Тархал 1
1
ГӀизраилазул рикӀкӀен гьаби
1Мисриялдаса гӀизраилал къватӀире рахъун кӀиабилеб соналъул кӀиабилеб моцӀалъул тӀоцебесеб къоялъ#1:1 Их бакьулъ. БЕТӀЕРГЬАН кӀалъана Мусада Синаялъул салул авлахъалда букӀараб Мукъадасаб Чадиралда жанисан. Гьес абуна:
2«ГӀизраилил халкъ рикӀкӀе щибаб къавмккун ва тухумккун, сияхӀ гьабун, щивав бихьинчиясул цӀарги хъван; 3рагъуе ярагьунел къого соналдаса тӀаде араб ригьалъул гӀизраилал рикӀкӀе ва гьезул къокъаби гьарун, цӀарал хъвай. 4Щибаб къавмалъул кӀудиязда гьоркьоса цо-цо чи нужее хӀалае вукӀине те. 5Гьале нужее кумек гьабизе ругел чагӀазул цӀарал:
Рувимил къавмалдаса – Шедеурил вас Элицур;
6Шимеонил къавмалдаса – Цуришадайил вас Шелумиэл;
7Ягьудал къавмалдаса – ГӀаминадавил вас НахӀшон;
8Иссахарил къавмалдаса – Цуарил вас Нетаниэл;
9Зевулунил къавмалдаса – Хелонил вас Элиав;
10Юсупил къавмалдаса:
Ефраимил къавмалдаса – Аммигьудил вас ЭлишамагӀ;
Манассил къавмалдаса – Педацурил вас Гамлиэл;
11Буняминил къавмалдаса – Гидеонил вас Авидан;
12Данил къавмалдаса – Амишадайил вас Ахиезер;
13Ашерил къавмалдаса – Охранил вас Пагиэл;
14Гадил къавмалдаса – Дегуэлил вас Элиясаф;
15Нафталил къавмалдаса – Енанил вас Ахир».
16Гьал ккола гӀизраилазул халкъалъул къавмазул тӀаса рищарал кӀудиял, ГӀизраилалъул бутӀрул.
17Мусацаги Гьаруницаги цӀар-цӀарккун рехсарал гьел чагӀигун цадахъ, 18халкъалъул данделъи ахӀана кӀиабилеб моцӀалъул тӀоцебесеб къоялъ. ГӀизраилазул щивасул тухум-кьибилги инсул агьлуги рехсон, къогоялдаса цӀикӀкӀун сон барал киналго бихьинал рикӀкӀана, 19БЕТӀЕРГЬАНАС Мусаде гьабураб амруялда рекъон. Гьедин рикӀкӀен гьабуна ГӀизраилил халкъалъул, Синаялъул салул авлахъалда гьел рукӀаго.
20ГӀизраилил тӀоцевесев вас Рувимил къавмалдаса къого соналдаса арал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 21Рувимил къавмалъул кинавниги вукӀана 46 500 чи.
22Шимеонил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 23Шимеонил къавмалъул кинавниги вукӀана 59 300 чи.
24Гадил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 25Гадил къавмалъул кинавниги вукӀана 45 650 чи.
26Ягьудал къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 27Ягьудал къавмалъул кинавниги вукӀана 74 600 чи.
28Иссахарил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 29Иссахарил къавмалъул кинавниги вукӀана 54 400 чи.
30Зевулунил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 31Зевулунил къавмалъул кинавниги вукӀана 57 400 чи.
32-35Юсупил васазул, ай Ефраимил ва Манассил къавмаздаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул хъизанги инсул агьлуги хӀисабалдеги босун.
Ефраимил къавмалъул кинавниги вукӀана 40 500 чи;
Манассил къавмалъул кинавниги вукӀана 32 200 чи.
36Буняминил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 37Буняминил къавмалъул кинавниги вукӀана 35 400 чи.
38Данил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 39Данил къавмалъул кинавниги вукӀана 62 700 чи.
40Ашерил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 41Ашерил къавмалъул кинавниги вукӀана 41 500 чи.
42Нафталил къавмалдаса къогоялдаса цӀикӀкӀун сон барал ва рагъуе ярагьунел киналго бихьинал рехсана иргадал цӀар-цӀарккун, щивасул тухум-кьибилги инсул агьлуги хӀисабалдеги босун. 43Нафталил къавмалъул кинавниги вукӀана 53 400 чи.
44Гьел руго Мусацаги, Гьаруницаги, ГӀизраилалъул анцӀила кӀиябго къавмалъул щибалдаса цо-цо тӀаса рищарал кӀудиязги рикӀкӀарал бихьинал. 45Къого соналдаса арал ва рагъуе ярагьунел тӀолго гӀизраилал рикӀкӀана, гьезул щивасул тухум-кьибилги инсул агьлуги хӀисабалдеги босун. 46Гьезул кинавниги ватана 603 550 чи.
47Амма гьезда цадахъ рикӀкӀинчӀо Левийил къавмалъул наслаби. 48БЕТӀЕРГЬАНАС Мусада абуна:
49«Левийил къавм рикӀкӀунге ва цогидал гӀизраилазул сияхӀалда гъорлъ гьезул цӀарал хъваге. 50Мукъадасаб Чадирги, гьелъул кинабго къайиги, кинабго гьелда хурхараб жоги Левийилазда тӀадкъай: биччанте гьез Чадир баччизе ва гьелъулги гьелъул къайи-цӀаялъулги тӀалабги гьабизе. ГӀумру гьабулеб бакӀги гьез Чадиралда сверухъ гӀуцӀизе ккола. 51Нухда рахъунелъул, Мукъадасаб Чадир биххизе ва тӀатӀала лъезе буго левитаз ва, чӀел гьабураб бакӀалда, гьезго эхетизеги бакӀаризеги буго. Гьел гурел батӀияв чи Чадиралда аскӀове гӀагарлъани, гьев чи чӀвазе ккола. 52Биччанте хутӀарал гӀизраилазул къавмаз жидерго чадрал чӀвазе щибаб къавмалъе бихьизабураб бакӀалда, щибаб аскаралъ гьениб жиндирго байрахъги чӀвазе биччанте. 53Амма левитазул чадрал рукӀине ккола КъотӀиялъул Чадиралда сверухъ, ГӀизраилалъул халкъ Аллагьасул ццидакьа цӀунун букӀине: левийилал рукӀине руго КъотӀиялъул Чадиралъул хъаравулзабилъун».
54ГӀизраилаз кинабго тӀубазабуна БЕТӀЕРГЬАНАС Мусаде гьабураб амруялда рекъон.
Currently Selected:
Тархал 1: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
