Даниял ЦеберагӀи
ЦеберагӀи
Даниял аварагасул тӀехьалда бицунеб буго гӀолохъанав ягьудияв Даниялил гӀумруялъул ва гьесие загьирлъарал хӀикмалъабазул хӀакъалъулъ.
Цебесеб эраялъул 605 соналъ цогидал ягьудиялгун цадахъ Вавилоналде асирлъуде ккана Даниял, Иерусалим щущахъ базабилалде къого соналъ цебе (Дан. 1:1-2). Аллагьасде иман лъеялъ, Даниял Вавилоналъул ва Персиялъул пачалихъазул идарабазда тӀадегӀанал хъулухъазде вахана (1:19; 2:48; 5:29; 6:1-3, 28). Аллагьас гьесие гъваридал балъголъаби тӀатинарулаан, букӀинесебги ахир заманалда ккезе бугебги загьир гьабулаан ва асирлъиялъул апараглъуда ругел гӀизраилазул ракӀ батизабулаан гьес (8:17; 10:14; 12:4).
Нилъер заманалде щвезегӀан цӀунун хутӀарал Персиялъул некӀсиял хъвай-хъвагӀаязда ратарал къо-моцӀазул баяназда рекъон, нилъеда дурусго чӀезабизе кӀола гьаб тӀехьалда жидер хӀакъалъулъ бицен гьабулел ругел лъугьа-бахъинал ккараб заман ва гьанжесеб календаралда данде кквезе кӀола гьезул къо-моцӀги соналги.
Даниял ккола Йирмиягь аварагасулги Езекиэл аварагасулги заманалъул чи. Цебесеб эраялъул 538 соналъ, жеги Даниял чӀаго вугеб заманалдаго, асирлъиялъул апараглъуда рукӀарал ягьудиязул тӀоцебесеб бутӀа ватӀаналде тӀад буссана.
Даниялица бана ункъого сон (1:21; 10:4).
ТӀехьалъул аслияб пикру буго тӀолабго дуниял Бичасул кверщаликь бугин ва Гьесул кверщеллъи тӀолалго халкъазда тӀад тӀибитӀараб бугин абураб (2:44; 4:31-32; 5:21). ТӀехьалъул тӀоцебесеб бутӀаялда (бетӀ. 1–6), Даниялги мисалалъе вачун, бицунеб буго мунагьазукь къараб дунялалдацин чиякъго хутӀарав инсанасда Бичасе гӀибадат гьабизе ва Гьесие мутӀигӀго чӀезе кӀвеялъул хӀакъалъулъ (2:47; 4:34). Гьединго тӀехьалда бицунеб буго Жиндирго халкъалдехун БетӀергьанасул бугеб ритӀухъаб бербалагьиялъул ва, балагьалъукье ккедал, Гьев гьезие хӀалае вахъунев вукӀиналъул хӀакъалъулъ (2:18-19; 3:28; 6:22).
ТӀехьалъул кӀиабилеб бутӀаялда (бетӀ. 7–12) гъорлъе уна Даниялие загьирлъарал гӀаламатал. Гьенир гӀемер ратула, доб заманалъул диниял тӀахьазе ва вагӀзабазе хасиятал, ахир заманалда хурхарал хӀикматиял сипат-суратал. Гьел гӀаламатаз ва хӀикматиял сипат-суратаз цебеккунго бицунеб буго Бичасул парччахӀлъиялда данде чӀаразе ахиралда букӀине бугеб жазаялъул, ва инсанияталъул тарихалда жаниб гьеб парччахӀлъи тӀадеялдаса тӀаде цебетӀолеб букӀиналъул хӀакъалъулъ.
ТӀехьалда буго
Даниял ва гьесул гьалмагъзаби Вавилоналда (1:1–6:28)
Даниял ва гьесул гьалмагъзаби пачаясул кӀалгӀаялда (1:1-21)
Даниялица Навуходоносорил макьу къотӀи (2:1-49)
Даниялил лъабавго гьалмагъ цӀадул коронире рехи (3:1-30)
Даниялица Навуходоносорил кӀиабилеб макьу къотӀи; гьеб макьу ритӀухълъи ва пачаяс тавбу гьаби (3:31–4:34)
Белшацарие Бичасул жаза (5:1-31)
Даниял гъалбацӀазул рукӀниве рехи (6:1-28)
Даниялие Бичасул балъголъаби загьирлъи (7:1–12:13)
Ункъо жанаваралъул хӀакъалъулъ макьу (7:1-28)
Куйдул ва дагӀнил сипатал цере тӀами ва гьелъул магӀна (8:1-27)
Даниялил дугӀа. Лъабкъоялда анцӀго анкьил магӀна (9:1-27)
ГӀизраилалъул букӀинеселда хурхун Даниялие рагьараб тӀарамагъадисеб балъголъи (10:1–12:13)
Currently Selected:
Даниял ЦеберагӀи: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023