Байбихьи 30

1Якъубие жинцаго лъимер гьабизе бажарулеб гьечӀолъи бихьун, яцалдехун бугеб жахӀдаялъ кверде йосун йикӀана Рахел.

«Дие лъимал кье яги дун хвела», – ян абуна гьелъ Якъубида.

2Якъубил гьелда ццин бахъана ва гьес абуна:

«Дун Аллагьищ вугев? Гьеслъидал дуе лъимал кьолел гьечӀел!» – ин.

3Гьебмехалъ гьелъ абуна:

«Гьале дир гъараваш Билгьа. Биччанте гьелъ, дир накабазда лъезе, лъимер гьабизе. Цинги гьелдасан ккаралгӀаги лъимал рукӀина дир!»

4Гьедин Рахелица гьесие кьуна жиндирго гъараваш Билгьа. Якъубица гьейгун бусен гӀахьал гьабизе байбихьана; 5гьелъул ургьибе лъимер ккана ва гьелъ вас гьавуна.

6«Аллагьас хӀукму къотӀана, – ян абуна Рахелица. – Дир гьари-дугӀа къабул гьабун, вас кьуна дие».

Гьединлъидал гьелъ васасда цӀар Дан лъуна#30:6 Дан – «Дос хӀукму къотӀана», ялъуни «Дос ритӀухъ гьавуна»..

7Рахелил гъараваш Билгьал ургьибе нахъеги лъимер ккана ва Якъубие гьелъ цоги вас гьавуна.

8«Дирго яцалда данде кутакалда къеркьана дун ва ахирги бергьана», – ян абуна Рахелица.

Ва гьелъ васасда цӀар Нафтали лъуна#30:8 Нафтали – «Къеркьей»..

9Гьеб заманалда, жиндир тӀокӀаб лъимер букӀунариланги ккун, Леяца Якъубие жиндирго гъараваш Зилпа кьуна. 10Зилпацаги кватӀичӀого Якъубие вас гьавуна.

11«Икъбал ккана!» – ян абуна Леяца.

Ва гьелъ васасда цӀар Гад лъуна#30:11 Гад – «Икъбал»..

12Зилпаца Якъубие кӀиабилевги вас гьавуна.

13«ТалихӀ ккана! – ян абуна Леяца. – ТалихӀайилан абила дида руччабаз!»

Ва гьелъ васасда цӀар Ашер лъуна#30:13 Ашер – «ТалихӀ»..

14Цо нухалда, ролъ лъилъулеб гӀужалда, Рувимида хурир ратана мандрагораби#30:14 Мандрагора – магъилъ бижулеб, инсанасул сипаталда релълъарал риццатал кьалбалги ругеб, тӀегьги балеб хер. Гьелъул кьалбазул лъим кьолаан жиндихъго рокьи ккезабизе. Гьеб гьекъезе кьолаан лъимер гьабуларей чӀужугӀаданалъеги. ва жиндирго эбел Леяе рокъоре росана гьел. Рахелица Леяда гьарана:

«Дур васасда ратарал мандрагораби кье дие», – ян.

15«Дир рос дуца дида кодоса вахъарав гӀун гьечӀищ дуе? Дир васасда ратарал мандрагорабигийищ дуе гьанже къваригӀун ругел?» – ин абуна Леяца.

«Гьел мандрагораби дие кьуни, дица къаси рос дуда аскӀове виччала», – ян абуна Рахелица.

16Къаси Якъуб рокъове вачӀунеб мехалда, гьесда данде ана Лея ва гьелъ абуна:

«Дихъе вилълъа. Дир васасда ратарал мандрагорабазухъ хисун босана дица яцалъухъа къаси сордо».

Гьеб сордо Якъубица Леяда аскӀоб бана. 17Аллагьас къабул гьабуна гьелъул гьари: гьанжеги гьелъул ургьибе лъимер ккана ва гьелъ Якъубие щуабилевги вас гьавуна.

18«Росасе дица дирго гъараваш кьедал, Аллагьас дие шапакъат кьуна», – ян абуна Леяца.

Гьединлъидал гьелъ васасда цӀар Иссахар лъуна#30:18 Иссахар – «Шапакъат»..

19Нахъеги Леял ургьибе лъимер ккана ва гьелъ Якъубие анлъабилев вас гьавуна.

20«Аллагьас кӀудияб баракат кьуна дие. Гьанжени росас кӀодо гьайила дун, дица гьесие анлъго вас гьавидалха!» – ян абуна гьелъ.

Ва гьелъ васасда цӀар Зевулун лъуна#30:20 Зевулун – «Адаб-хӀурмат»..

21Хадуб Леяе ясги гьаюна ва гьелда цӀар Дина лъуна.

22Рахелидаги гурхӀана Аллагь ва гьелъул гьари къабул гьабуна – ургьибе лъимер кколейлъун гьаюна гьейги.

23Гьелъул ургьибе лъимер лъугьана ва гьелъ вас гьавуна. Цинги Рахелица абуна:

«Аллагьас рогьо-нич тӀаса босана дидаса», – ян.

24«БетӀергьанас дие цоги вас кьеги!» – янги абун, гьелъ васасда цӀар Юсуп#30:24 Юсуп – гьеб цӀар релълъуна «Дос жеги кьеги» абураб магӀна бугеб рагӀуда. лъуна.

