Левит 19
19
РацӀцӀалъиялда хурхарал къанунал: диниял ва адабиял
1БЕТӀЕРГЬАНАС Мусада абуна:
2«ГӀизраилил тӀолабго халкъалда лъазабе: „Нуж рацӀцӀадго хьваде, щайгурелъул Дун вуго вацӀцӀадав БЕТӀЕРГЬАН, нужер Аллагь.
3Эбелалъулги инсулги адаб-хъатир гьабе ва Дир шаматазул шурутӀал тӀуразаре. Дун вуго нужер БЕТӀЕРГЬАН.
4Пайда гьечӀел гьересиаллагьзабазде руссунге, биун тӀун маххгун аллагьзабазул сипатал гьаруге. Дун вуго нужер БЕТӀЕРГЬАН.
5БЕТӀЕРГЬАНАСЕ ракълил къурбанал хъолеб мехалъ, Гьев разилъулеб хӀалалъ гьабе кинабго. 6Гьезул гьан кванай гьебго къоялъги нахъисеб къоялъги; лъабабилеб къоялъ нахъе хутӀараб гьан бухӀизе ккола. 7Амма лъабабилеб къоялъги нуж гьеб гьан кваназе лъугьани, нужер къурбан Аллагьас нахъчӀвала, махӀ кӀутӀараб гьан нужеца кванаралъухъ. 8Гьединаб иш гьабурав чиясе хӀакъ букӀуна, щайгурелъул БЕТӀЕРГЬАНАС хирияблъун гьабураб жо гьес хъублъизабун букӀун. Гьев чи тӀагӀинавизе ккола, гьесул цӀарги халкъалда гьоркьоса нахъе хъвагӀазе ккола.
9Хурир лъилъарулеб мехалъ, хӀалухъен рагӀа-ракьанде щун бакӀаруге, ва гӀодоре рортарал тӀоралги рищуге. 10Гьединго цӀолбол ахикьа нахъе жо течӀого пихъ бакӀаруге, гӀодобе бортараб гьенибго те. Мискинзабазеги чияр ракьаздаса рачӀаразеги букӀине те гьеб. Дун вуго нужер БЕТӀЕРГЬАН.
11ЦӀогь гьабуге.
Гьереси бицунге.
Цоцае хӀилла-макру гьабуге.
12Дир цӀарги рехсон гьересияб гьа баге – Аллагьасул цӀар суризабуге. Дун вуго БЕТӀЕРГЬАН.
13Цогидасухъа щибго бахъуге ва цӀогь гьабуге.
ХӀалтӀухъанасе кколеб харж къасиго кье, рогьинегӀан тоге.
14ГӀинкъасе нагӀана кьоге, беццасда цебе хӀетӀе лъоге. Дурго Аллагьасукьа хӀинкъа. Дун вуго БЕТӀЕРГЬАН.
15Диванханаялда ритӀухъаб хӀукму къотӀе. Бечедав вугин ялъуни мискинав вугин абун, гьесул гьурмахъ балагьуге, диван ритӀухъго къотӀе.
16ГӀадамазда гьоркьор мацӀал гьаруге.
Цогидав чиясул гӀумруялъе хӀинкъи кколеб жо гьабуге. Дун вуго БЕТӀЕРГЬАН.
17Лъидехун букӀаниги рекӀелъ ццин хьихьуге. Дур халкъцояс мекъаб иш гьабуни, гьесда бадибе абе, гьесул гӀайиб дуеги гӀахьаллъичӀого букӀине.
18Дурго халкъцоясдаса рецӀел босуге ва гьесде ццидахун вукӀунге. Дурго рухӀгӀан вокьа дуе дуда аскӀов вугев цогидав чиги. Дун вуго БЕТӀЕРГЬАН.
19Дир къанунал тӀуразаре.
БатӀи-батӀияб тайпаялъул хӀайванал данде рачунге.
КӀиго батӀияб хьон цо хуриб бекьуге.
БатӀи-батӀияб тайпаялъул ххамазул гьабураб ретӀел ретӀунге.
