Даниял 9
9
Даниялил дугӀа
1Ахашверошил вас Дарий халдеязул пачалихъалда тӀад пачалъун вахъун тӀоцебесеб сон букӀана#9:1 Ц. э. 539 с. – гьев Мадаялдаса кколаан. 2Гьесул пачалъиялъул тӀоцебесеб соналъ дун, Даниял, Бичасул Калима цӀалулев вукӀана. Гьениб, Йирмиягь аварагасул тӀехьалда хъван батана, Йирмиягь аварагасухъе рещтӀараб БЕТӀЕРГЬАНАСУЛ рагӀуда рекъон, Иерусалим лъабкъоялда анцӀго соналъ чӀунтухъе хутӀизе бугилан. 3Гьебмехалъ дун кӀалги ккун, тӀад хӀебтил гӀабаги ретӀун, ботӀроде рахъуги бан, БетӀергьан Аллагьасде гьардана.
4Дица дирго БЕТӀЕРГЬАН Аллагьасде дугӀа гьабуна ва Гьесда цебе рекӀекълъи загьир гьабуна: „Вай дир БетӀергьан Аллагь, Гучав ва ХӀикматав, Мун хириязе ва Дур ахӀкамал тӀуразарулезе къотӀи цӀунулев!
5Нижеца мунагьал ва квешлъаби гьарун руго. Ниж мекъи хьвадана, Дуда данде питна гьабуна, Дур амрабазде ва къануназде нижеца мугъ рехана. 6Дур аварагзаби кӀалъана нижер пачабазда, хӀакимзабазда, умумузда ва нижер улкаялъул тӀолабго халкъалда Дур амруялдалъун, амма ниж гьезухъ гӀенеккичӀо.
7Мун ХӀакъав ва вацӀцӀадав вуго, нижецайин абуни: Ягьудиялъул тӀолабго халкъалъ, Иерусалималъул жамагӀаталъ, тӀолабго ГӀизраилалъ рогьо баччизе ккун буго. Киналго пачалихъазда – рикӀкӀада рукӀа, гӀагарда рукӀа, нижер мекълъаби сабаблъун Дуца щущазаруралщинал бакӀазда – инжитлъиялда руго ниж. 8Вай БЕТӀЕРГЬАН, нижецаго гьарурал мунагьал сабаблъун инжитлъиялда руго нижги, нижер пачазабигун чӀухӀби-хӀакимзабиги, нижер умумузул цӀаралги. 9Я БетӀергьан Аллагь, нижеца мунагьал гьаруна, амма Дур рахӀму гӀатӀидаб бугелъулха, Мун тӀаса лъугьине хӀадуравги вугелъул. 10Нижер БЕТӀЕРГЬАН Аллагьасухъ гӀин тӀамичӀо нижеца ва Дуца Дурго лагъзал аварагзабиги гьоркьор ккун кьурал къануналги гӀадахъ росичӀо. 11Дуца абуралъухъ гӀенеккизе бокьичӀого, тӀолабго ГӀизраилалъ Дур Къануналъул гӀорхъи бахун буго – гьелде мугъ рехун буго. Гьединлъидал, Бичасул лагъ Мусал Къануналда хъварал нагӀанаби рещтӀун руго нижеде – нижеца гӀорхъи тун мунагьал гьарун ругелъул Дуда данде.
12Нижер рахъалъ ва нижер пачазабигун чӀухӀби-хӀакимзабазул рахъалъ цебеккунго бицун букӀараб рагӀи тӀубазабуна Дуца гьанже. Дуца нижеда тӀаде гӀасияб балагь биччана. Дунялалъул цониги шагьаралъ хӀехьезе ккечӀо Иерусалималъ хӀехьараб гӀадинаб гӀазаб-гӀакъуба. 13Мусал Къануналда хъварабщиналда рекъон, нижеде тӀаде гьабгощинаб балагь рещтӀана, амма кинго ниж БЕТӀЕРГЬАНАСУЛ рахӀму-цӀобалде руссинчӀо, мунагьал рехун течӀо, тавбу гьабичӀо ва Дур хӀакъабщиналда тӀадги ургъичӀо. 14БЕТӀЕРГЬАНАС биччана гьаб тӀолабго балагь нижеда тӀаде, нижер БЕТӀЕРГЬАН Аллагь вацӀцӀадав ва ритӀухъав вугелъул, амма кинго нижеца Гьесухъ гӀинтӀамичӀо.
15Я БетӀергьан Аллагь! Дурго къуват-гучалдалъун, халкъаздаго гьоркьоб Дурго цӀарги машгьур гьабун, Мисриялдаса Дурго халкъ нахъе бачарав! Жакъа къоялъги кӀочон толаро гьеб! Нижин абуни, къосун ккана – мунагьал гьаруна. 16Вай БетӀергьан, гьарула Дуда, Дурго рахӀму-цӀобалдалъун Дурго шагьар Иерусалималдаса – Дурго Мукъадасаб мегӀералдаса – ццин нахъ буссинабе! Щайгурелъул, нижер мунагьал ва нижер умумузул такъсирал сабаблъун, Иерусалимги нижги – Дур хирияб халкъ – сверухъ ругел тӀолалго халкъазда рихун руго.
