Байбихьи 28

1ИсхӀакъица Якъуб аскӀове ахӀана ва, гьесие баракатги гьарун, гьадинаб насихӀат гьабуна:

«Ханааниязул яс ячунге дуца. 2Паддан-Арамалде а дурго эбелалъул инсул улкаялде ва эбелалъул вац Лаванил ясаздасан цояй яче лъадилъун. 3ХӀалкӀолев#28:3 ХӀалкӀолев Аллагь – жугьутӀ мацӀалда «Эль-Шадай». Гьелъул магӀна – хӀалкӀолъи цӀикӀкӀарав, Бечедав, Гьарзаяв Аллагь. Аллагьасул баракат лъеги дуда. Гьес дур тӀинчӀ-къед гӀемер гьабеги ва дур наслаби цӀикӀкӀинареги, дудасан гӀемерал халкъал лъугьине. 4Ибрагьимие щвараб баракат дудеги дур наслабаздеги рещтӀинабеги Аллагьас, жакъа мун апараг хӀисабалда хьвадулев вугеб ва Аллагьас Ибрагьимие сайгъат гьабураб гьаб ракь дур мулклъун лъугьине».

5Хадуб ИсхӀакъица васасулгун къо-лъикӀ гьабуна ва Якъуб Паддан-Арамалде Лаванихъе ана. Гьев Лаван вукӀана Якъубилги ГӀисавилги эбел Ривкал вац арамеяв Бетуэлил вас.

6ГӀисавида лъана, баракаталъул дугӀаги гьабун, ИсхӀакъица Якъуб лъади ячине Паддан-Арамалде витӀаравлъи. Гьединго рагӀана, баракат лъеянги гьарун, гьес Якъубида лъазабураблъи ханааниязул яс лъадилъун ячунгейилан 7ва Якъуб, инсуцаги эбелалъги малъараб гьабун, Паддан-Арамалде ун вукӀинги. 8Гьебмехалда, ханаанияздасан рачарал нусал инсуе рекӀее гӀолел гьечӀолъиги бичӀчӀун, 9ГӀисав исмагӀилилазухъе ана ва гьениса жиндиего ячана МахӀалат абулей цоги лъади. Гьей йикӀана Ибрагьимил вас ИсмагӀилил яс ва Невайотил яц.

Якъубида бихьараб макьу

10Беэр-Шеваялдаса ун, Якъуб Харраналдехун валагьун сапаралде вахъана. 11Цо пуланаб бакӀалде щвараб мехалда, маркӀачӀубер рукӀкӀунеб букӀун, сордо базе рещтӀана гьев ва, къаданиб гамачӀги лъун, вегана. 12Гьеб бакӀалда макьу бихьана Якъубида: Макьилъ цо мали бихьана гьесда зодибги гӀодобги цураб, ва Аллагьасул малаикзаби рукӀана гьенисан цоял гъоркье рещтӀунел, цогиял тӀаде рахунел. 13Гьеб малиялъул тӀогьив чӀун вукӀана БЕТӀЕРГЬАН ва Гьес Якъубида абуна:

«Дун вуго БЕТӀЕРГЬАН – дур кӀудияв эмен Ибрагьимилги дур эмен ИсхӀакъилги Аллагь. Мун тӀад вегун вугеб гьеб кинабго ракь дуеги дур наслабазеги сайгъат гьабулеб буго Дица. 14СалигӀан гӀемер рукӀине руго дур наслаби, ва гьел чӀезе руго бакътӀерхьудехунги, бакъбаккудехунги, шималалдехунги, къилбаялдехунги. Киналго халкъазе баракат щвезе буго дудасан ва дур наслуялдасан. 15Дуда кӀочонге Дун мунгун вукӀин. Киве кканиги, Дица цӀунила мун ва гьаб ракьалде тӀад вуссинавила. Дица мун рехун теларо: дуе кьураб рагӀи тӀубазабила».

16Макьидаса вигьиндал, Якъубица абуна:

– «ХӀакълъунго БЕТӀЕРГЬАН вуго гьаб бакӀалда: дидани лъачӀо гьеб!»

17Кутакаб хӀинкъи рекӀелъе лъугьарав Якъубица абуна:

«КигӀан хӀинкъараб бакӀха гьаб бугеб! Аллагьасул рукъ бугогури гьаб! Зобалазул каву бугогури гьаниб!»

18Радал тӀаде вахъиндал, гьеб бакӀалда бахъун чӀезабуна Якъубица къаси жиндирго къаданиб лъун букӀараб гамачӀ ва гьелда тӀаде зайтуналъул нах тӀуна#28:18 НекӀсияб ГӀагардасеб Бакъбаккул рахъалъул халкъаз мукъадасал абулел ганчӀал эхетизарулаан аллагьзабазул рукъзал хӀисабалда.. 19Бет-Эл абун лъуна гьес гьеб бакӀалда цӀар#28:19 Бет-Эл – «Аллагьасул рукъ»., – цебе гьеб бакӀалда цӀар Луз букӀана.

20Цинги Якъубица, Аллагьасда цебе назру гьабун, гьадин абуна:

«Гьаб сапаралда дие кваназе квенги кьун, ретӀине парталги кьун, Аллагьас дун цӀунани 21ва сах-саламатго дун дирго инсул рокъовеги тӀадвуссани, гӀумруялъго БЕТӀЕРГЬАН Аллагьасе гӀибадат гьабила дица. 22Гьаб гамачӀ эхетараб бакӀги Аллагьасул Рукълъун лъугьина. Ва Аллагьас дие кьунщиналъул анцӀил бутӀа дица Аллагьасеги кьела».

Currently Selected:

Байбихьи 28: АварАК

Highlight

Copy