Къанун 4

МутӀигӀлъиялъул къанун

1ГӀенекке гьанже, ГӀизраилил халкъ, дица нужеда малъулел ругел Аллагьасул къануназухъги хӀукмабазухъги. Гьел тӀуразаре, нужго чӀаго рукӀине ва БЕТӀЕРГЬАНАС – нужер умумуз иман лъурав Аллагьас – нужее кьолеб бугеб ракьалъе нужеца бетӀергьанлъи гьабизе букӀине. 2Дица нужеда лъазабурабщиналда тӀаде щибго жубаге, щибго тӀасаги бахъуге – дица нужеда малъарал БЕТӀЕРГЬАНАСУЛ амраби тӀуразаре.

3Нужерго беразда бихьана БЕТӀЕРГЬАНАС БагӀал-Пеоралда гьабураб жо: БЕТӀЕРГЬАН Аллагьас нужеда гьоркьоса тӀагӀинаруна киналго БагӀал-Пеорида нахъ рилълъанщинал чагӀи. 4Амма БЕТӀЕРГЬАН Аллагьасда божун чӀарал чагӀи жакъа къоялъги чӀаго руго.

5Гьале дица нужеда малъулел руго Аллагьасул къануналги хӀукмабиги, БЕТӀЕРГЬАН Аллагьас диде амру гьабураб къагӀидаялъ. Нуж унел ругеб ва нужеца мукӀур гьабизе бугеб ракьалда нужеца гьел тӀуразаризе ккола. 6РагӀа-ракьанде щун тӀуразаре гьел, цинги тӀолалго халкъазда бихьила нужер гӀакълуги лъайги. Гьел киналго къанунал рагӀидал гьез абила: „Унго гьаб кӀудияб халкъалъул бугеб гӀакъиллъиги цӀодорлъиги!“ – ян. 7ГьечӀелъул нилъеде гӀадин жидер аллагьзаби жидеде гӀагарлъараб цониги батӀияб кӀудияб халкъ! Нилъер БЕТӀЕРГЬАН Аллагь нилъеде гӀагарав вуго, кида щиб нилъеца гьараниги. 8Жакъа дица нужеда малъулел ругел гӀадинал ритӀухъал къануналги амрабиги жидер ругеб цоги батӀияб кӀудияб халкъ гьечӀелъул!

9Вореха, цӀодорго рукӀа, киданиги кӀочонге нужер беразда бихьараб – нужго чӀаго ругебгӀан мехалъ рекӀелъ цӀуне ва нужерго лъималаздаги гьезул лъималаздаги малъе гьеб. 10КӀочене тоге Хоривалда БЕТӀЕРГЬАН Аллагьасда цере нуж эхетун рукӀараб къоги ва Гьес диде гьабураб амруги: „Халкъ Дида цебе бакӀаре, Дица гьезда Дирго амраби рагӀизаризе. Биччанте гьаб дунялалъул рокъор ругебгӀан мехалъ, гьел ругьунлъизе Дикьа хӀинкъизеги Дун кӀодо гьавизеги; биччанте гьебго жо лъималаздаги малъизе“, – ян. 11Нуж гӀагарлъана зодобе гӀунтӀараб цӀаги рекӀараб, чӀегӀерал накӀкӀазги лахӀчӀегӀераб бецӀлъиялъги бахчараб мегӀералъул ахаде ва гьенир рахъун чӀана. 12Гьебмехалъ цӀадулъан БЕТӀЕРГЬАН кӀалъана нужеда. Нужеда рагӀулеб букӀана, амма сипат бихьулеб букӀинчӀо – гӀицӀго гьаракь рагӀун гурони. 13Ва Гьес нужеда Жиндирго КъотӀиялъул шартӀал лъазаруна – нужеца тӀубазабизе тӀадаблъун гьабураб АнцӀго амру. Гьес ганчӀил кӀиго къоноялда хъвана гьел амраби. 14БЕТӀЕРГЬАНАС дида тӀад къана нужеда Гьесул къануналги амрабиги малъеян, нуж унел ругеб ва нужеца кверде босизе бугеб ракьалда нужеца гьел тӀуразаризе рукӀине.

