Тархъанлъи 29

Гьарунги гьесул васалги кашишлъиялде тӀами

(Лев. 8:1-36)

1Гьел Дие кашишлъиялде тӀамизе рукӀине гьадин гьабе: баче цо басиги кӀиго куйги – гьел рукӀине ккола щибго жагъаллъи гьечӀел. 2Реже бищун лъикӀаб ролъул ханждал реччеб тӀечӀел чадалги, нахуда руцарал реччеб тӀечӀел бакарабиги, тӀад нах бахарал реччеб тӀечӀел бакарабиги, 3ва гьел цо чӀепалда жанир лъе. Басиялдаги куяздаги цадахъ босе гьеб чӀеп.

4Гьарунги гьесул васалги Чадиралъул кӀалтӀе раче ва гьезда лъим бахъе. 5Хадуб босе кашишзабазул партал ва ретӀе Гьарунида гурдеги, эфодалда гъоркь букӀунеб ризаги, жибго эфодги, каранда букӀунеб цебебухьги ва эфодалда тӀасан рачел къай. 6Гьесул ботӀрода хасаб тӀагъур лъе ва гьелда тӀасан бухье «БЕТӀЕРГЬАНАСУЛ хирияб», – ин тӀад хъвараб меседил таж. 7Цинги зайтуналъул хирияб нах босе ва гьеб гьесда бахе, ботӀрода тӀадеги тӀун. 8Цинги раче гьесул васал ва гьезда гурдал ретӀе, 9Гьарунидаго гӀадин рачелалги къай ва ботӀрода хасал тӀагъралги лъе. Гьелдаса нахъе кашишлъи даим гьезухъ букӀине буго. Гьедин ратӀа гьарила дуца Гьарунги гьесул васалги кашишаллъун рукӀине.

10Хадуб Чадиралда цебе баче баси ва Гьаруницаги гьесул васазги кверал лъе гьелъул бетӀералда тӀад. 11Цинги Чадиралъул кӀалтӀа хъве гьеб БЕТӀЕРГЬАНАСДА цебе. 12Басиялъул би бахе къурбан-бакӀалъул лълъурдузда ва хутӀараб би гьелъул ахаде тӀе. 13Хадуб босе гьелъул чехь-бакьалъул кинабго тӀатӀиги, тӀулал халасеб бутӀаги, тӀатӀигун цадахъ ургьисалабиги ва гьеб кинабго къурбан-бакӀалда тӀад бухӀе. 14Оцол гьанги, тӀомги, чехь-бакьги бухӀе халкъалъ къайи чӀвараб бакӀ тун къватӀибехун. Гьеб буго мунагьал чуриялъул#29:14 Мунагьал чури – Мусал Къануналда рекъон, Аллагьас мунагьал чурула гьаб дунялалдаго, Аллагьас рихьизарурал къурбанал гьариялдалъун, Гьесул Къануналъе мутӀигӀлъиялдалъун ва Гьесул амрабазда рекъон гӀумру гьабиялдалъун. Инсан хун хадуб гьесул мунагьал чуруларо. къурбан.

15Цинги баче цо куй, ва Гьаруницаги гьесул васазги кверал лъе гьелъул бетӀералда. 16Хадуб гьеб хъве ва гьелъул би пунхъизабе къурбан-бакӀалде – гьелъул ункъабго рахъалде. 17Куйдул къулагӀи кесказде къотӀе; гьелъул ургьимесги рицӀимахӀабиги чуре, ва бетӀералдаги цогидал кесказдаги цадахъ лъе, ва 18гьеб кинабго къурбан-бакӀалда тӀадги лъун бухӀе. Гьеб буго БЕТӀЕРГЬАНАСЕ рокьулел махӀал рахъинариялъе тӀубанго бухӀулеб цӀадул къурбан.

19Баче цогидаб куй ва гьелъул бетӀералда тӀад Гьаруницаги гьесул васазги кверал лъе. 20Хадуб гьеб хъве ва гьелъул би бахе Гьарунилги гьесул васазулги кваранаб гӀинзул рагӀалда ва кваранаб квералъулги хӀатӀилги кӀудияб килщида. Цинги би къурбан-бакӀалде пунхъе – гьелъул ункъабго рахъалде. 21Хадуб къурбан-бакӀалда тӀаса цодагьаб биги босун, гьеб хирияб нахгун жубазабе ва гьеб пунхъе Гьарунидеги гьесул парталалдеги, гьединго гьесул васаздеги гьезул парталалдеги. Гьебмехалда гьевги, гьесул васалги ва гьезул парталги Дие хъулухъалъе ратӀа гьарураллъун ккола.

22Хадуб босе гьеб куйдул тӀатӀиги, мохмохги, чехь-бакьалъул тӀатӀиги, тӀулал халасеб бутӀаги, тӀатӀигун цадахъ ургьисалабиги. Гьеб кашишлъиялде тӀамиялъе хъолеб къурбан бугелъул, гьелъул кваранаб бохги босе. 23БЕТӀЕРГЬАНАСДА цебе босун бачӀараб чӀепалъуса босе цо чедги, нахуда буцараб бакариги, цо нах бахараб бакариги. 24Гьеб кинабго кье Гьарунихъеги гьесул васазухъеги кодобе ва хьвагӀезабе БЕТӀЕРГЬАНАСДА цебе, хьвагӀезабулеб садакъа хӀисабалда. 25Хадуб гьезухъаги босун, гьеб бухӀе къурбан-бакӀалда тӀад тӀубан бухӀулеб къурбангун цадахъ. Гьеб буго цӀадудалъун БЕТӀЕРГЬАНАСЕ кьолеб хирияб садакъа – БЕТӀЕРГЬАНАСЕ хирияб буго гьелъул махӀ. 26Хадуб босе Гьарун КӀудияв кашишлъун тӀамиялъе хъураб къурбаналъул мегьед, ва эхедеги борхун хьвагӀезабе гьеб БЕТӀЕРГЬАНАСДА цебе, – гьеб букӀине буго дур бутӀалъун.

