Тархъанлъи 39

Кашишзабазул партал

(Тархъ. 28:1-43)

1Мукъадасаб бакӀалда хъулухъ гьабулаго ретӀунеб кашишасул партал гьабуна канчӀхъахӀилабги, бецӀбагӀарабги ва канчӀбагӀарабги квасул куназ бессун. Гьарунида тӀад ретӀунеб партал гьабуна БЕТӀЕРГЬАНАС Мусаде амру гьабураб къагӀидаялда.

2Эфод гьабуна тӀеренаб хӀебтил, канчӀхъахӀилабги, бецӀбагӀарабги, канчӀбагӀарабги квасул куназ бессун, гъорлъе меседил кунги жубан. 3ЧӀинтӀизабураб меседалъул тӀеренал тӀанчалги гьарун, гьеб къотӀ-къотӀана тӀеренал куназде ва махщалида жубазабуна канчӀхъахӀилабги, бецӀбагӀарабги, канчӀбагӀарабги квасул куназда ва тӀеренаб хӀебтида гъорлъе. 4Хадуб кӀигъуждузда тӀад лъолел жал гьаруна, ва гьел цересаги нахъасаги эфодалда рекӀинаруна. 5Эфодалда релълъараб букӀана махщалида бессараб эфодалъул рачелги, гьелдаго цадахъ цо ххамил кесекалъул гьабураб; БЕТӀЕРГЬАНАС Мусада малъухъе, гьелъиеги хӀалтӀизабуна меседил кунги, канчӀхъахӀилаб, бецӀбагӀараб ва канчӀбагӀараб квасул кунги, тӀеренаб хӀебетги.

6Меседил тӀеренкуназ хьухьун махщалида гьарурал нагӀли лъолел жалазда ккуна ониксалъул жавгьарал ва, мугьру бикӀулеб гӀадин, кӀиябго жавгьаралда тӀад рикӀана ГӀизраилил васазул цӀарал. 7Ониксалъул жавгьарал рекӀинаруна эфодалъул кӀигъуждузда тӀад лъолел жалазда, ГӀизраилил васал ракӀалдещвеялъул жавгьарал хӀисабалда, БЕТӀЕРГЬАНАС Мусаде гьабураб амруялда рекъон.

8Эфодго гӀадин гьабуна каранда балеб цебебухьги: меседил кунги, канчӀхъахӀилаб, бецӀбагӀараб, канчӀбагӀараб квасул кунги ва тӀеренаб хӀебетги босун. 9Гьеб букӀана ункъбокӀонаб, цо рокьобалъул халалъиги гӀеблъиги бугеб, кӀигъатаб ххамил гьабураб. 10Гьелда жаниб ункъго кьер гьабун лъуна багьа хириял жавгьарал. ТӀоцебесеб кьерда лъуна рубин, топаз ва зумруд; 11кӀиабилеб кьерда – пируза, сапфир ва алмас; 12лъабабилеб кьерда – гиацинт, агат ва аметист; 13ункъабилеб кьерда – зубаржад, оникс ва яшма. Гьел лъуна меседил тӀеренкуналъ хьухьарал нагӀли лъолел жалазда жанир. 14Кинабниги анцӀила кӀиго жавгьар букӀана – ГӀизраилил щивав васасул цӀар рикӀкӀун; щибаб жавгьаралда, мугьруялда гӀадин, бикӀун букӀана анцӀила кӀиябго къавмалъул бетӀерасул цо-цо цӀар.

15Каранда балеб цебебухьалда разе бацӀцӀадаб меседалъул кьур-кьурараб квар гӀадал рахсал гьаруна. 16Меседил тӀеренкуналъ хьухьараб кӀиго нагӀли лъолеб жоги кӀиго меседил баргъичги гьабуна ва цо-цо меседил баргъич рекӀинабуна цебебухьалъул кӀиябго бокӀоналда. 17КӀиго меседил рахас рекӀинабуна цебебухьалъул бокӀназда ругел баргъичазда, 18ва рахсазул цогидал рагӀалал – нагӀли лъолел жалазда, нагӀли лъолел жал – эфодалъул кӀигъуждузда тӀад лъолел жалазул цебесеб рахъалда. 19Хадуб кӀиго меседил баргъич гьабуна ва гьелги рекӀинаруна эфодалъул цебебухьалъул цогидал бокӀназда, гъоркьияб рахъалда. 20Хадуб жеги кӀиго меседил баргъич гьабуна ва гьел рекӀинаруна эфодалъул цебесеб рахъалъул кӀигъуждузда тӀад лъурал жалазул ахада, эфодалъул рачелалда тӀадехунисан унеб куналъул мухъалда аскӀоб. 21Каранда балеб цебебухьалъул баргъичал рухьана канчӀхъахӀилаб чалуялъ эфодалъул баргъичалгун, цебебухьги рачелалда тӀадехун ккезабун, эфодалдаса гьеб хъущтӀуларедухъ. Гьедин гьабеян тӀадкъан букӀана БЕТӀЕРГЬАНАС Мусада.

