Левит ЦеберагӀи
ЦеберагӀи
Гьаб тӀехьалда аслияб къагӀидаялда рехсолел руго, Аллагьасе хъулухъ гьабиялда бан, кашишзабазеги левитазеги рихьизарурал къанунал. Кашишзабиги левиталги Левийил наслуялдаса лъугьана, гьединлъидал гьаб тӀехьалда цӀарги «Левит» абун лъун буго.
Цебехунаб тӀехьалда, ай «Тархъанлъи» абураб тӀехьалда, Аллагьас Синай магӀарда, Муса аварагги гьоркьов ккун, халкъалъе Жиндирго Къанун кьуна. Гьаб тӀехьалдайин абуни, бицунеб буго батӀи-батӀиял къурбаназул, бацӀцӀадалъул ва хъубалъул, халкъалда жанир цоцада гьоркьор рукӀине кколел ритӀарал гьоркьорлъабазул ва гӀадамазул къойилаб гӀумруялъул рукӀа-рахъиналда хурхарал жеги батӀи-батӀиял тадбиразул хӀакъалъулъ.
ТӀехьалъул тӀоцебесеб бутӀаялда лъазабулеб буго гӀадамаз хъолел къурбанал гӀицӀго Аллагьасул хъулухъчагӀаз тӀоритӀизе кколин ва гьел къурбанал тӀоритӀиялъе мухӀканал къануналги кьолел руго (1–10 бутӀрул). Гьел къурбаназул батӀи-батӀияб магӀна буго. ЖамагӀаталъул рахъалъ ва щивав чияс жиндирго рахъалъ Аллагьасул Мукъадасаб бакӀалде кьолел руго Гьесдасан щвараб тӀолабго рикъзиялъул бутӀаби, Гьесие рецц гьабун, гьелдалъун жидерго мунагьазда рекӀекълъи загьир гьабизелъун ва Аллагьасулгун битӀараб гьоркьоблъи цӀунизелъун.
КӀиабилеб бутӀаялда кьун руго хъубабги бацӀцӀадабги батӀа бахъиялъе къанунал (11–16 бутӀрул). Аллагьасул халкъалъ рацӀцӀалъи цӀунизе кколеблъи лъазабулеб буго – къойилаб рукӀа-рахъиналъул къагӀидабазулъги, кваналеб кванилъ хъубаб ва бацӀцӀадаб батӀа гьабиялъулъги.
Лъабабилеб бутӀаялда гӀемерал къанунал хъван руго живго инсанасул гӀумруялда, гьесул хъизан-къаялда ва магӀишаталда хурхун, гьединго жамгӀияб рукӀа-рахъиналда хурхунги (17–27 бутӀрул). ТӀолалго халкъазда гьоркьоса Аллагьас тӀаса бищараб гӀизраилазул халкъалда тӀадаб букӀана гьел киналго Аллагьасул амрабиги къануналги тӀуразаризе, жал цогидал халкъаздаса батӀиял ва Аллагьас ратӀа гьарурал рукӀин гьезда кӀочон течӀого букӀине. ГӀизраилазе кӀудияб баракат щвана – Живго Хирияв Аллагь гьезие загьирлъиялдалъун ва Гьес Жинцаго гьел цере рачиналдалъун; гьелъул гӀаламатлъун букӀана, киса-кибего гьез цадахъ босулеб, Мукъадасаб Чадир.
Гьаб тӀехьалда хъварал гӀемерисел къанунал релълъуна НекӀсияб ГӀагардасеб рахъалъул халкъазул къануназда. Амма Аллагьасул Калимаялда кӀудияб кӀвар кьолеб буго ракӀ разиго Къудратав Халикъасе мукӀурлъизе инсанасда тӀадаб букӀиналъе, ва Гьесул амрабиги хӀукмабиги кьочӀое росун гӀумру гьабизе кколин бихьизабулеб буго. Гьаб тӀехьалдайин нилъеда батулеб Аллагьасул къануназда жаниб бищун кӀвар цӀикӀкӀараб Аллагьасул амру: «Дурго рухӀгӀан вокьа дуе дуда аскӀов вугев цогидав чиги» (19:18).
ТӀехьалда буго
Къурбанал гьариялъул къанунал (1:1–7:38)
Щуго батӀияб къурбан (1:1-17)
Ролъул хирияб садакъа (2:1-16)
Ракълил къурбан (3:1-17)
Мунагь чуриялъул къурбан (4:1-35)
Тохлъукье ккараб мунагьалъухъ къурбан (5:1-6)
Тохлъукье ккараб мунагьалъухъ мискинчиясул къурбан (5:7-13)
ГӀайиб бецӀулеб къурбан (5:14-19; 6:1-7)
Кашишзабазе хъварал къанунал (6:8–7:38)
Гьарунги гьесул васалги кашишлъиялде тӀами (8:1–10:20)
Хъублъиялда ва рацӀцӀалъиялда хурхарал Аллагьасул амраби (11:1–16:34)
Къойилаб рукӀа-рахъиналда хурхарал Аллагьасул амраби (17:1–20:27)
Кашишзабазе рихьизарурал Аллагьасул амраби; байрамал (21:1–24:23)
Шаматалъул ва Юбилеялъул сон; баракат ва нагӀана; назруялъул хирияб садакъа (25:1–27:34)
Currently Selected:
Левит ЦеберагӀи: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023