Эстер 5
5
Эстерил гьари
1Лъабабилеб къоялъ, тӀад ретӀун парччахӀлъиялъул ретӀелгун, Эстер лъугьана парччахӀасул кӀалгӀаялъул жанисеб азбаралде ва парччахӀасул тах лъураб рукъалда цее яхъун чӀана. ПарччахӀ гьеб заманалда тахида, рукъалъул кӀалтӀехун валагьун, гӀодов чӀун вукӀана.
2Азбаралъуй эхетун Эстер бика йихьидал, гьев гьелда гурхӀана. ПарччахӀас жиндирго кодоб букӀараб парччахӀлъиялъул меседил гӀанса гьелъул рахъалде гӀебеде битӀана. Эстер аскӀое ячӀана ва гӀансил бетӀералда хъвана.
3ПарччахӀас цӀехана гьелда: «Щиб дур къваригӀел, Эстер бика? Щиб бугеб дур гьари? Щиб бокьаниги гьаре, бащдаб парччахӀлъицин – кинабго кьела дуе». 4Эстерица абуна: «ПарччахӀасе къабуллъани, вачун цадахъ Гьаманги, дица парччахӀасе къачӀараб сухӀматалде вачӀа абе парччахӀ къаси». 5ПарччахӀас лъазабуна: «Хехлъи гьабун ахӀе Гьаман гьаниве, биччай Эстерица абухъе букӀине!» ПарччахӀги Гьаманги, Эстерица хӀадурараб сухӀматалде рачӀана.
6Гьенир квана-гьекъолел рукӀаго парччахӀас Эстерида цӀехана: «Щиб бугеб дур къваригӀел? Щиб бокьаниги кьела дуе. Кинаб бугеб дур гьари-мурад? Дуца гьарараб жо, бащдаб парччахӀлъиялде гӀунтӀунгицин – кинабго тӀубазабила». 7Эстерица данде жаваб кьун, гьадин абуна: «Гьале дир рекӀел мурад ва дир гьари: 8ПарччахӀасул дида ракӀ рекъолеб батани ва парччахӀасда дир къваригӀел тӀубазе ракӀалда батани, рачӀа абе парччахӀ ва Гьаман метеркъасиги дица гьезие хӀадуризе бугеб сухӀматалде, цинги кьела дица парччахӀасул суалалъе жаваб».
Гьаман Мардохай чӀвазе ургъи
9Доб къоялъ аваданго, кутакалда разиго вахъана Гьаман къватӀиве. Амма парччахӀасул кавабахъ вугев Мардохайида бер чӀвайдал, ва гьев жинда цеве тӀадецин вахъинчӀевлъи ва цо тӀуркӀичӀевлъи бихьидал, Гьаманил кутакалда ццин бахъана Мардохайида. 10Амма гьес хӀал лъазе биччачӀо ва рокъобе нух босана.
Рокъове щведал, жиндирго гьудул-гьалмагъзаби данде ракӀареян ва жиндирго лъади Зерешги ахӀеян буюрухъ кьуна Гьаманица. 11Гьаман лъугьана гьезда цеве живго жиндицаго веццизе: гьес бицана жиндирго бугеб кутакаб къадру-къиматалъул, бечелъиялъул, жиндирго васазул гӀемерлъиялъул, ва парччахӀас жив цогидал киналго вазираздасаги ва нуцалаздасаги тӀадегӀанлъизавун кӀодо гьавураб куцалъул.
12«Гьелда тӀадеги, – ян абуна Гьаманица, – Эстер бикацаги парччахӀасда цадахъ сухӀматалде цохӀо дун тун батӀияв чи ахӀичӀо. Метеркъасиги ахӀун вуго дун гьелъухъе парччахӀгун цадахъ. 13Амма дов Мардохай парччахӀасул кавудахъ вукӀаго, дие гьеб киналъулго щибго лазат гьечӀо».
14Гьесул лъади Зерешица ва киналго гьудул-гьалмагъзабаз гьадинаб гӀакълу кьуна гьесие: «КӀикъоялда анцӀго натӀ борхалъи бугеб хӀуби чӀваян буюрухъ кье дуца ва радал парччахӀасда абе, гьенивги ван Мардохай гъанкъеян, хадув парахатго парччахӀгун цадахъ сухӀматалде а».
Гьамание гьеб гӀакълу рекӀее гӀуна ва хӀуби эхетизабеян буюрухъ кьуна.
Currently Selected:
Эстер 5: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