Якъубил боцӀи-бечелъи цӀикӀкӀин

25-26Юсуп гьавураб мехалда Якъубица Лаванида абуна:

«Дирго лъималги ва жидее гӀоло дун дуда цеве хӀалтӀарал лъудбиги рачун, рокъове – дирго ватӀаналде – тӀад вуссине изну кье дие. Дудаго лъалаха кигӀан гӀемер дун дуда цеве хӀалтӀаравали».

27Лаваница абуна: «Бегьулеб батани, дихъ гӀенекке. Дуе гӀоло диеги БЕТӀЕРГЬАНАСУЛ баракат щун букӀин бичӀчӀана дида. 28Дие хӀалтӀаралъухъ дуего бокьараб мухь абе ва дица кьела гьеб», – ин.

29Якъубица абуна:

«Дудаго лъала кин дун дуда цеве хӀалтӀаравали, дица хьихьун дур рехъаби кигӀан кӀодолъаралали. 30ГӀемераб гӀи букӀинчӀо дур дун гьаниве вачӀараб мехалда. Гьанже гьезул гӀемерлъи бихьулищ! Гьеле гьедин баракат лъуна БЕТӀЕРГЬАНАС дуда дун вачӀаралдаса нахъе. Дирго хъизан-лъималазе дун кида хӀалтӀизе вугев?»

31Лаваница гьикъана: «Кинаб ужра-мухьха дуе бокьун бугеб?» – ин.

Якъубица жаваб кьуна:

«Дудасан дие щибниги хӀажат гьечӀо. Гьадинаб къотӀиялда мун разилъани, дица гьанжеялдаса нахъеги хьихьила дур гӀи ва гьелъул тӀалабги гьабила. 32РачӀа жакъа нилъ рилълъинин рехъаби рихьизе. Дуца гьениса нахъе раче киналго тӀанкӀал ругелги, чаралги, чӀегӀералги гӀиял ва гьединго тӀанкӀал ругелги чаралги цӀцӀани. Хадубккун гьединаб тайпаялъул гӀи-цӀани дие мухьалъе рукӀине риччанте. 33Дир ракӀбацӀцӀалъи лъазе бигьа букӀина дуе: гьанжеялдаса хадуб дие мухьдахъ кьуразда гьоркьоб тӀанкӀал ругелги чаралги гурони цӀцӀани яги чӀегӀераб кьер гьечӀеб гӀи батани, гьел дур рикъараллъун рикӀкӀине бегьила дуца».

34«Гьеб къотӀиялда дун рази вуго, – ян абуна Лаваница. – Дуца абухъе букӀине биччанте».

35Гьебго къоялъ Лаваница рехъалъа ратӀа гьаруна киналго тӀанкӀал ругелги чаралги дугӀби, киналго тӀанкӀал ругелги чаралги (ай хъахӀчарал) цӀцӀани, киналго чӀегӀерал гӀиял. Рачун жиндирго лъималазухъе кьуна гьес гьел. 36Ва Якъубил къайи чӀвараб бакӀалдаса лъабго къойил нухалъ рикӀкӀадегӀан ана гьел. Лаванил цогидал гӀи-цӀани хьихьун Якъубги хутӀана.

37Бигьародул, миндалалъул, чинаридул гъутӀбузул цӀи кӀанцӀарал чӀорал къотӀана Якъубица ва гьезда тӀаса хъал бахъана, чӀалал гьарун, бакӀбакӀалдаса хъахӀаб цӀул баккизегӀан. 38Гьел чӀорал гьес лъуна боцӀи гьекъолеб бакӀалда – рехъен гьекъезе бачӀараб мехалда, куйдукье яги дагӀникье ине къачӀарал гӀи-цӀаназда гьел рихьулеб куцалда. 39Куйдукье яги дагӀникье ине къачӀарал гӀи-цӀани гьел чӀалал гьарун хъал тӀаса бахъарал чӀоразухъ ралагьулаан, ва гьезие гьарулаан тӀанкӀал ругел ва чарал кьагӀи-буртӀал. 40Якъубица ратӀа гьарулаан чаралги чӀегӀералги гӀи-цӀани ва Лаванил гӀи-цӀаназдаса батӀаго хьихьулаан. Гьединаб хӀалалда Якъубил живго бетӀергьанал рехъаби гӀолел рукӀана. 41Кьариял ва чӀахӀиял гӀи-цӀани куйдукье яги дагӀникье унеб заманалда, Якъубица гьел чӀорал лъим гьекъолеб бакӀалда лъолаан, гьезда рихьулеб бакӀалда, гьел чӀоразда аскӀор гьел тӀаде кӀанцӀизе. 42ХӀалакъал-къадаразде кӀанцӀулеб заманалда гьес чӀорал нахъе росулаан. Гьедин хӀалакъаб-къадараб гӀи Лавание унаан, кьарияб-чӀахӀияб гӀи Якъубие щолаан. 43Кутакалда бечедав чи лъугьана Якъуб. Гьанже гьесул рукӀана гӀиязулги цӀцӀаназулги рехъаби, гъаравашал ва лагъзал, варанаби ва хӀамул.

Currently Selected:

Байбихьи 30: АварАК

Highlight

Copy