Тархал ЦеберагӀи
ЦеберагӀи
Гьаб тӀехьалда бицунеб буго Синай магӀарда БетӀергьанасдаги ГӀизраилил халкъалдаги гьоркьоб КъотӀи гьабун хадусеб (бал. Тархъ. 19) лъебералда ичӀго соналда жанир ккарал лъугьа-бахъиназул хӀакъалъулъ.
Мисриялда лагълъиялда рукӀарал гӀизраилал БетӀергьанас эркен гьаруна, салул авлахъалда гьезие квен чӀезабуна, гьезие мукъадасал ва баракатал къануналги эркенго Аллагьасе тӀагӀат-гӀибадат гьабизе ресги кьуна. Амма, гьедин букӀаниги, гьел тӀа-тӀаруссунги Гьесда данде чӀолел рукӀана (11:1-6; 20:2-5; 21:4-5; 25:1-2). Гьединлъидал БетӀергьанас хӀукму гьабуна гьезие жаза гьабизе, ва, Жиндие мукӀурлъичӀеб кӀудияб гӀелалъул чагӀи хун рахъинегӀан, руссунеб бакӀ гьечӀеб салул авлахъ сверизе тӀамуна гьел (14:27-35). Халкъалъул кӀиго нухалъ гьабураб сияхӀалдасан бихьулеб буго Мисриялдаса къватӀибе бахъараб цебесеб гӀел цӀияб гӀелалъ хисараблъи (1–4; 26).
ТӀехьалъул байбихьуда бицунеб буго рагъул къуват бугеб гучаб халкълъун ГӀизраил лъугьиналъул хӀакъалъулъ (2; 10).
ГӀизраилаз Синай мегӀер толеб буго жал асирлъудаса лъутун унел чагӀаз гӀадин гуреб, жидер бетӀерлъуда Аллагьги вугеб ва цогидал халкъазеги БетӀергьанасул нухмалъилъун бугеб къуватаб аскар хӀисабалда (10:35). Амма нухда квешаб хабар рагӀидал хӀинкъун, гьел Ханааналъул гӀорхъода лъалхъула ва гьеб ракьалде лъугьине гьез инкар гьабула (13:27–14:4).
Жиндие мукӀурлъулареб халкъалда БетӀергьанасул ццин бахъин – гьеб буго тӀехьалъул аслиял суалазул цояб. ТӀолго халкъ гуребги (масала, 11:1-3; 21:4-9), Гьесул ццидакье ккола живго Мусаги, гьесул вац Гьарунги (20:2-13), яц Марямги (12).
Жиндие халкъ хилиплъаниги, БетӀергьанас ритӀухълъи цӀунана Жиндирго КъотӀиялъе (14:11-20). Гьес инкар гьабичӀо хирияб ракьалде гӀизраилал щвезаризе гьабураб хӀукмуялдаса ва гьеб тӀубазаби мурадалда цӀияб гӀел гӀезабуна (26:63-65).
Хиси гьечӀел Гьесул мурадал рагӀула ракӀалдаго гьечӀев чиясул кӀалдисан: ГӀизраилил халкъалъе нагӀана кьезе МогӀавица мухьги кьун ккун вукӀарав, амма гьелъул бакӀалда гьезие гӀицӀго баракат гурони гьаризе бажаричӀев мажусияв БилгӀамидасан (22–24). Гьесдалъун БетӀергьанас ГӀизраилил халкъалда бихьизабуна Жив даимго гьелгун вукӀин, Жинца гьезие кумек гьабулеб букӀин, гьединго гӀемераб заман гьоркьоб ун хадуб, гьезухъе ТӀадегӀанав ПарччахӀ вачӀине вукӀин (24:17-19).
ТӀехьалъул ахиралда бицунеб буго Иорданалъул бакъбаккул рахъалдехун ругел ракьазда гӀизраилаз кверщел гьабиялъул ва Ханааналде лъугьине цӀияб гӀел хӀадур букӀиналъул хӀакъалъулъ (21:1-3, 21-35; 33:50-56).
ТӀехьалда буго
Жидее кьезе бугилан Аллагь гьедараб ракьалде лъугьине ГӀизраилазул тӀоцебесеб гӀелалъул хӀадурлъи (1:1–10:36)
Халкъалъул тӀоцебесеб сияхӀ гьаби ва левитазда гьоркьор диниял хъулухъал рикьи (1:1–4:49)
Халкъги, Мукъадасаб Чадирги, левиталги рацӀцӀад гьари (5:1–9:23)
Халкъ сапаралде бахъин (10:1-36)
Жидее кьезеян Аллагь гьедараб ракьалде унеб халкъалъул сапар (11:1–25:18)
Халкъалъул дандечӀей; батӀи-батӀиял къанунал (11:1–15:41)
КъорахӀил дандечӀей ва Гьарунил ихтиярал тасдикъ гьари; левитазда тӀадал ишал (16:1–19:22)
Мусалги Гьарунилги гъалатӀ (20:1-29)
ТӀоцересел бергьенлъаби; Балак ва БилгӀам; МогӀавиязул аллагьасе гӀизраилаз сужда гьаби (21:1–25:18)
КӀиабилеб гӀел жидее кьезеян Аллагь гьедараб ракьалде лъугьине хӀадурлъи (26:1–36:13)
Халкъалъул кӀиабилеб сияхӀ; БетӀергьанасул батӀи-батӀиял амраби (26:1–30:16)
Мидяниязе тамихӀ гьаби ва Иорданалъул бакъбаккул рахъалда ругел ракьал рикьи (31:1–32:42)
ГӀизраилазе кьолеб бугеб ракьалъул хӀакъалъулъ жегиги амраби (33:1–36:13)
Currently Selected:
Тархал ЦеберагӀи: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023