15Хорив магӀарда рукӀаго, цӀадулъан БЕТӀЕРГЬАН нужгун кӀалъараб къоялъ, нужеда кинабгӀаги сипат бихьичӀо. Гьединлъидал нужго цӀуне 16кинаб букӀаниги сипат-сураталда цебе тӀагӀат-гӀибадат гьабиялдаса: гьединаб къасдгун, я бихьинчиясул, яги чӀужугӀаданалъул, 17кинаб букӀаниги хӀайваналъул, яги зодил хӀинчӀалъул, 18ракьалдасан шурулеб яги лъадалъ лъедолеб рухӀчӀаголъиялъул сурат гьабуге. 19Мун зодиве валагьидал ва бакъги моцӀги, цӀвабиги, ай тӀолабго зобалазул аскар бихьидал, мунго къосун ккезе виччаге – гьезие тӀагӀат-гӀибадат гьабуге. Нужер БЕТӀЕРГЬАН Аллагьас кьун ругелъул гьел гьаб дунялалъул киналго халкъазе. 20Нужин абуни, Мисриялъул цӀадул кориниса нахъе рачана БЕТӀЕРГЬАНАС, Жиндирго халкълъун ва ирсилаллъун гьаризе. Гьедин ккезеги ккана.

21Амма нуж сабаблъун БЕТӀЕРГЬАНАСУЛ дида ццин бахъана ва Гьев гьедана дица Иордан гӀор бахинарин ва БЕТӀЕРГЬАН Аллагьас нужее ирслъун кьолеб бугеб гьайбатаб ракьалде дун лъугьине гьечӀин абун. 22Гьединлъидал дун, Иорданги бахинчӀого, гьаб ракьалдаго хвезе вуго. Нужеца абуни, гӀорги бахина ва доб гьайбатаб ракьги мукӀур гьабила. 23Амма цӀодорлъи гьабе, БЕТӀЕРГЬАН Аллагьасул къотӀи кӀочонге: кинаб батаниги сипат-сураталъул гьересиаллагь гьабуге. БЕТӀЕРГЬАН Аллагьас гьукъараб буго гьеб нужее. 24Нужер БЕТӀЕРГЬАН Аллагь вуго щибгоги кӀкӀвинабулеб цӀалъун! Гьев вуго хилиплъи хӀехьоларев Аллагь!

25Нуж доб ракьалде рахъаралдаса гӀемераб мех ина, нужее лъималги лъималазул лъималги гьарила, нужги херлъила. Амма хадубккун нужеца квешлъи гьабизе буго. Нужеца гьаризе руго батӀи-батӀиял сипатазул гьересиаллагьзаби ва, нужерго БЕТӀЕРГЬАН Аллагьасда рихаралщинал жалги гьарун, Гьесул ццин бахъинабизе буго. 26Гьединлъидал жакъа зобги ракьги нугӀзаллъун рукӀа абе дица бицунеб рагӀуе: гьедин гьабуни, нуж доб ракьалдаса хехго тӀагӀинаризе руго. Жакъа нужеца Иордан бахунеб буго доб ракь кверде босизе гӀоло, амма гьелдаса хадуб нужеца гьениб гӀемер мех базе гьечӀо, нуж тӀуран тӀагӀинаризе руго. 27БЕТӀЕРГЬАНАС нуж батӀи-батӀиял халкъазда гьоркьоре хъамила ва гьезул ракьазда БЕТӀЕРГЬАНАС нужер дагьал чагӀи гурони чӀаго теларо. 28Гьениб нужеца, цӀулги гамачӀги босун инсанасул квераз гьарурал, жидеда щибго рагӀуларел, бихьуларел, квен кваналарел яги махӀ чӀваларел гьересиаллагьзабазе гӀибадат гьабила. 29Хадуб нужерго БЕТӀЕРГЬАН Аллагьасде руссине бокьила нужее – Гьесги Живго загьир гьавизе вуго, тӀолабго рухӀги жанги кьун ракӀ-ракӀалъго нуж Гьесдехун руссани. 30Гьеб кинабго лъугьараб ва балагьазукье нужги ккараб заман бачӀиндал, нуж цӀидасан БЕТӀЕРГЬАН Аллагьасде руссина ва Гьесие мутӀигӀлъила. 31Нужер БЕТӀЕРГЬАН Аллагь рахӀмуяв вугелъул: Гьес нуж рехун теларо ва ракьалдаса тӀагӀинариларо, – нужер умумулгун гьабураб Жиндирго КъотӀиги гьедараб гьаги Гьесда кӀочон тезе гьечӀо.

