ГӀакъилал рагӀаби 31
31
БЕТӀЕР 31
Лемуэл парччахӀасе эбелалъ гьарурал насихӀатал
1Массаъ къавмалъул парччахӀ Лемуэлие
эбелалъ гьарурал насихӀатал руго гьал.
2Дуда щибдай, дир вас, дица малъила?
Щибдай малъила, дир чохьол вас?
Щибдай малъила, дир гьари-дугӀа къабуллъун гьавурав вас?
3Дурго рухӀ-жан руччабазул хъатикье кьоге,
парччахӀзабигицин паналъизарулел руччабаз дурго нухал къосинаризе риччаге.
4Чагъир парччахӀзабаз гьекъезе рекъараб жо гуро, Лемуэл,
чӀагӀаги къо-асс бугез гьекъезе рекъараб жо гуро.
5Мехтараб мехалъ гьезда закон кӀочон толеб,
къварилъиялда бугеб рагӀияталъе диван къотӀизеги гьезухъа бажарулареб.
6ЧӀагӀа дуца кье холев вугев чиясе,
чагъирги тӀе ракӀ къварид бугесе.
7Биччанте гьес гьекъезе ва мискинлъиги кӀочон тезе,
жинда бугеб къварилъиги ракӀалде щунгутӀизе.
8Дуца кӀал ричӀе кӀалъазе лъаларезул рахъ кквезе,
загӀипалщиназул ихтияралги цӀунизе.
9Дуца кӀал ричӀе битӀараб диван къотӀизе,
мискинасулги язихъасулги ихтиярал цӀунизе.
ГӀамал лъикӀай лъадул хӀакъалъулъ
10ГӀамал лъикӀай лъади киса щолей?
Маргъал-якъуталдасаги гӀемерго къиматай йикӀуна гьей.
11Росги гьелда тӀубанго божула,
зарал-зиянги гьесие букӀунаро.
12ТӀолабго гӀумруялъ гьелъ росасе лъикӀлъи гьабула,
квешлъи гьабуларо.
13Гьелъ квасги самула, лъолъол кунги гьабула,
кӀудияб гъира-цӀаялда квалквадизарула гьелъ кверал.
14Базаргабазул гамица гӀадин,
рикӀкӀадасаги бачӀинабула гьелъ хинкӀ-чед.
15Сардилъго тӀаде яхъун, рукъалъул агьлуялъе квен гьабула
ва гъаравашалги квалквадизе тӀамула.
16Хурухъ балагьизе ун, гьеб бичун босула гьелъ.
ХӀалтӀун щвараб гӀарцухъ цӀолбол ах гӀезабула.
17Гьелъ рачел щулаго къала,
кверазда къуватги буго.
18Жиндир даран-базаралда баркат лъун букӀинги лъала гьелда, –
гьелъул чирахъ сардилъги сунаро.
19Квас чӀвалеб гьоркьоялда квалквадулел рукӀуна гьелъул кверал,
гьелъул килщазукь кьурдулеб букӀуна мергу.
20Мискинасе хъат гӀатӀидай йикӀуна,
язихъасе квер гӀатӀидай йикӀуна.
21ГӀазу баниги, рукъалъул агьлуялъул ургъел гьелда чӀваларо, –
бицатаб ххамил ретӀел ретӀун букӀунелъулха киназго.
22Гьелъ жиндиего халичаби рессула,
гьелъул ретӀелги лъолъол ххамил ва хирияб ххамил букӀуна.
23Шагьаралъул кавабахъ машгьурлъун буго гьелъул росасул цӀар,
улкаялъулго чӀахӀиял гӀадамазда аскӀов гӀодов чӀола гьев.
24Ричизе хъабалаби рукъула гьелъ,
базаргабазе рачелалги гьарула.
25Чорхолъ къуват-жанги буго гьелъул,
гӀадамазда гьоркьоб къадру-къиматги буго.
Метерисеб къоялъул ургъелги гьечӀо гьелъие.
26ГӀакъилаб рагӀуе гурони кӀалги ричӀуларо,
гьелъул мацӀалдасан бачӀунеб малъа-хъвайги
гурхӀел-цӀобалъул цӀураб букӀуна.
27Жиндирго къавулъ лъугьунебщиналда хадуб букӀуна гьелъул бер,
хӀалтӀичӀого щвараб хинкӀ-чедги гьелъ кваналаро.
28Лъималаз гьей еццула,
росасги гьабула гьелъие рецц-бакъ:
29«Чанги лъикӀай лъади лъугьана гьаб ракьалда, –
гьел киназдасаго мун лъикӀай йиго!»
30Гьайбатлъи – рекӀкӀаб жо буго,
берцинлъиги тӀаса уна,
амма БетӀергьанасукьа хӀинкъулей чӀужугӀадамалъул цӀар тӀибитӀула.
31Жийго мустахӀикълъанщинабги щвезе ккола гьелъие,
шагьаралъул кавабахъ хабарги тӀибитӀизабизе ккола
гьелъул лъикӀал ишазул хӀакъалъулъ.
Currently Selected:
ГӀакъилал рагӀаби 31: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
