Левит 18
18
Гьукъарал гьоркьорлъаби
1БЕТӀЕРГЬАНАС Мусада абуна:
2«ГӀизраилазул халкъалда абе: „Дун вуго БЕТӀЕРГЬАН, нужер Аллагь. 3Нужеца нахъа тараб Мисриялъул халкъалдаги Дица нуж рачунел ругеб Ханааналъул халкъаздаги релъун хьвадуге, ва гьезул гӀадатазда нахъ рилълъунге. 4Дир амраби тӀуразаре, Дир къанунал цӀуне ва гьезда рекъон хьваде: Дун вуго БЕТӀЕРГЬАН, нужер Аллагь. 5Дир къануналги Дир амрабиги тӀуразаре. Гьел тӀуразариялдалъун чӀаго вукӀина инсан. Дун вуго БЕТӀЕРГЬАН.
6Цеесей гӀагарай чӀужугӀаданалда хъваге, гьейгун вегизе мурадгун. Дун вуго БЕТӀЕРГЬАН.
7Дурго эбелалда аскӀовги вегун, инсул тӀагъуралде рогьо бачунге. Гьей дур эбеллъидал, гьей инжит гьаюге.
8Дурго инсул батӀияй лъадуда аскӀовги вегуге, эменги хӀакъир гьавун.
9Кинай ятаниги дурго яцалда аскӀов вегуге: гьей эменцадахъай ятаниги, эбелцадахъай ятаниги, мунгун цо минаялда гӀурай ялъуни батӀаго гӀурай ятаниги.
10Дурго васасул ясалдаги ясалъул ясалдаги хъваге, хъубал къасдалгун – гьеб мунго басра гьави ккола.
11Дурго инсуе батӀияй чӀужуялъ гьаюрай ясалда аскӀов вегуге: гьей дур яц ккола, гьей инжит гьаюге.
12Дурго инсул яцалда аскӀов вегуге, гьей дур инсул тӀул бикьарай яцлъидал.
13Гьединго дурго эбелалъул яцалда аскӀовги вегуге, гьей дур эбелалъул тӀул бикьарай яцлъидал.
14Дурго инсул вацасул тӀагъуралде рогьо бачунге; хъубал къасдалгун гьесул лъадуда аскӀове лъугьунге. Гьей дур инсул вацасул лъадилъидал.
15Дурго нусалда аскӀов вегуге: гьей дур васасул лъадилъидал, гьей инжит гьаюге.
16Дурго вацасул лъадуда аскӀов вегуге – дурго вац басра гьави ккола гьеб.
17Мун чӀужугӀаданалда, цинги гьелъул ясалдаги аскӀов вегизе бегьуларо. ЧӀужуялъул ясалда яги гьелъул ясалъулги васасулги ясалда мун хъваге: гьелдалъун чӀужу инжит гьаюге. Гьеб кӀудияб къабихӀлъи буго.
18Дурго лъадул яц ячунге, гьезда гьоркьоб къецги ккезабун; дурго лъадиги чӀаго йикӀаго, гьелъул яцалда аскӀов вегуге.
19ЧӀужуялъул хӀайизалъул къояз, ай гьей хъублъун йикӀаго, гьелда аскӀов вегуге.
20Чияр чӀужуялда аскӀов вегуге ва мунго хъублъизавуге.
21Дурго лъимал Молохие#18:21 Молох (Милхом) – аммониязул аллагь. Гьесие къурбаналъе лъимал рухӀулаан, ялъуни Молохие гӀибадат гьабулел бакӀазда диниял хъахӀбабилъун гьаризе кьолаан лъимал. Мусал Къануналда рекъон, Молохил дин гьабурав чи чӀвазе къотӀулаан (бал. Лев. 20:2-5). къурбан гьаруге: дурго Аллагьасул цӀар суризабуге. Дун вуго БЕТӀЕРГЬАН.
22Бихьинчиясда аскӀов чӀужугӀаданалда аскӀов гӀадин вегуге – гьеб кӀудияб къабихӀлъи буго.
23Гьединго хӀайваналгун хъубал жал гьаруге, мунгоги хъублъизавун. Гьединго чӀужугӀаданги хӀайваналда гъоркь йегуге – гьеб кӀудияб къабихӀлъи буго.
24Гьел киналго чорокал жалаздалъун нужго хъублъизаруге. Гьеб кинабго гьабула Дица нужее кьолеб бугеб ракьалдаса нахъе хъамизе ругел халкъаз. 25Гьел сабаблъун гьеб ракьго хъублъана ва Дица гьезие жаза гьабизе хӀукму къотӀана. Гьединлъидал ракьалъги гьел халкъал къватӀире тун ралагьизаруна. 26Нужецайин абуни, Дир къануналги Дир амрабиги тӀуразаре; гӀизраилазул цониги чияс, яги къватӀиса вачӀун нужеда гьоркьоб гӀумру гьабун чӀарас гьел къабихӀал жал гьаруге. 27Щайгурелъул нужеда цере гьаб ракьалда рукӀарал халкъаз гьел рихарал ишал гьаруна, ва гьеб сабаблъун ракьги хъублъана. 28Гьединал ишал гьаризе лъугьани, нужецаги хъублъизабила гьаб ракь, цинги нужги къватӀире тун ралагьизарила гьелъ, гьанир рукӀарал халкъалго гӀадин.
29Гьединал ишал гьаруравщинав чи тӀагӀинавизе вуго ва гьесул цӀарги халкъалда гьоркьоса нахъе хъвагӀазе буго. 30Дир амрабиги ахӀкамалги тӀуразаре, гьанир рукӀарал халкъазул къабихӀал гӀадатазда нахърилълъунге ва нужго хъублъизаруге. Дун вуго БЕТӀЕРГЬАН“».
Currently Selected:
Левит 18: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