БЕТӀЕРГЬАНАСУЛ кӀудиял ишал

32Араб заманалда цӀехе, мун ракьалда вижилалде цебего букӀаралъул хӀисаб гьабе! Гьаб ракьалда Аллагьас инсан вижараб къоялдаса нахъе гьадинаб хӀалкӀолъи букӀанищ гьаб дунялалда кибниги, цояб зоб-ракьалъул рагӀалдаса цогидаб рагӀалде щвезегӀан? Киданиги рагӀараб жо бугищ гьаб? 33Цоги батӀияб халкъ бугищ нужеда гӀадин цӀадулъан кӀалъалеб Аллагьасул гьаракьги рагӀараб, гьеб рагӀун хадуб чӀагоги хутӀараб? 34Цониги аллагь вукӀанищ цо халкъалъул зулмуялда гъоркь бугеб цогидаб халкъ Жиндиего бачине вачӀарав? Нужедаго бихьана Гьес риччарал кӀудиял балагьалги, Гьесул хӀикматалгун мугӀжизаталги, рагъги, Жиндирго кӀудияб къудраталдалъун Гьес гьарурал хӀинкъарал хӀалкӀолъабиги – гьеб кинабго гьабуна БЕТӀЕРГЬАН Аллагьас Мисриялда нужее гӀоло.

35Нужеда гьеб кинабго бихьизабуна БЕТӀЕРГЬАН Аллагь цохӀо вукӀин ва Гьев тун батӀияв цоги Аллагь гьечӀевлъи нужеда лъан букӀине. 36Гьес зобалаздаса Жиндирго гьаракь рагӀизабуна, нужее вагӀзалъун букӀине. ГӀодоб ракьалда Гьес Жиндирго гучаб цӀа бихьизабуна ва гьеб цӀадулъан нужеда кӀалъана. 37БЕТӀЕРГЬАНАСЕ рокьана нужер умумул, гьединлъидал Гьес нужги тӀаса рищана ва Мисриялдаса нахъе рачана. Гьес Жиндирго къуваталдалъун рачана нуж гьениса къватӀире, 38нужедаса гӀемерго къадар цӀикӀкӀарал ва къуватал халкъал нужер нухдасаги рацӀцӀунаго, гьезул ракьазде нужги рачун, гьел ракьал нужее ирслъун кьезе гӀоло (гьедин гьабулебги буго).

39Нужеда лъай ва кидаго рекӀелъ цӀуне: БЕТӀЕРГЬАН вуго зобалазулги ракьалъулги Аллагь – Гьев тун батӀияв цоги Аллагь гьечӀо! 40Жакъа дица нужеда малъарал Гьесул къануналги амрабиги тӀуразаре, БЕТӀЕРГЬАН Аллагьас абадиялъего нужее насиб гьабураб ракьалда нужееги нужер наслабазеги халатаб ва баракатаб гӀумру букӀине».

Лъутун шагьарал

(Тар. 35:6-34; Къан. 19:1-14; Егьош. 20:1-9)

41Иорданалъул бакъбаккул рахъалда лъабго шагьар батӀа гьабуна Мусаца, 42рекӀелъ ццинги гьечӀого, тохлъукье чи чӀварав инсан гьезул цоялде лъутизе ва гьелдалъун гьесул гӀумру цӀунун хутӀизе. 43Гьале гьел шагьарал: рувимилазе – мугӀрул тӀалъиялда бугеб Бецер; гадилазе – ГилгӀадалда бугеб Рамот; манассилазе – Башаналда бугеб Голан.

Къанун цӀали

44Гьале Мусаца ГӀизраилил халкъалъе цӀалараб Къанун. 45Гьал къануналги, амрабиги, хӀукмабиги кьуна Мусаца ГӀизраилил халкъалъе, гьез Мисри нахъа тараб мехалъ, 46Иорданалъул бакъбаккул рахъалда Бет-Пеоралда аскӀор, Хешбоналда тах лъурав амориязул пача Сихонил улкаялда рукӀаго.

(Мисриялдаса ун хадуб, Мусацаги гӀизраилазги бергьенлъи босана Сихонида тӀад 47ва гьесулги Башаналъул пача Огилги – кӀиявго амориязул пачаясул рукӀарал Иорданалъул бакъбаккул рахъалъул ракьал кверде росана. 48Арноналъул лъарамухъалда аскӀоб бугеб АрогӀералдаса бахъараб Сирион (Хермон) магӀарде щвезегӀан ругел ракьал ккола гьел. 49Гьединго гьезул кколаан, Арава ралъдахъе (ЦӀамул ралъдахъе) щвезегӀан ва гьенисаги ун Фасга мегӀералъул гъулдухъе щвезегӀан бугеб, Иордан гӀурул тӀолабго бакъбаккул рахъалъул рагӀаллъиги.)

Currently Selected:

Къанун 4: АварАК

Highlight

Copy