Тархъанлъи 40

Хирияб чадир эхетизаби

1БЕТӀЕРГЬАНАС Мусада абуна:

2«ТӀоцебесеб моцӀалъул тӀоцебесеб къоялъ Дуца Мукъадасаб Чадир, ай ДандчӀваялъул Чадир эхете. 3Гьениб жаниб лъе КъотӀиялъул гъамас ва гьелда цебе пардав бигъе. 4Хадуб гьенибе стол босе ва гьелда тӀад кинабго столалъул цӀарагӀ лъе; нахучирахъги босе ва гьелда тӀад гӀисинчирахъал лъе. 5КъотӀиялъул гъамасалда цебе лъе гьуинмахӀал рухӀулеб меседил къурбан-бакӀ. Хадуб Чадиралъул кӀалтӀа пардав бигъе.

6Къурбанал тӀад рухӀулеб къурбан-бакӀ лъе Чадиралъул, ай ДандчӀваялъул Чадиралъул кӀалтӀуялда дандбитӀун; 7ДандчӀваялъул Чадиралдаги къурбан бухӀулеб къурбан-бакӀалдаги гьоркьоб лъе беркӀал чурулеб хӀерч ва гьелда жанибе лъим тӀе. 8Чадиралда сверун гӀуцӀе азбар ва азбаралъул кӀалтӀаги пардав бигъе.

9Босе хирияб нах ва гьеб бахе Чадиралдаги гьелда жаниб бугеб кинабго цӀарагӀалдаги ва гьеб букӀина Аллагьасе батӀа гьабураблъун, ай хирияблъун. 10Гьединго хирияб нах бахе къурбан бухӀулеб къурбан-бакӀалдаги кинабго гьелъул цӀарагӀалдаги. Гьедин Аллагьасе батӀа гьабе гьеб ва гьебги букӀина кӀудияб хиралъилъун. 11Хирияб нах бахе беркӀал чурулеб хӀерчалдаги гьелъул гъоркьлъелалдаги ва гьелги Аллагьасе ратӀа гьаре.

12Чадиралъул кӀалтӀе раче Гьарунги гьесул васалги ва гьезда тӀасан лъим биччай. 13Хадуб Гьарунида тӀад хирияб партал ретӀе ва гьесда хирияб нахги бахе, гьев Дир кашишлъун вукӀине. 14Цинги гьесул васал раче ва гьезда тӀад гурдал ретӀе. 15Инсудаго гӀадин, гьездаги хирияб нах бахе, гьелги Дир кашишзабилъун рукӀине. Гьеб хирияб нах гьезда бахиналъул магӀна ккола гьелги гьезул наслабиги даималъего кашишлъиялде къабул гьарун рукӀин».

16Мусаца кинабго мухӀканго БЕТӀЕРГЬАНАСУЛ амруялда рекъон гьабуна.

17КӀиабилеб соналъул тӀоцебесеб моцӀалъул тӀоцебесеб къоялъ эхетизабуна Мукъадасаб Чадир. 18Мусаца Чадир эхетана: гьелъул гъоркьчӀелал лъуна, рахъун чӀезаруна гьелъул рамаби, лъуна рахал ва эхетизаруна хӀубал. 19Хадуб гьес Чадиралда тӀад пардав бигъана ва гьелда тӀасанги кӀиабилеб пардав тӀибитӀана, БЕТӀЕРГЬАНАС малъухъе.

20Мусаца росана КъотӀиялъул къанал ва гьел гъансида жанир лъуна; гӀурдул гъамасалъул горазда жанире ккезаруна ва гьелда тӀад тӀалъел лъуна. 21Хадуб гьес гъамас Мукъадасаб Чадиралда жанибе босана, гьелда цебе хасаб пардав бигъана ва, БЕТӀЕРГЬАНАС малъухъе, бахчизабуна КъотӀиялъул гъамас.

22Хадуб ДандчӀваялъул Чадиралъуб, гьеб хасаб пардавалда цебехун, шималияб рахъалда Мусаца стол лъуна, 23ва гьелда тӀад, БЕТӀЕРГЬАНАСУЛ амруялда рекъон, Мукъадасаб чед лъуна.

24Столалда дандбитӀун, Чадиралъул къилбаялъул рахъалда лъуна нахучирахъ, 25ва нахучирахъалда гӀисинчирахъалги рекъезаруна БЕТӀЕРГЬАНАСДА цере, БЕТӀЕРГЬАНАСУЛ амруялда рекъон.

26ДандчӀваялъул Чадиралда жаниб, хасаб пардавалда цебе меседил къурбан-бакӀ лъуна 27ва гьелда тӀад гьуинмахӀал рухӀана, БЕТӀЕРГЬАНАСУЛ амруялда рекъон. 28Хадуб Чадиралъул кӀалтӀаги пардав бигъана.

29Мукъадасаб Чадиралъул, ай ДандчӀваялъул Чадиралъул кӀалтӀуялда цебе, къурбанал тӀад рухӀулеб мазгарул къурбан-бакӀ лъуна ва гьениб тӀубан бухӀулеб къурбанги ролъул хириял садакъабиги тӀоритӀана, БЕТӀЕРГЬАНАСУЛ амруялда рекъон.

30ДандчӀваялъул Чадиралдаги къурбан-бакӀалдаги гьоркьоб лъуна беркӀал чурулеб хӀерч ва гьелда жанибе лъим тӀуна: 31Мусацаги, Гьаруницаги, гьесул васазги квералги хӀатӀалги чуризе рукӀине, 32Чадиралда жанире лъугьиналде, яги къурбаналъул бакӀалда аскӀоре иналде цебе, БЕТӀЕРГЬАНАС Мусаде гьабураб амруялда рекъон.

33Ахирги Мусаца Чадиралдаги къурбан-бакӀалдаги сверухъ азбар жанибе бачана ва азбаралъул кӀалтӀаги пардав бигъана.

Гьедин гьабун бахъинабуна Мусаца кинабго хӀалтӀи.

ТӀадегӀанасул къудрат

34Гьебмехалъ накӀкӀул парчаялъ бахчизабуна ДандчӀваялъул Чадир ва БЕТӀЕРГЬАНАСУЛ нуралъ цӀезабуна Мукъадасаб бакӀ. 35Мусахъа бажарулеб букӀинчӀо Чадиралъуве жаниве лъугьине, щайгурелъул Чадиралда тӀад чӀун букӀана накӀкӀул парча ва Мукъадасаб бакӀ ТӀадегӀанасул нуралъ цӀезабун букӀана.

36ГӀизраилал сапаразда рукӀаго, Чадиралдаса накӀкӀул парча нахъе индал гурони, нухда рахъунароан гьел; 37амма накӀкӀул парча нахъе инчӀони, гьел чӀаралъурго рукӀунаан, гьеб нахъе инегӀан. 38БЕТӀЕРГЬАНАСУЛ накӀкӀул парча чӀолаан Чадиралда тӀад къад, сардилъ гьеб накӀкӀул парчадулъ цӀа бихьулаан. ТӀолалго гӀизраилазда бихьулаан гьеб, гьел сапаразда ругебгӀан мехалъ.

Currently Selected:

Тархъанлъи 40: АварАК

Highlight

Copy