22Эфодалда гъоркьан ретӀунеб риза букӀана канчӀхъахӀилаб куналъ бессун гьабураб, 23бакьулъ габурги къотӀараб ва бихъунгутӀизе габуралда сверун чӀологи букъараб. 24Ризаялъул ахадасан рукъана канчӀхъахӀилабги, бецӀбагӀарабги, канчӀбагӀарабги квасул куналъул ва тӀеренаб хӀебтил гьарурал соноялъул суратал. 25Гьезда гьоркьо-гьоркьор рекӀинаруна бацӀцӀадаб меседалъул гьарурал цӀурмал: 26цо цӀумур, цо соноялъул сипат ирга гьабун лъуна ва гьедин гьабуна ризаялъул тӀолабго ахалъиялда. Гьедин гьабизе кколаан, кашишас Чадиралда жаниб хъулухъ гьабулеб мехалда гьеб тӀад ретӀине букӀине, БЕТӀЕРГЬАНАС Мусада тӀадкъараб куцалда.

27Гьаруниеги гьесул васазеги гьаруна тӀеренаб хӀебтил гурдал, 28тӀеренаб хӀебтил хасал тӀагърал, гьелъулго ботӀрода рухьулел жал ва гъоркьан ретӀунел тӀажал. 29Гьединабго хӀебтил гьабуна, тӀад канчӀхъахӀилабги бецӀбагӀарабги ва канчӀбагӀарабги квасул куналъ накъишалги угьараб рачел, БЕТӀЕРГЬАНАС Мусада малъухъе.

30БацӀцӀадаб меседги чӀинтӀизабун, гьелъул гьабуна хирияб таж ва гьелда тӀад мугьруялда гӀадин бикӀана: «БЕТӀЕРГЬАНАСУЛ хирияб», – ин. 31Хадуб канчӀхъахӀилаб чалуялъ гьеб бухьана кашишасул тӀагъуралда тӀад, БЕТӀЕРГЬАНАС Мусада бихьизабураб куцалда.

Мукъадасаб Чадир гьабун бахъин

(Тархъ. 35:10-19)

32Гьедин гьабун рагӀалде бахъана Мукъадасаб Чадир, ай ДандчӀваялъул Чадир. ГӀизраилаз кинабго гьабуна БЕТӀЕРГЬАНАС Мусаде гьабураб амруялда рекъон. 33Гьез кинабго Мусахъе босана – Чадирги гьелъул къайиги: гъунцӀби, рамаби, рахал, хӀубал ва гьезие гъоркьчӀелал, 34багӀар кьералъ релъарал гӀиял къухьдузул гьарурал пардавал, тӀеренал цӀаказул гьарурал пардавал, 35КъотӀиялъул гъамас ва гьелъул тӀалъелгун гӀурдул, 36стол ва гьелъие хӀажатаб цӀарагӀ, мукъадасаб чед, 37тӀад гӀисинчирахъазул кьергун ва гьезие хӀажатаб цӀарагӀгун бацӀцӀадаб меседалъул нахучирахъ, канлъи бакизе нах, 38меседил къурбан-бакӀ, бахунеб хирияб нах, гьуинмахӀазе махӀгьуинаб жубай, Чадиралъул кӀалтӀа балеб пардав, 39мазгарул хьуригун мазгаралъул къурбан-бакӀ, гьелъие хӀажалъулеб цӀарагӀ ва гӀурдул, беркӀал чурулеб хӀерч ва гьелъул гъоркьчӀел, 40хӀубалгун ва гъоркьчӀелалгун азбаралъул пардавал, азбаралъул кӀалтӀа бигъулеб пардав, азбаралъе кваралги гъазихъалги, Мукъадасаб Чадиралъул, ай ДандчӀваялъул Чадиралъул кинабго цӀарагӀ, 41хирияб бакӀалда хъулухъ гьабулаго ретӀунеб бессараб ххамил партал, ай Гьаруницаги гьесул васазги БЕТӀЕРГЬАНАСЕ хъулухъ гьабулеб мехалда ретӀунеб хасаб кашишзабазул партал.

42БЕТӀЕРГЬАНАС Мусаде гьабураб амруялда рекъон гьабуна гӀизраилаз кинабго хӀалтӀи. 43Мусаца тӀолалго хӀалтӀабазул хал-шал гьабуна ва гьесда бихьана кинабго БЕТӀЕРГЬАНАСУЛ амруялда рекъон гьабун букӀин. Муса гьелда разилъана ва гьезие лъикӀабщинаб гьарун дугӀа гьабуна.

Currently Selected:

Тархъанлъи 39: АварАК

Highlight

Copy