биччанте гьелде тӀадеги гьес садакъа гьабизе жиндирго буголъиялда рекъон. Гьес жиндирго ният тӀубазабизе ккола назорейлъиялъул къануналда рекъон“».
Кашишасул хасаб дугӀа
22БЕТӀЕРГЬАНАС Мусада абуна:
23«Гьарунидаги гьесул васаздаги абе: „ГӀизраилил халкъалъе дугӀа гьабе гьадинал рагӀабаздалъун:
24БЕТӀЕРГЬАНАС баракат бугеллъун гьареги нуж ва
квешабщиналдаса цӀунаги!
25БЕТӀЕРГЬАНАСУЛ Сипаталъул нур къалъаги нужеда тӀад,
ва Гьев гурхӀаги нужеда!
26БЕТӀЕРГЬАНАСЕ хиралъаги нуж
ва сах-саламатаб гӀумру кьеги нужее!“
27Гьедин, Дир цӀарги рехсон, гӀизраилазе дугӀа гьабила гьез, ва Дица лъикӀабщинаб кьела гьезие».
Currently Selected:
Тархал 6: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
