Байбихьи 29

Якъуб Паддан-Арамалде вачӀин

1Цинги Якъуб жиндирго нухда ана. Машрикъалъул халкъазул ракьалде щведал, 2авлахъалда цо гъуй бихьана гьесда, гьелда аскӀоб гӀиял лъабго рехъенги бугоан (гьеб бугоан боцӀи гьекъолеб бакӀ). Гъуялъул кӀалтӀуялда тӀад кӀудияб гамачӀ лъун букӀана. 3Киналго рехъаби гьенире ракӀарараб мехалда гӀухьбуз гамачӀ нахъе хъурщизабулаан ва, гӀиги гьекъезабун, нахъеги гъуялъул кӀалтӀу бацулаан.

4«Нуж киса, вацал?» – абун гьикъана Якъубица гӀухьбузда.

Харраналдаса ругилан жаваб кьуна гьез.

5«Нахорил васасул вас Лаван лъалищ нужеда?» – ян гьикъана гьес.

Лъалилан жаваб кьуна гьез.

6«Гьев кинха вугев?» – ин гьикъана Якъубица.

«ЛъикӀ вуго, – ян жаваб кьуна гьез. – Доле досул яс Рахел ячӀуней йиго гӀи гьекъезабизе».

7«Бакъ тӀерхьинегӀан жеги гӀезегӀан заман бугогури, – ян абуна Якъубица гӀухьбузда. – ГӀи данде бакӀаризе заман щун гьечӀо. ГӀи гьекъезабе ва нахъеги гӀалахалде раче рехъаби».

8Амма гьез абуна:

«Киналго рехъаби данделъичӀого, гӀи гьекъезабун бажаруларо. Гьебмехалда нахъе хъурщизабила гъуялъул кӀалтӀа бугеб гамачӀ. Цинги нижеца гӀиги гьекъезабила».

9Гьедин гаргадулел гьел ругеб мехалда, Рахел тӀаде щвана, инсул гӀиял рехъенги бачун. ГӀиявехьлъи гьабулеб букӀана гьелъ. 10ИмгӀал Лаванил гӀиял рехъенги бачун Рахел ячӀуней йихьидал, Якъуб гъуялъухъе ана ва, гамачӀги нахъе хъурщизабун, гьелъул гӀи гьекъезабуна. 11Цинги, гьелда убачги гьабун, гӀек-гӀекиялда гӀодана Якъуб, 12жив дур инсул яц Ривкал вас вугиланги абун. Гьеб инсуда бицине екерун ана Рахел. 13Яцалъул вас вачӀун вугилан рагӀидал, Лаван векерана гьоболасда дандчӀвазе; каранде къан, гьесда къочардана ва гьев рокъове вачана. Цинги Якъубица гьесда кинабго ккара-тараб бицана. 14Лаваница абуна:

«ХӀакълъунго мун дир гӀагарав чи вуго!» – ян.

Гьедин Якъубица Лаванил бакӀалда моцӀ бана.

Леяги Рахелги – Якъубил лъудби

15Цинги Лаваница гьесда абуна:

«Мун дир гӀагарав чи вугинги абун, чӀового хӀалтӀизавизе бегьиларо. Бице дида, кинаб мухь дуе кьелеб?»

16Лаванил йикӀана кӀиго яс: кӀудиялда цӀар букӀана Лея, гьитӀиналда – Рахел. 17Леял берал цодагьал загӀипал рукӀана. Рахелин абуни, лага-чорхолъанги гьайбатай гьумерги берцинай яс йикӀана. 18Якъубил Рахелихъ рокьи ккана. Гьес Лаванида абуна:

«Дур гьитӀинай яс Рахел дие кьуни, дун анкьго соналъ хӀалтӀила дуда цеве», – ян.

19«ЛъикӀ буго, – ян абуна Лаваница. – Чияе кьеялдаса гьей дуе кьей лъикӀ. Гьанив чӀа дурго».

