Тархал 3
3
Гьарунил васал
1Гьале Синай магӀарда Мусагун БЕТӀЕРГЬАН кӀалъараб заманалда Гьарунилги Мусалги рукӀарал наслаби.
2Гьарунил васазул цӀарал: Надав (тӀоцеве гьавурав), Авигьу, Элеазар ва Итамар. 3Гьел рукӀана динияб хъулухъалъе ратӀа гьарурал ва, хирияб нахги бахун, кашишлъиялде тӀамурал Гьарунил васал. 4Амма Надавги Авигьуги хвана БЕТӀЕРГЬАНАСУЛ мукъадасаб бакӀалда, Синай салул авлахъалда рукӀаго, бегьулареб чияраб цӀаги босун БЕТӀЕРГЬАНАСДА цере рачӀараб мехалъ. Гьезул лъимал рукӀинчӀелъул, гьезул эмен Гьарунгун цадахъ гӀицӀго гьезул вацал Элеазарги Итамарги рукӀана кашишаллъун. 5БЕТӀЕРГЬАНАС Мусада абуна:
6«Левийил къавм баче Гьарунида цебе, гьесие кумекалъе букӀине. 7ДандчӀваялъул Чадиралда хъулухъалда рукӀине руго гьел, ва гьениб Гьаруниеги халкъалъеги хӀажатабщиналъул тӀалабги гьабизе буго гьез. 8Гьез жаваб кьезе ккола Чадиралъул тӀолабго къайи-цӀаялъул ва гӀизраилазул рахъалъ Мукъадасаб бакӀалда хъулухъги гьабизе ккола. 9Гьарунилги гьесул васазулги ихтияралде кье Левийилал; гӀизраилазул тӀолго къавмазда гьоркьоса гьел рищун руго Гьаруниеги гьесул васазеги кумекалъе рукӀине. 10Ва Гьарунги гьесул васалги кашишлъиялде тӀаме. Цоги батӀияв чи Чадиралда аскӀове вачӀани, гьев чӀвазе ккола».
11Жеги абуна БЕТӀЕРГЬАНАС Мусада:
12«Киналго къавмазда гьоркьоса Дица Левийилал рачана Диего, гӀизраилазул тӀоцере гьарурал васазул бакӀалда. Левийилал Дир ккола, 13щайгурелъул щибаб тӀоцебесеб вас-лъимер Дир кколелъул. Мисриялда Дица дозул киналго тӀоцересел лъимал хвезарураб мехалда, Дица гӀизраилазул тӀоцересел лъималги хӀайваназул тӀоцересел тӀанчӀиги Диего ратӀа гьаруна. Гьел Дир ккола. Дун вуго БЕТӀЕРГЬАН».
Левийилазул рикӀкӀен
14Синаялъул салул авлахъалда БЕТӀЕРГЬАНАС Мусада абуна:
15«Левийилал рикӀкӀе, гьезул щивасул инсул агьлуги тухум-кьибилги хӀисабалдеги босун. МоцӀалдаса тӀаде араб ригьалъул киналго бихьинал рикӀкӀе».
16БЕТӀЕРГЬАНАСУЛ амруялда рекъон, Мусаца гьел рикӀкӀана.
17Гьале Левийил васазул цӀарал:
Гершон, Кехат ва Мерари.
18Гьале, жидедаса кӀудиял тухумал лъугьарал, Гершонил васазул цӀарал:
Ливни ва ШимгӀи.
19Гьале, жидедаса кӀудиял тухумал лъугьарал, Кехатил васал:
Амрам, Ицхар, Хеврон ва ГӀузиэл.
20Гьале, гьединго жидедаса кӀудиял тухумал лъугьарал, Мерарил васазул цӀарал: МахӀли ва Муши.
Гьеле Левийил васал ва гьезул наслаби.
21Гершонидасан лъугьана Ливнилги ШимгӀилги тухумал: гьел руго гершонилазул тухумал. 22Гьезул вукӀана моцӀалдаса тӀаде араб ригьалъул анкьазаралда щунусго чи. 23Гершонилаз чӀел гьабизе кколаан Мукъадасаб Чадиралда нахъа, бакътӀерхьул рахъалда. 24Гершонилазул кьибилазул кӀудиявлъун вукӀана Лаэлил вас Элиясаф. 25Гьезул тӀалабалде кьуна: Мукъадасаб Чадирги, гьелда тӀад ралел пардавалги, Чадиралъул кӀалтӀа балеб пардавги, 26бакьулъ Чадирги къурбан-бакӀги лъураб азбаралда сверухъ ва гьелъул кӀалтӀа ралел пардавалги, кваралги ва гьеб киналдаго хурхарал хӀалтӀабиги.