17Гьанже, нижер хирияв Аллагь, Дур лагъасул гьари-дугӀа къабул гьабе. Дурго цӀаралъе гӀоло, БетӀергьан, чӀунтун бугеб Дурго Мукъадасаб Рукъалъухъ гурхӀелгун валагье. 18ГӀенекке, дир хирияв Аллагь, ва къабул гьабе Дуца! Нижер шагьаралде бер щвезабе ва балагье гьеб щущахъ биххизабун бугеб куцалъухъ – жинда Дур цӀар чӀвараб шагьар! Нижеца гьарулеб буго Дуда, нижер ритӀухълъиялъе гӀоло гуреб, амма Дур гурхӀел-рахӀмуялъул гӀатӀилъиялъе гӀоло. 19БетӀергьан, нижер гьари къабул гьабе! БетӀергьан, тӀаса лъугьа! БетӀергьан, гӀенекке ва нижее хӀалае вахъа! Дурго цӀаралъе гӀоло, дир хирияв Аллагь, тӀокӀалъ нахъе тӀамун тоге. Дур цӀар чӀван бугелъул Дур шагьаралдаги Дур халкъалдаги“.
Лъабкъоялда анцӀго анкьсон ва гьелъул магӀна
20Хирияв БЕТӀЕРГЬАН Аллагьасде гьедин дугӀа гьабулев ва диргоги дир халкъ ГӀизраилалъулги мунагьазда тӀаса лъугьаян ва Гьесул Хирияб мегӀералде бер балагьеян гьарулев вукӀана дун. 21Дун жеги дугӀа гьабулев вукӀаго, дида цевеги вихьун вукӀарав ЖабрагӀил малаик вачӀана тохлъукьего, хьвагӀун куркьбалгун, дида аскӀове. Бакъаникъурбаналъул гӀуж#9:21 Бакъаникъурбаналъул гӀуж – гӀага-шагарго лъабго тӀубараб заман. букӀана гьеб. 22Гьес дие малъа-хъвай гьабуна ва абуна: „Даниял, дун вачӀана дуе гӀакълу-лъай ва бичӀчӀи кьезе.
23Дуца дугӀа гьабизе байбихьараб сагӀаталдаго, дур гьари къабуллъана ва жаваб босун вачӀана дун – мун кутакалда Аллагьасе хирияв вугелъул. Гьединлъидал, гӀенекке дихъ, Бичасул амру дудаго бичӀчӀизе букӀине:
24Лъабкъоялда анцӀго анкьсон#9:24 Лъабкъоялда анцӀго анкьсон – 490. цӀан буго дур халкъалъе ва хирияб шагьаралъе. Гьеб заман бихьизабун буго дур халкъалъул такъсиралъе ахир лъеялъе, мунагьал къотӀизариялъе, гӀайибалдаса рацӀцӀалъизариялъе, абадияб ритӀухълъи щулалъизабиялъе – аварагзабазе Бичас загьир гьабурабщинаб тӀубазабизе ва Бичасул Бищунго Мукъадасаб БакӀ бацӀцӀад гьабизе букӀине.
25Дуда бичӀчӀа ва лъай: Иерусалим цӀидасан байилан амру къватӀибе бачӀаралдаса нахъе МасихӀ вачӀиналде щвезегӀан анкьго анкьсон ине буго, хадуб гьелда тӀадеги лъабкъоялда кӀиго анкьсон ине буго. Гьеб заманалда шагьар цӀидасан базе буго: къватӀалгун, мажлисалъе халкъ бакӀаризе майданалгун, шагьар цӀунизе хандакъалгун. Амма гьеб захӀматаб заман букӀине буго. 26Лъабкъоялда кӀиго анкьсоналдасан МасихӀ чӀвазе вуго; кинацаго рехун тезе вуго Гьев. Хадув вахъине вугев пачаясул халкъалъ шагьарги Мукъадасаб БакӀги щущахъ базабизе буго#9:26 Нилъер эраялъул 70 соналъ, Иерусалим сверун ккун лъабго сон индал, румазул рагъул бетӀер Титица кверде босана гьеб. Гьес шагьаралда цӀа гъуна ва Мукъадасаб Рукъги тӀубан щущазабуна.. Щвараб гӀор гӀадин бачӀине буго гьелъул ахир, рагъги хараблъиги ракӀчӀун букӀине хъвараб жо буго. 27Гьес анкьго соналъул щулияб къотӀи гьабизе буго гӀемерал гӀадамалгун ва гьеб анкьсоналъул бащалъуда къурбаналги сайгъаталги къотӀизаризе руго; Мукъадасаб Рукъги хъублъизабун, гьенир цӀакъ къабихӀал ва чорокал ишал гьаризе руго. Бичас хӀарамзадае хъвараб ахир ва гьесие къотӀараб жаза гьесда тӀаде рещтӀинегӀан гьедин букӀине буго“».
Currently Selected:
Даниял 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
