Даниял 1
1
Даниял ва гьесул гьалмагъзаби Вавилоналъул кӀалгӀаялда
1Егьояким Ягьудиялъул пачалъун вахъун лъабабилеб соналъ#1:1 Цебесеб эраялъул 605 с., Вавилоналъул пача Навуходоносорица#1:1 Навуходоносор – гьев ккола Навуходоносор КӀиабилев, ЦӀияб Вавилоналъул империялъул бищун кутакав пача. Гьесул пачалъиялъул заман: цебесеб эраялъул 605-562 сс. Иерусалималде тӀаде гьужум гьабуна ва шагьар сверун ккуна. 2БетӀергьанас Ягьудиялъул пача Егьоякимги Аллагьасул Рукъалъул гӀемерисел тӀагӀелалги гьесул ихтияралде кьун тана. Навуходоносорица Шинар#1:2 Шинар – гьеб ккола Вавилон. улкаялде росун ана гьел тӀагӀелал ва жиндирго аллагьзабазул рокъор хазина цӀунулеб бакӀалда лъуна.
3Вавилоналъул пачаяс жиндирго чукъбузул бетӀер Ашпеназие буюрана пачабазул тухум-кьибилалъул ва чӀухӀби-хӀакимзабазул хъизаназда гьоркьоса чанго гӀизраилав тӀаса вищеян 4– щибгӀаги гӀузру гьечӀел, гьайбатаб сипаталъул, цӀали-хъваялъе ва гӀелмуялъе гьунар бугел, пачаясул кӀалгӀаялда хъулухъалъ рукӀине санагӀатал гӀадал. Гьезда вавилониязул мацӀ ва гьезул адабият малъеян лъазабуна. 5Пачаяс буюрана тӀаса рищарал гӀолилазе щибаб къоялъ жиндицаго кваналеб гӀадаб квен-тӀех ва тӀаса бищараб чагъир кьеян. Лъабго соналъ гӀелмуги малъун, хадур гьел жинда цере рачеян лъазабуна гьес.
6Гьезда гьоркьор рукӀана Даниял, Хананиягь, Мишаэл ва Азариягь – киналгоги Ягьудал къавмалъул васал. 7Ашпеназица цӀарал хисун, Даниялида – Белтешацар, Хананиягьида – Шадрах, Мишаэлида – Мешах, Азариягьида Авед-Него абун цӀарал лъуна.
8Амма Даниялица хӀукму гьабуна кинаб батаниги хъубаб кванда жиндица кӀал хъваларин#1:8 Пачаясул кванда кӀал хъваларин ва гьеб сабаблъун живго хъублъизе виччаларин Даниялица хӀукму гьабиялъе гӀилла букӀун батизе бегьула гьеб гьересиаллагьзабазе къурбан гьабураб квен букӀанин абураб. – я пачаясул квен кваналарин, я гьесул чагъир гьекъеларин. Цинги гьес Ашпеназида гьарана динияб къануналда рекъон жив хъублъизавулеб квен кваначӀого тезе изну кьеян. 9Аллагьас Ашпеназил рекӀелъ Даниялидехун гурхӀел-рахӀму батизабуна, 10ва гьес Даниялида абуна: «Дун дир бетӀерчӀахъаяв пачаясукьа хӀинкъула; гьес жиндицаголъидал бихьизабун бугеб нужеца кваназе кколебги гьекъезе кколебги. Цогидазда данде ккун, нуж хӀалакъго ругеблъи гьесда бихьани, щиб цинги гьабилеб? Нуж сабаблъун пачаяс дир бетӀер къотӀилагури!»
11Гьебмехалъ Ашпеназица Хананиягьил, Мишаэлил, Азариягьил ва жиндирго тӀалаб-агъаз гьабизе тарав чиясда кӀалъана Даниял:
12«Бегьулеб батани, нижер, дур лагъзадерил, хӀалбихьи гьабе: нижее цохӀо лъимги пастӀаналъул нигӀматги гурони кваназе кьоге анцӀго къоялъ. 13Хадуб нижер гьумер пачаясул квен-тӀех кваналел гӀолилазулалда данде ккве. Дудаго бичӀчӀила цинги дурго лагъзадерие щиб гьабизе кколебали».
14Ашпеназ гьелда разилъана, ва гьезул хӀалбихьи гьабиялъе анцӀго къо цӀана. 15АнцӀго къо ун хадуб, пачаясул квен кваналезулалдасаги гьезул гьурмал жанир цӀун берцинлъун ратана. 16Гьелдаса хадуб гьезие босун бачӀараб пачаясул квенги чагъирги нахъе босулаан гьев чияс, ва гьелъул бакӀалда гьезие пастӀаналъул нигӀмат кьолаан.
17Ункъавго васасе гъваридаб лъай-гӀакълуги, гӀелму босизе пагьмуги кьуна БетӀергьанас. Даниялие, гьелда тӀадеги, макьаби къотӀизе, балъголъаби рихьизе ва гьезул магӀна бичӀчӀизе рекӀел цӀодорлъиги кьуна.
18Пачаяс цӀараб заман рагӀалде щведал, Ашпеназица гьел Навуходоносорида цере рачана. 19Пача гьелгун гара-чӀварана ва гьесда бихьана киналго васазда гьоркьоб, гӀелму-лъаялъул рахъалъ, Даниялида, Хананиягьида, Мишаэлида ва Азариягьида бащадав щивго гьечӀолъи. Гьединлъидал, гьел тӀаса рищана пачаясул хъулухъалъе. 20Щибаб суалалда хурхунги, сундул хӀакъалъулъ пачаяс цӀеханиги, гьезул гӀакълу-лъай ва бичӀчӀи буголъи анцӀго нухалъ цӀикӀкӀараб букӀана пачалихъалда ругел тӀолалго балъголъи лъалел чагӀазда ва сихӀручагӀазда данде ккун.
21Ханасул кӀалгӀаялда хъулухъчилъун Даниял вукӀана Кир пачалъун вахъун тӀоцебесеб соналде щвезегӀан#1:21 Цебесеб эраялъул 538 с..
Currently Selected:
Даниял 1: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
