Левит 20
20
Мунагьалъухъ букӀунеб жаза
1БЕТӀЕРГЬАНАС Мусада абуна:
2«ГӀизраилил халкъалда абе: „ГӀизраилазул цониги чияс, ялъуни нужеда гьоркьоб гӀумру гьабун чӀарал къватӀиб ракьалдаса рачӀарал гӀадамазул лъицаниги Молохие жиндирго лъимер къурбан гьабуни, гьев чи чӀвазе ккола: жамагӀаталъ ганчӀалги речӀчӀун чӀвай гьев чи. 3Дир ццин рещтӀине буго гьединав чиясде: гьев тӀагӀинавизе вуго ва халкъалда гьоркьоса нахъе къотӀизе вуго – Дир хирияб цӀаралда ва Мукъадасаб бакӀалда тӀаде рогьоги бачун, гьес лъимер Молохие кьуралъухъ. 4Лъица букӀаниги лъимер Молохие къурбан гьабуни, ва халкъалъ гьеб иш кӀвар кьечӀого тани, ва гьев чи чӀвачӀони, 5гьебмехалъ Дица жаза гьабизе буго гьесиеги гьесул гӀагарлъиялъеги. Дица тӀагӀинавила гьевги, гьесда цадахъ Молохие гӀоло хъубал ишал гьарурал киналгоги – гьезул цӀаралги халкъалда гьоркьоса нахъе хъвагӀала.
6Хваразул рухӀазда кӀалъалел, балъголъи бицунел ва гьезулгун бухьен гьабуралщинал чагӀазе Дица жаза гьабизе буго; гьединал чагӀи тӀагӀинаризе руго ва халкъалда гьоркьоса нахъе хъвагӀазе руго.
7Динияб рацӀцӀалъи цӀуне, мунагьал гьаруге, Дун вугелъул БЕТӀЕРГЬАН, нужер Аллагь. 8Дир къанунал мухӀканго тӀуразаре. Дун вуго БЕТӀЕРГЬАН – Дирго халкълъун нуж ратӀа гьарурав.
9Эбел-эмен хӀакъир гьарун кӀалъарав чи чӀвазе ккола; гьес эбел-инсуе нагӀана кьун батани, живго чӀваялъул гӀайиб гьесда жиндаго тӀаде ккола.
10Бихьинчияс зина гьабуни ва чияр лъадигун вегани, чӀвазе ккола гьевги гьесда цадахъ зина гьабурай чӀужугӀаданги.
11Жиндирго инсул лъадуда аскӀов бихьинчи вегани, эмен хӀакъир гьави буго гьеб. Гьел кӀиялго зиначагӀи чӀвазе ккола – жалго чӀваялъул гӀайиб гьезда жидедаго букӀина.
12Жиндирго нусалда аскӀов вакьад вегани, гьел кӀиялго чӀвазе ккола. Гьеб кутакалда къабихӀаб иш буго – жалго чӀваялъул гӀайиб гьезда жидедаго букӀина.
13Бихьинчи цоги бихьинчиясда аскӀов чӀужугӀаданалда аскӀов кинигин вегани, гьеб кутакалда пасикъаб иш буго – гьел чӀвазе ккола. Жалго чӀваялъул гӀайибиял гьел жалго рукӀина.
14Бихьинчияс ясги, цинги гьелъул эбелги лъудбилъун рачани, гьеб пасикълъи буго. Гьевги гьей кӀияйго гӀаданги рухӀизе ккола, гьединаб пасикълъи халкъалда гьоркьобе биччачӀого букӀине.
15ХӀайвангун хъубал гьоркьорлъаби гьарурав бихьинчи чӀвазе ккола, гьеб хӀайванги чӀвазе ккола.
16Гьединго чӀужугӀаданалъги хӀайвангун хъубал гьоркьорлъаби гьаруни, гьейги гьеб хӀайванги чӀвай. Гьел чӀвазе ккола, гьел чӀваялъул гӀайибги гьезда жидедаго буго.
17Лъица букӀаниги жиндирго эменцадахъай ялъуни эбелцадахъай яц ячани, ва гьел цоцада аскӀор регани, ва цоцазул гӀицӀлъи гьезда бихьани – гьеб буго кӀудияб нич. Гьел халкъалдаго рихьун тӀагӀинаризе ккола ва халкъалда гьоркьоса нахъе хъвагӀазе ккола. Гьев чияс жиндирго яц басра гьаюна – гьелъухъ гьесие жаза гьабизе ккола.
18ЧӀужугӀаданалъул хӀайизалъул къояз рос гьелда аскӀов вегани, гьез кӀиязго гьелъул хӀайизалъул би къватӀибе загьир гьабуна, гьединлъидал гьел халкъалда гьоркьоса нахъе тӀагӀинаризе ккола.
19Эбелалъул яги инсул яцалда аскӀов бихьинчи вегуге. Гьединаб иш гьабурав чияс жиндирго цебесеб гӀагарлъи инжит гьабулеб буго – гьел кӀиялго гӀайибиял рукӀина.
20Инсул яги эбелалъул яцалда аскӀов вегарав чияс гьелъул рос инжит гьавулев вуго, гьединлъидал кӀиялго зиначагӀазе жаза букӀина – гьел лъималги гьаричӀого хвела.
21Вацасул лъади жиндиего ячин хъубаб иш буго; вац инжит гьави ккола гьеб. Гьезие лъимал гьаризе гьечӀо.
22МухӀканго тӀуразаре тӀолалго Дир къануналги хӀукмабиги, Дица нужее кьолеб бугеб ракьалъ нужгоги къватӀире тун ралагьизаричӀого рукӀине. 23Нужеда цереса Дица нахъе къотӀулел ругел халкъазул гӀадатал росуге. Гьединал ишал гьаруралъухъ Дир гьалагаб ццин рещтӀана гьезде. 24Дица нужеда абуна гьезул ракьалъул бетӀергьабилъун нуж рукӀине ругин ва Дица нужее кьезе бугин рахьги гьоцӀоги чвахулеб гьеб ракь. Дун вуго БЕТӀЕРГЬАН, цогидал халкъаздаса нуж ратӀа гьарурав, нужер Аллагь.
25Нужеца батӀа гьабизе ккола бацӀцӀадабги хъубабги хӀайван, гьединго бацӀцӀадабги хъубабги хӀинчӀ. Дица нужее хъубаблъун бихьизабураб хӀайваналдалъун, хӀанчӀидалъун ялъуни ракьалдаса шурулеб рухӀчӀаголъиялдалъун нужго хъублъизаруге. 26Дида цебе бацӀцӀадаб гӀумру гьабе, Дун вугелъул вацӀцӀадав БЕТӀЕРГЬАН. Дица нуж цогидал халкъаздаса ратӀа гьаруна: нуж Дир ккола.
27Хваразул рухӀазда кӀалъалел ва балъголъи бицунел бихьиналги руччабиги чӀвазе ккола. ГанчӀалги речӀчӀун чӀвазе ккола гьел – гьел чӀваялъул гӀайиб гьезда жидедаго букӀина“».
Currently Selected:
Левит 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
