Эстер 6
6
ПарччахӀас Мардохай кӀодо гьави
1Доб сордоялъ парччахӀасда макьу щвечӀо. Къойил лъугьа-бахъиназул хъвай-хъвагӀай жинда тӀад гьарулеб тарихалъул тӀехь босеян ва рагӀун цӀалеян лъазабуна гьес. 2Гьениб хъван батана парччахӀасул каву цӀунизе тарал Бигътан ва Тереш абурал кӀиго ахтабаз, парччахӀ Ахашверош чӀвазе гьабураб хӀилла-макру Мардохайица къватӀиб чӀвазабиялъул. 3ПарччахӀас цӀехана: «Щиб лъикӀлъи гьабураб Мардохайие гьаб ишалъухъ ва кин гьев кӀодо гьавурав?» Гьесие щибго лъикӀлъи гьабичӀин бицана гьесул чукъбуз.
4«Доба къватӀибехунисеб азбаралда щив вугев?» – ин цӀехана парччахӀас. Гьаман вукӀана гьениве вачӀун парччахӀасда кӀалъазе, жиндицаго гьесие къачӀараб хӀобода Мардохай ваян абун.
5Чукъбуз парччахӀасда абуна: «Гьаман вуго дове вачӀун», – ин. ПарччахӀас абуна: «Жаниве вачӀаян абе», – ян. 6Гьаман жаниве вачӀана ва парччахӀас гьесда цӀехана: «ПарччахӀасе кӀодо гьавизе бокьарав чиясе щиб гьабизе кколеб?» – ан. «Дун тун батӀияв тӀокӀав щив парччахӀас кӀодо гьавилев?» – ан пикру гьабуна Гьаманица. 7Ва гьес жаваб кьуна: «ПарччахӀасе цо чи кӀодо гьавизе бокьун батани, 8парччахӀас ретӀунеб партал босун бачӀине биччай, гьединго парччахӀ рекӀунеб чӀухӀадго бетӀерги къачӀараб гьесул чуги бачеян абе. 9Гьеб парталги, гьеб чуги кье абе парччахӀасул чӀухӀбузда гьоркьов бищун тӀадегӀанасухъе ва гьес ретӀе абе парччахӀас кӀодо гьавизе бокьарав чиясда тӀад гьеб партал, гьесго рекӀинаве абе гьев чодаги. Хадуб гьев чияс, чӀолохъжоги ккун, цӀан баче абе гьеб чу шагьаралъул майданалде ва ахӀе абе гьес: „Гьале гьадин гьабула парччахӀас кӀодо гьавизе бокьарав чиясе!“ – ян».
10«Дуца бицухъе, хехлъи гьабун босе парталги чуги ва гьеб кинабго гьабе дов парччахӀасул кавудахъ гӀодов чӀун вугев ягьудияв Мардохайие! Щибго гьоркьоб течӀого дуца абухъе тӀубазабе кинабго», – ян лъазабуна парччахӀас Гьаманида.
11Босана Гьаманица партал ва бачана чу, ретӀана Мардохайида тӀад гьеб партал, вахинавуна гьев гьеб чоде, ва, ккун чӀолохъжогин, бачана гьеб чу шагьаралъул майданалде ва гьес ахӀулеб букӀана: «Гьале гьадин гьабула парччахӀасе кӀодо гьавизе бокьарав чиясе!» – ян.
12Хадув Мардохай парччахӀасул кавудахъе тӀадвуссана, Гьаманин абуни балагьалъул гьир тӀаде бегарав чи гӀадин, къулун бетӀергин рокъове гӀедегӀана. 13Гьаманица гьеб кинабго бицана жиндирго лъади Зерешида ва гьудул-гьалмагъзабазда. Гьесул гӀакъилзабаз ва гьесул лъади Зерешица жаваб кьун абуна: «Гьев ягьудиязул агьлуялъул чи Мардохай сабаблъун мун гӀодовегӀан ккезе байбихьун батани, бажаруларо дуда гьесдаса бергьине, щапула мун гьесда цеве!» – ян.
14Гьеб рагӀи абун бахъиналде, рачӀун парччахӀасул ахтаяз, хехлъи гьабун вачун ана Гьаман Эстерица хӀадурараб сухӀматалде.
Currently Selected:
Эстер 6: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