27КӀудияб хиралъилъун рикӀкӀе Гьарунги гьесул васалги кашишлъиялде тӀамиялъе хъурал къурбаназдасан гьезие кколел бутӀаби: хьвагӀезабулеб къурбаналъул мегьедги гьединго хирияб садакъаде кьураб бохги. 28Гьеб буго Гьаруниеги гьесул васазеги гӀизраилазул рахъалдасан кьолеб даимаб бутӀа. Гьединго ракълил къурбаназдасаги БЕТӀЕРГЬАНАСЕ гӀоло гьединал бутӀаби кьезе ккола гӀизраилаз.

29Гьарунил кашишлъиялъул партал кьезе буго гьесул наслабаз наслабазухъе. Гьебги ретӀун ва хирияб нахги бахун тӀамизе руго гьел кашишлъиялде. 30Биччанте хадубккун гьесул бакӀалда кашишлъун вахъарав ва Чадиралъуве лъугьарав гьесул наслуялъул щивав чияс тӀоцебесеб анкьго къоялъ гьеб партал тӀад ретӀаралъубго тезе.

31Кашишлъиялде тӀамиялъе хъураб къурбаналъул гьан белъе Чадиралъул азбаралда. 32Биччанте Гьаруницаги гьесул васазги кваназе гьеб гьан Чадиралъул кӀалтӀа лъураб чӀепалъуса чедгун цадахъ. 33Гьез жидецаго кваназе ккола гьеб: гьел къурбаназдалъун гьел Аллагьасде гӀагарлъана, мунагьаздаса рацӀцӀалъана ва кашишлъиялде ратӀа гьаруна. БатӀияв чиясул ихтияр букӀунаро гьеб квине, щайгурелъул гьеб Аллагьасул кӀудияб хиралъилъун кколелъул. 34Гьеб гьаналги чадилги тӀокӀлъун рогьинегӀан нахъе хутӀараб цӀадулъ бухӀе. Гьеб лъицаго квине бегьуларо – Аллагьасул хиралъи букӀун.

35Гьаруниеги гьесул васазеги дуца гьабе Дица дуда малъарабщинаб. Анкьго къо кье гьел рацӀцӀад гьариялъул тадбиралъе. 36Щибаб къоялъ мунагь чурулеб къурбанлъун баси хъве, гьел Аллагьасде гӀагарлъиялъул мурадалда. Гьединго мунагь чурулеб къурбан хъве къурбан-бакӀ бацӀцӀад гьабиялъул мурадалда ва гьелда хирияб нахги бахе. 37Анкьго къоялъ гьабе къурбан-бакӀ бацӀцӀалъизабулеб тадбир. Цинги къурбан-бакӀ лъугьине буго кӀудияб хиралъилъун. Гьелда хъварабщинаб жоги бацӀцӀадаблъун лъугьине буго.

Щибаб къоялъул къурбанал

(Тар. 28:1-8)

38Щибаб къоялъ къурбаналъе хъве кӀиго лъагӀараб кьегӀер: 39цояб – радал, цогидаб – бакъанида. 40ТӀоцебесеб кьегӀералда цадахъ босе зайтуналъул нахул гиналъул ункъил бутӀагун#29:40 Гин – 3,5 литра. жубазабураб лъикӀаб ханждал ефаялъул анцӀго бутӀа гьабун цо бутӀа ва къурбан-бакӀалде тӀезе чагъиралъул гиналъул ункъил бутӀа. 41Цогидаб кьегӀер баче бакъанида, цадахъ радалго гӀадинаб ролъул хирияб садакъагун ва къурбан-бакӀалде тӀолеб чагъиргун. Гьеб буго БЕТӀЕРГЬАНАСЕ хирияб махӀалъул кӀкӀуй бахъинабиялъе тӀубанго бухӀулеб цӀадул къурбан.

42ТӀолалго рукӀинесел гӀелазги тӀобитӀизе ккола гьединаб тӀубан бухӀулеб къурбан, БЕТӀЕРГЬАНАСДА цебе, Чадиралъул кӀалтӀа. Гьенив Дун нужее загьирлъизе вуго ва мунгун кӀалъазе вуго. 43Гьеб бакӀалда Дун загьирлъизе вуго ГӀизраилил халкъалъе ва гьеб букӀине буго Дир хӀалкӀолъиялъ батӀа гьабураб хирияб бакӀлъун.

44Дица Дирго хиралъилъун рукӀине ратӀа гьаризе руго Чадирги къурбан-бакӀги, гьединго Гьарунгун гьесул васалги – гьел Дир кашишзабилъун рукӀине. 45Дун гӀизраилазда гьоркьов загьирлъизе вуго; Дун вукӀине вуго гьезул Аллагьлъун. 46Гьезда лъазе буго, Мисриялдаса къватӀире жал рачарав, гьезул БЕТӀЕРГЬАН Аллагь Дун вукӀин ва Дун гьелгун вукӀин. Дун вуго БЕТӀЕРГЬАН – гьезул Аллагь.

Currently Selected:

Тархъанлъи 29: АварАК

Highlight

Copy