20Рахелие гӀоло анкьго соналъ хӀалтӀана гьесда цеве Якъуб, амма гьеб анкьабго сон кин арабали лъачӀого ана – гьей йокьулей йикӀиндалха гьесие. 21Гьале ахирги гьес Лаванида абуна:

«Дир хӀалтӀул сонал ахиралде щвана, гьанже кье дие дир бахӀарай», – ян.

22Гьебмехалъ Лаваница киналго росуцоялги ахӀун, бертин гьабуна. 23Амма сордо рукӀкӀараб мехалъ, гьес ячун жиндирго яс Лея щвезаюна Якъубихъе, ва Якъуб гьелда аскӀов вегана. 24(Леяе рагьтӀател хӀисабалда Лаваница кьуна жиндирго гъараваш Зилпа.)

25Сордо рогьана – гьале Якъубида цее йиго Лея!

«Дуца дие гьабураб щиб? Рахелие гӀоло гуревищ дун дуда цеве хӀалтӀарав? Щай дуца дун гуккарав?» – ин абуна Якъубица Лаванида.

26«КӀудияйги рокъой тун, гьитӀинай яс росасе кьолеб гӀадат гьечӀо нижер рахъалда, – ян абуна Лаваница. – 27Гьаб бертадул анкь арабго, гьитӀинайги кьела нижеца дуе, мун жеги анкьго соналъги дида цеве хӀалтӀани».

28Якъубица гьес абухъе гьабуна. Бертадул анкь арабго, Лаваница гьесие жиндирго яс Рахелги кьуна. 29(Гьелъие рагьтӀателлъун гьес кьуна жиндирго гъараваш Билгьа.) 30Якъуб Рахелида аскӀов вегана ва Леядаса цӀикӀкӀун йокьана гьесие гьей. Жеги анкьго соналъги Лаванида цеве хӀалтӀана Якъуб.

Якъубие лъимал гьари

31Лея йокьулей гьечӀолъиги бихьун, БЕТӀЕРГЬАНАС гьелъул ургьибе лъимер ккезабуна, Рахелин абуни, лъимер лъугьунарейлъун гьаюна. 32Леял ургьибе лъимер лъугьана, гьелъ вас гьавуна ва гьесда цӀар Рувим#29:32 Рувим – гьаб цӀар релълъуна «Досда бихьана дир къварилъи» абураб магӀна бугеб рагӀуда. лъуна.

«Дир пашманлъи БЕТӀЕРГЬАНАСДА бихьана, – ян абуна гьелъ. – Гьанжени дун росасе йокьила».

33Гьелъул ургьибе нахъеги лъимер ккана – цоги вас гьавуна.

«Дун йокьулей гьечӀолъи рагӀана БЕТӀЕРГЬАНАСДА, – ян абуна гьелъ. – Цоги вас кьуна дие!»

Цинги гьев васасда цӀар Шимеон лъуна#29:33 Шимеон – гьаб цӀар релълъуна «Досда рагӀана» абураб магӀна бугеб рагӀуда..

34Нахъеги лъимер ккана гьелъул ургьибе, гьаб нухалъги вас гьавуна.

«Гьанжени дидехун хурхен щулалъила дир росасул, – ин абуна гьелъ. – Дица гьесие лъабго вас гьавидалха!»

Цинги гьев васасда цӀар Левий лъуна#29:34 Левий – гьаб цӀар релълъуна «хурхинабизе» яги «бухьине» абураб магӀна бугеб рагӀуда..

35Цоги нухалъ ккана гьелъул ургьибе лъимер – гьанжеги вас гьавуна.

«Гьанже дица БЕТӀЕРГЬАНАСЕ рецц гьабила, – ян абуна гьелъ ва васасда цӀар Ягьуда лъуна#29:35 Ягьуда – гьаб цӀар релълъуна «рецц гьабизе» абураб магӀна бугеб рагӀуда.». Гьелдалъун лъимал гьариги къотӀана.

Currently Selected:

Байбихьи 29: АварАК

Highlight

Copy