27Кехатидасан лъугьана амрамилазулги, ицхарилазулги, хевронилазулги ва гӀузиэлилазулги кьибилал: гьел руго кехатилал. 28Гьезул вукӀана моцӀалдаса тӀаде араб ригьалъул микьазаралда анлънусго чи. Гьезда тӀадкъана Мукъадасаб бакӀ. 29Кехатил наслабаз чӀел гьабизе кколаан Мукъадасаб Чадиралъул къилбаялъулаб рахъалда. 30Гьезул кьибилазул кӀудиявлъун вукӀана ГӀузиэлил вас Элицафан. 31Гьезда тӀад къана КъотӀиялъул гъамасги, столги, нахучирахъги, меседил къурбан-бакӀги, мукъадасаб бакӀалъул цӀарагӀги, хасаб пардавги гьеб киналдаго хурхарал хӀалтӀабиги. 32Левийилазул кӀудиязулги кӀудиявлъун вукӀана Элеазар – кашиш Гьарунил вас. Гьев вукӀана Мукъадасаб бакӀалъул тӀалаб гьабулезул бетӀеравлъун.
33Мераридасан лъугьана МахӀлилги Мушилги кьибилал: гьел ккола Мерарил наслаби. 34Гьезул вукӀана моцӀалдаса тӀаде араб ригьалъул анлъазаралда кӀинусго бихьинчи. 35Мерарил наслабазул кӀудиявлъун вукӀана Цуриэл – Авихайилил вас. Гьез чӀел гьабизе кколаан Мукъадасаб Чадиралъул шималияб рахъалда. 36Мерарил наслабазда тӀадкъана Мукъадасаб Чадиралъул рамабиги, рахалги, хӀубалги, гъоркьчӀелалги ва гьезда хурхарал хӀалтӀабиги. 37Гьединго гьез жаваб кьезе кколаан азбаралда сверухъ ругел хӀубазулги, гьезул гъоркьчӀелазулги, Чадиралъул гъазихъазулги, кваразулги.
38Мусацаги, Гьаруницаги ва гьезул васазги чӀел гьабизе кколаан ДандчӀваялъул Чадиралъул бакъбаккул рахъалда, Чадиралда цебе. Гьез Мукъадасаб бакӀалда Аллагьасе тӀагӀат-гӀибадат гьабизе кколаан тӀолабго ГӀизраилил халкъалъул рахъалдасан. Гьениве гӀагарлъарав цониги батӀияв чи чӀвазе кколаан.
39БЕТӀЕРГЬАНАСУЛ амруялда рекъон, Мусацаги Гьаруницаги левитал рикӀкӀана, гьезул щивасул хъизан-агьлуги хӀисабалде босун: моцӀалдаса тӀаде араб ригьалъул кинавниги ватана къоло кӀиазарго бихьинав.
ГӀизраилазул тӀоцересел васал левитаздалъун хиси
40БЕТӀЕРГЬАНАС Мусада абуна:
«ГӀизраилазул тӀоцере гьарурал васал рикӀкӀе, моцӀалдаса тӀаде араб ригьалъул, ва гьезул цӀаразул сияхӀ гьабе. 41Дун вуго БЕТӀЕРГЬАН! ГӀизраилазул тӀоцере гьарурал васазул бакӀалда Дие левитал ратӀа гьаре ва гӀизраилазул гӀи-боцӀул тӀоцересел тӀанчӀазул бакӀалда левитазул тӀолабго боцӀиги батӀа гьабе».
42БЕТӀЕРГЬАНАСУЛ амруялда рекъон, Мусаца рикӀкӀана гӀизраилазул тӀоцере гьарурал васал. 43МоцӀалдаса тӀаде араб ригьалъул цӀар-цӀарккун рехсаразул кинавниги ватана 22 273 чи.
44БЕТӀЕРГЬАНАС Мусада абуна:
45«ГӀизраилазул тӀоцере гьарурал лъималазул бакӀалда левитал раче ва гьезул боцӀул бакӀалда левитазул тӀолго боцӀиги баче. Левийилал Дир ккола. Дун вуго БЕТӀЕРГЬАН. 46ГӀизраилазул тӀоцере гьаруразул, левитазул къадаралда данде ккун, 273 чи цӀикӀкӀун вугелъул, 47гьел тӀокӀлъарал васазухъа хӀакъ бакӀаре – щивасухъа щу-щу Чадиралда хӀалтӀизабулеб шекел (къо-къо гералъул цӀайи бугеб)#3:47 ГӀага-шагарго 55 грамм. гӀарцул. 48Гьеб хӀакъ, ай гьезухъа босараб гӀарац кье Гьарунихъеги гьесул васазухъеги».
49Мусаца бакӀарана левитаздалъун хисизе рес щвечӀел тӀоцере гьарурал гӀизраилазухъа 501365 шекел гӀарцул#3:50 1365 шекел – гӀага-шагарго 15 кило.. 51БЕТӀЕРГЬАНАСУЛ амруялда рекъон, Мусаца гьеб гӀарац Гьарунихъеги гьесул васазухъеги кьуна.
Currently Selected:
Тархал 3: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