20Чияе кьезе къотӀи гьабурай лагъалда аскӀов пуланав чи вегани, амма гьелъухъ жеги мухь кьун букӀун гьечӀони ва гьей эркен гьаюнги йикӀун ятичӀони, гьесие тамихӀ гьабизе ккола. Амма гьел кӀиялго чӀвазе бегьуларо, щайгурелъул гьей жеги эркенлъун йикӀинчӀелъул. 21Биччанте гӀайибияв бихьинчияс гӀайиб бецӀулеб къурбаналъе хъвезе куй бачун бачӀине БЕТӀЕРГЬАНАСДА цебе ДандчӀваялъул Чадиралъул кӀалтӀе. 22Кашишас БЕТӀЕРГЬАНАСДА цебе, гьев хвасарлъиялъе гӀоло гӀайиб бецӀулеб къурбан тӀобитӀила, ва Аллагь гьесул мунагьалда тӀаса лъугьина.
23Нужерго ракьалде щведал, нужеца гьенир пихъил гъутӀби чӀела. Амма тӀоцебесеб лъабго соналъ нужеца гьел гъутӀбуздаса пихъ кванаге. 24Ункъабилеб соналъ гьел гъутӀбузда бижараб пихъ хирияблъун, ай БЕТӀЕРГЬАНАСЕ кьолеб рецц-бакъалъул садакъалъун ккола. 25Щуабилеб соналъ нужеца гьездаса пихъ кваназе бегьула. Цинги лъагӀалидаса лъагӀалиде гьезда пихъ гьарзалъила. Дун вуго БЕТӀЕРГЬАН, нужер Аллагь.
26Бигун цадахъ гьан кванаге.
Пал тӀамуге, сихӀручилъи гьабуге.
27Къунщбуздаса рас кӀкӀваге ва мегежалъул рагӀал къунцӀуге.
28Хварасда магӀу бахъулелъул черхалда нусал чӀваге ва кинал рукӀаниги гӀужал лъоге#19:28 Гьединал рукӀана Ханааналъул халкъазул гӀадатал. Аллагьас амру гьабуна ГӀизраилил халкъалъ гьединал гӀадатал росизе бегьуларин абун.. Дун вуго БЕТӀЕРГЬАН.
29Нужерго ясал хъублъизаруге, хъахӀбалъиялдеги кьун#19:29 Мажусиязул динияб рокъор хасал диниял хъахӀбаби рукӀунаан, гьезул хъубал диниял гӀадатазда гъорлъ гӀахьаллъулел., гурони улкаялдаго хъахӀбалъи тӀибитӀизе буго, ракьги пасикълъизе буго.
30Дир шаматазул шурутӀал тӀуразаре, ва Дир Мукъадасаб бакӀалъул адаб-хӀурмат гьабе. Дун вуго БЕТӀЕРГЬАН.
31Хваразул рухӀазда кӀалъалел яги балъголъи бицунел гӀадамазухъе унге ва гьел цӀехоге, гьел сабаблъун нужго хъублъичӀого рукӀине. Дун вуго БЕТӀЕРГЬАН, нужер Аллагь.
32КӀудиясда цеве тӀаде вахъа, херав чиясул адаб гьабе – Аллагьасукьа хӀинкъа. Дун вуго БЕТӀЕРГЬАН.
33Нужеда гьоркьоб чӀел гьабурав къватӀиб ракьалдаса чи къварид гьавуге. 34Нужерго ракьцоясдехун гӀадаб бербалагьи гьабе гьединав чиясдехунги; дурго рухӀгӀан вокьа гьевги. Нужгоги рукӀиндал чияр халкъ хӀисабалда Мисриялда гӀумру гьабулел. Дун вуго БЕТӀЕРГЬАН, нужер Аллагь.
35Гьарулел ишал ракӀбацӀцӀадго гьаре: диван ритӀухъго къотӀе ва цӀадирабаздалъун яги роценалъе хӀалтӀизабулеб цоги батӀияб цӀарагӀалдалъун хӀарам гьабуге. 36Биччанте нужер киналго цӀадирабиги, ефаги, гинги ритӀарал дурусал рукӀине.
Дун вуго БЕТӀЕРГЬАН, нуж Мисриялдаса къватӀире рачарав нужер Аллагь.
37Дир къануналги Дир хӀукмабиги цӀуне ва гьезда рекъон хьваде. Дун вуго БЕТӀЕРГЬАН“».
Currently Selected:
Левит 19: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
