Тархал 2
2
Чадрал чӀваялъул тадбир
1БЕТӀЕРГЬАНАС Мусадаги Гьарунидаги абуна:
2«Биччанте гӀизраилаз чадрал чӀвазе ДандчӀваялъул Чадиралда сверухъ, гьелдаса дагьалъ рикӀкӀадегӀан, жиде-жидер къавмалъул ва инсул агьлуялъул байрахъги чӀван.
3Биччанте Ягьудал аскаралъул байрахъ чӀвазе бакъбаккул рахъалдехун, гьениб гьез чӀелги гьабизе. Ягьудал къавмалъул кӀудияв – ГӀаминадавил вас НахӀшон. 4НахӀшонил боялда – 74 600 бихьинчи.
5Биччанте гьесда хадусеб бакӀалда Иссахарил къавмалъ чӀел гьабизе. Иссахарил къавмалъул кӀудияв – Цуарил вас Нетаниэл. 6Гьесул боялда – 54 400 бихьинчи.
7Гьездаса добехун чӀел гьабила Зевулунил къавмалъ. Зевулунил къавмалъул кӀудияв – Хелонил вас Элиав. 8Гьесул боялда – 57 400 бихьинчи.
9Ягьудал аскаралда, щибаб бо рикӀкӀун, кинавниги – 186 400 бихьинчи. Бищунго цере сапаразде гьел рахъине руго.
10Биччанте къилбаялъул рахъалда Рувимил аскаралъул байрахъ чӀвазе ва гьезул бояз гьениб чӀелги гьабизе. Рувимил къавмалъул кӀудияв – Шедеурил вас Элицур. 11Гьесул боялда – 46 500 бихьинчи.
12Гьезда добехун чӀел гьабила Шимеонил къавмалъ. Шимеонил къавмалъул кӀудияв – Цуришадайил вас Шелумиэл. 13Гьесул боялда – 59 300 бихьинчи.
14Гьесдасаги добехун чадрал чӀвала Гадил къавмалъ. Гадил къавмалъул кӀудияв – Дегуэлил вас Элиясаф. 15Гьесул боялда – 45 650 бихьинчи.
16Рувимил аскаралда, щибаб бо рикӀкӀун, кинавниги – 151 450 чи. Сапаразде рахъунезда гъорлъ гьел рукӀине руго кӀиабилеллъун.
17ДандчӀваялъул Чадиргун цадахъ, левитал рукӀина цогидал къавмазда бакьулъ. ГӀизраилал сапаразде рахъине руго чӀел гьабураб бакӀалъул тартибги цӀунун, цоцада хадур, щивав чи жиндирго аскаргун ва жиндирго бакӀалда.
18Биччанте бакътӀерхьул рахъалда чадрал чӀвазе Ефраимил аскаралъ, жиндирго байрахъгун. Ефраимил къавмалъул кӀудияв – Аммигьудил вас ЭлишамагӀ. 19Гьесул боялда – 40 500 бихьинчи.
20Гьезда хадуб букӀина Манассил къавм. Манассил къавмалъул кӀудияв – Педацурил вас Гамлиэл. 21Гьесул боялда – 32 200 бихьинчи.
22Гьезда добехун букӀина Буняминил къавм. Буняминил къавмалъул кӀудияв – Гидеонил вас Авидан. 23Гьесул боялда – 35 400 бихьинчи.
24Ефраимил аскаралда, щибаб бо рикӀкӀун, кинавниги – 108 100 чи. Сапаразде рахъунезда гъорлъ гьел рукӀине руго лъабабилеллъун.
25Биччанте шималияб рахъалда чадир чӀвазе Данил аскаралъ, жиндирго байрахъалда гъоркь. Данил къавмалъул кӀудияв – Амишадайил вас Ахиезер. 26Гьесул боялда – 62 700 бихьинчи.
27Гьездаги хадур чадрал чӀвазе руго Ашерил къавмалъ. Ашерил къавмалъул кӀудияв – Охранил вас Пагиэл. 28Гьесул боялда – 41 500 бихьинчи.
29Гьездаса добехун къайи чӀвазе буго Нафталил къавмалъ. Нафталил къавмалъул кӀудияв – Енанил вас Ахир. 30Гьесул боялда – 53 400 бихьинчи.
31Данил аскаралда кинавниги – 157 600 бихьинчи. Гьел сапаралде рахъине руго бищун ахиралда, жидерго байрахъалгун».
32Гьале щивасул тухумги къавмги хӀисабалдеги босун, гӀизраилазул гьабураб сияхӀ. Киналго аскаралги гьезул боялги данде рачун, кинавниги гӀуна 603 550 бихьинчи.
33БЕТӀЕРГЬАНАС Мусаде гьабураб амруялда рекъон, гӀицӀго левитал рикӀкӀинчӀо цогидал гӀизраилазда цадахъ.
34ГӀизраилаз кинабго гьабуна БЕТӀЕРГЬАНАС Мусаде гьабураб амруялда рекъон. Бихьизабураб тартибалда чӀвалаан гьез чадрал жиде-жидер байрахъалгун, ва гьединабго тартибалда сапараздеги рахъунаан – щивав жиндирго къавмгун ва хъизан-агьлугун цадахъ.
Currently Selected:
Тархал 2: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023