Тархал 5
5
РацӀцӀалъиялъул къанунал
1БЕТӀЕРГЬАНАС Мусада абуна:
2«ГӀизраилазда лъазабе, барас унти бугелги, чорхолъа лъамалъи-хъублъи бачӀунелги, жаназаялда хъван хъублъаралги чагӀи халкъалъ чӀел гьабураб бакӀалдаса нахъе ритӀеян. 3Гьединал чагӀи нужеда гьоркьоса нахъе ритӀе, бихьинал рукӀа, руччаби рукӀа, халкъалда гьоркьоб Дун загьирлъулеб бакӀ хъублъизабичӀого букӀине».
4ГӀизраилил халкъалъ гьедин гьабуна. Халкъ чӀараб бакӀ тун къватӀире ритӀана гьединал чагӀи; ГӀизраилаз гьедин гьабуна БЕТӀЕРГЬАНАС Мусаде гьабураб амруялда рекъон.
Зарал бецӀи
5БЕТӀЕРГЬАНАС Мусада абуна:
6«ГӀизраилазда абе: „Нагагь бихьинчияс яги чӀужугӀаданалъ цогидав чиясе зарал гьабуни, гьеб ккола БЕТӀЕРГЬАНАСДА данде гьабураб такъсир, гьединлъидал гьединал чагӀиги гӀайибияллъун рикӀкӀуна. 7Гьел ракӀрагьун мукӀурлъизе ккола жидеца мунагь гьабиялда ва жидецаго гьабураб зарал бецӀизе ккола: ккараб заралалъул щуйил бутӀа тӀадеги жубан, гьеб кьезе ккола жидеца квешлъи гьабурав чиясе. 8Нагагьлъун гьев чи хвани ва гьеб кьезе гьесул гӀагарав чиги ватичӀони, рецӀел ккола БЕТӀЕРГЬАНАСУЛ мулклъун ва, мунагьалдаса рацӀцӀалъизарулеб къурбаналъул куйгун цадахъ, гьеб кьезе ккола кашишасухъе. 9ГӀизраилаз кашишасухъе рачӀунел киналго хириял садакъаби гьесие рукӀине ккола. 10Хириял садакъаби щивав кашишас жиндиего тела; кашишасухъе кьураб жо гьесул букӀуна“».
Хилиплъарай лъадуе гьабизе кколеб имтихӀан
11БЕТӀЕРГЬАНАС Мусада абуна:
12«ГӀизраилазда кӀалъай ва гьезда абе: „Нагагь лъади росасе хилиплъани, 13росасдаса балъго гьей цогидав чигун бусада егани, амма росас гьей тӀад ккун гьечӀони ва, нугӀ гьечӀолъиялда бан, гьей тӀатинаюнги гьечӀони, 14амма зина гьабурай чӀужуялда рос щакдаризе байбихьани, ялъуни гӀайибго гьечӀей лъадуда гьев щакдаризе байбихьани, – 15биччанте росас лъади кашишасухъе ячине. Гьес кашишасухъе босизе ккола ефаялъул анцӀго бутӀа гьабун цо бутӀа#5:15 КӀиго литра. бугӀадул ханждал, амма ханждада тӀаде нахги тӀечӀого ва ладанги жубачӀого, щайгурелъул гьеб буго шакдариялъул ролъул садакъа – такъсир тӀатинабиялъул садакъа.
16Кашишас гьей БЕТӀЕРГЬАНАСДА цее ячина. 17Биччанте гьес щагӀил гӀортоялъубе дугӀадул лъим тӀезе ва, Чадиралъул чӀабаралдаса босун, гьенибе цодагьаб ракьги базе. 18БЕТӀЕРГЬАНАСДА цееги чӀезаюн, кашишас гьей чӀужугӀаданалъул рас гьурщизабила ва гьелъул кодоб лъела такъсир тӀатинабиялъул ролъул садакъа, ай шакдариялъул ханждал садакъа, ва жиндицаго кодоб кквела нагӀана кьеялъул кьогӀаб лъим. 19Цинги кашишас чӀужугӀадан гьедизе тӀамила гьадинги абун: ‘Дуда аскӀов чияр бихьинчи вегун ватичӀони, ва росасе хилиплъун зинаги гьабун мун хъублъун ятичӀони, гьаб нагӀана кьеялъул кьогӀаб лъеца дуе кинабгӀаги зарал гьабугеги! 20Ва амма, росасеги хилиплъун, дуца мунго хъублъизаюн ятани, рос гурев батӀияв чиясда аскӀой егунги ятани 21(гьеб бакӀалда кашишас нагӀанаги кьун, чӀужугӀадан гьедизе тӀамила ва абила), – БЕТӀЕРГЬАНАС нагӀана кьела дуе ва халкъалда суризайила; мун лъимал гьаруларейлъун лъугьина ва дур ургьимес гьорола#5:21 Ялъуни: «лъимер биххулеб унти кьела дуе».. 22Ва биччанте гьаб нагӀана кьеялъул кьогӀаб лъим дур ургьибе ине ва дур ургьимес гьодорлъун, мун лъимал гьаруларейлъун лъугьине’.
Цинги биччанте чӀужугӀаданалъ ‘Амин, амин’, – ан абизе.
23Биччанте кашишас гьел рагӀаби, кагътидаги хъван, кьогӀаб лъадалъ чуризе, 24чӀужугӀаданалъе гьеб нагӀана кьеялъул кьогӀаб лъим гьекъезе кьезе букӀине; гьеб кьогӀаб нагӀана кьеялъул лъим гьелъул ургьибе ина гьелъие гӀазабалъе. 25Цин кашишас гьелда кодоса босила щакдариялъул ролъул садакъа ва, БЕТӀЕРГЬАНАСДА цебеги хьвагӀезабун, къурбан-бакӀалде босила. 26Гьес ролъул садакъаялда тӀаса босун дангъура цӀураб жо, гьелъул хасаб бутӀа хӀисабалда, къурбан-бакӀалда тӀад бухӀила. Цинги чӀужугӀаданалда лъим гьекъезабила. 27Гьелъ росасеги хилиплъун жийго хъублъизаюн ятани, нагӀана кьеялъул кьогӀаб лъим гьелъул ургьибе ина гьелъие гӀазабалъе: гьелъул ургьимес гьорола, гьей лъимал гьаруларейлъун лъугьина ва халкъалда гьоркьой сурарайлъун йикӀина. 28Амма чӀужугӀаданалъ зина гьабун батичӀони ва гьей яцӀцӀадай йигони, гьелъие зарал ккеларо, гьелъие лъималги кьела.
29Гьединаб буго щакдариялъул къанун: нагагь росасеги хилиплъун, лъадуца жийго хъублъизаюн ятани, 30яги чӀужуялда рос щаклъулев вугони.
Биччанте кашишас гьей БЕТӀЕРГЬАНАСДА цее эхетизайизе ва кинабго гьабизе гьаб къануналда рекъон. 31Цинги рос рогьоялдаса вацӀцӀалъила, лъадуцаги жиндирго такъсиралъул хӀасил баччила“».
Currently Selected:
Тархал 5: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
