Даниял 10

Тигр абураб гӀурул рагӀалда Даниялида бихьараб балъголъи

1Персиялъул пачалъун Кир вахъун лъабабилеб соналъ Даниялихъе (Белтешацарин жинда абулев) Бичасул калима рещтӀана. Гьеб калима хӀакъаб, кӀудияб рагъда хурхараб букӀана. ЦебечӀеялдалъун гьесие загьир гьабун хадуб бичӀчӀана Даниялида гьелъул магӀна.

2«Доб заманалда дун, Даниял, лъабго анкьгӀанасеб заманалъ кутакалда къварид вукӀана. 3Лъабго анкьалъул болжалалда дица я тӀагӀамаб квен кваначӀо, гьан, ялъуни чагъир кӀалдибе босичӀо, махӀ гьуинал нахалги рахинчӀо.

4ТӀоцебесеб моцӀрол къоло ункъабилеб къоялъ#10:4 Цебесеб эраялъул 536 соналъул 23 апрель., Тигр абулеб кӀудияб гӀурул рагӀалда вукӀаго, 5бетӀер тӀаде борхун валагьидал, дида бихьана: хӀебтил ретӀелги ретӀарав, бацӀцӀадаб меседил гьабураб рачелги къарав, цо щивалиго вуго эхетун. 6Гьесул черх – зубаржадалъул гӀадаб кунчӀараб, гьумер – пирхараб пири гӀадаб, берал – рекӀараб цӀа гӀадал, квералги бохдулги – цӀвакизабураб мазгаралда релълъарал, гьаракь – гӀемерал халхъазул хъуй гӀадаб букӀана.

7ГӀицӀго дида, Даниялида, гурони бихьичӀо гьеб. Дида аскӀор рукӀарал чагӀазда щибго бихьичӀо, амма гьезде гӀасияб хӀинкъи рещтӀана ва, жалго рахчизе бакӀал ралагьизе лъутана гьел. 8Дунин абуни, гьеб дида цебе чӀараб хӀикматаб жоялъухъ валагьун хутӀана. Гьебмехалъ дир чорхол рухӀ босун ана, гьурмал кьер тӀуна, ва дун тамахлъун ккана. 9Хадуб дида гьесул гьаракь рагӀана, ва, гьесухъ гӀенеккизе лъугьиндал, дун гӀакълу-лъаялдаса ун, кӀотун гӀодов ккана.

10Амма цо квер хъван бачӀана дида ва сородулев дун накабаздеги квераздеги вахъинавуна.

11Гьес абуна: „Даниял, кутакалда Аллагьасе хирияв, гӀенекке дир рагӀабазухъ. ТӀаде вахъа, гьабсагӀат дун духъе витӀун вачӀун вугелъул“.

Гьес гьедин абидал, дун тӀуртӀудилаго тӀаде вахъана.

12Цинги гьес абуна: „Даниял, мун хӀинкъуге. ТӀоцебесеб къоялъго, мутӀигӀго-хӀалимго Бичасда цеве вахъун, Гьесул гӀакълу лъазабизе мун лъугьараб къоялъго, дур гьари къабуллъана. Дур гьариялда рекъон вачӀана дунги.

13Амма Персиялъул бетӀер къоло цо къоялъ дида данде чӀана. Цинги бищун тӀадегӀаназул цояв МикагӀил малаик вачӀана дие хӀалае, Персиялъул пачазабигун дова дунго хутӀидал. 14Гьанже гьале дун вачӀун вуго дур халкъалъул букӀинесеб дуда бицине, щайгурелъул, дуда бихьараб жо букӀинеселда хурхараб буго“.

15Гьев гьедин кӀалъалев вукӀаго, гӀодобе балагьараб гьумер тӀаде борхизе кӀвечӀо дида ва цо рагӀицин абун бажаричӀо. 16Цинги, инсанасул сипаталда дида цеве чӀарав гьев дир кӀутӀбузда хъвана, гьебмехалъ дун кӀалги рагьун кӀалъазе лъугьана. Дида цеве чӀарасда дица абуна: „Дир бетӀергьан, дие загьирлъараб цо балъголъиялъ дир кутакалда ракӀбакъвазабун буго, гьелъ дир чорхолъ къуватги хутӀун гьечӀо.

17Кин дун, дур лагъ, дуда кӀалъалев, дир бетӀергьан? ГьечӀо рухӀ-хӀал, хӀухьелцин хӀалица цӀалеб буго“.

18Инсанасда релълъарав цоги нухалъ дида хъвана ва дир чорхолъе къуват бачӀинабуна.

19„Аллагьасе кутакалда хирияв, мун хӀинкъуге, – ян абуна гьес. – Салам дуе! КъвакӀун вукӀа! КъвакӀун вукӀа!“

Гьедин гьес абулелъул, диде къуват бачӀана, ва дица абуна: „Дир бетӀергьан, кӀалъай гьанже, дуца диде къуват бачӀинабун бугелъул“.

20Цинги гьес абуна: „Дуда лъалищ щай дун духъе вачӀаравали? КватӀичӀого дун Персиялъул бетӀергун вагъизе тӀадвуссине ккола. Дица гьесда тӀад бергьенлъи босарабго Грециялъул бетӀер вачӀине вуго.

21Амма цин дица дуда бицина ХӀакъаб ТӀехьалда хъвараб. (Дие хӀалае щивго вачӀунев гьечӀо, цохӀо нуж цӀунизе чӀарав МикагӀил малаик гурони.

Currently Selected:

Даниял 10: АварАК

Highlight

Copy