2 Пачаби 20
20
Шевал питна
1Гьезда гьоркьов вукӀана Шева абун цӀар бугев цо хӀалихьатав чи, буняминияв Бихрил вас. Гьес суралъубеги пун ахӀана:
«Давудилъ нилъее бутӀа гьечӀо!
Йишайил васасдаса кинабгӀаги ирс гьечӀо!
ГӀизраилил халкъ, бусса жинди-жиндир къавулъе!»
2Гьебмехалъ тӀолалго гӀизраилал, Давудиде мугъги рехун, Бихрил вас Шевада хадур ана. Ягьудиял абуни, Давудил рахъ ккун чӀана ва Иорданалдаса рахъарал Иерусалималде щвезегӀан гьесда цадахъ рилълъана.
3Иерусалималде жиндирго кӀалгӀаялде тӀадвуссиндал, кӀалгӀаялда тун йикӀарай анцӀайго гъараваш-лъади Давудица цоги минаялъуре рахъинаруна ва гьенир хъаравулзабиги тана. Гьес гьезие къваригӀараб-тараб чӀезабулаан, амма тӀокӀалъ гьев гьезда аскӀове инчӀо. ГӀумруялъул къоял лъугӀизегӀан къоролзаби гӀадин гьеб минаялъур жанир рукӀана гьел.
4Пачаяс Амасада абуна: «Лъабго къоялда жанир дихъе ягьудиял ракӀаре ва мунгоги вачӀа гьаниве».
5Амаса ягьудиял данде ракӀаризе нухде вахъана, амма пачаяс цӀараб гӀужалде щвечӀо, цодагьав кватӀун ккана.
6Цинги Давудица Авишайида абуна: «Гьанже Бихрил вас Шеваца Авессаломица бачаралдасаги цӀикӀкӀун балагь бачуна нилъеда тӀаде. Дир чагӀиги рачун, гьесда хадув лъугьа; сверун къарал шагьарал гьесул кверщаликье ккани, гьес нилъер бер бахъула».
7Авишайил нухмалъиялда гъоркь Иоавил чагӀиги, керетиялги, пелетиялги ва цоги лебалал рагъухъабиги цадахъ нухде рахъана. Гьел Иерусалималдаса къватӀире рахъана Бихрил вас Шева кквезе. 8Гаваоналде кӀудияб ганчӀида аскӀоре щведал, гьезда Амаса данде ккана. Иоавида тӀад рагъул ретӀел букӀана ва ханжарги бараб рачел къан букӀана ратӀлида тӀасан. Цебе гали тӀамулелъул, гьес ханжар лъалинисан чучана.
9Иоавица Амасада цӀехана: «Сах-саламат вугищ мун, дир вац?» – ин. Цинги гьесда убач гьабизе Иоавица кваранаб квералъ гьесул мегеж ккуна.
10Амасада бихьичӀо гьесул квегӀаб хъатикь ханжар букӀин. Иоавица Амасал чохьолъ къазабураб хонжроца гьесул бакь-чехь къватӀибе базабуна, ва гьев гьеб бакӀалдаго хвана. КӀиабилеб нухалъ гьес ханжар борхизе ккечӀо. Цинги Иоавги гьесул вац Авишайги Бихрил вас Шевада хадур лъугьана.
11Амасада аскӀов вахъунги чӀун Иоавил чагӀазул цояс ахӀун абуна: «Виччанте Иоавие ритӀухъавщинав ва Давудил рахъ ккуравщинав чи Иоавида хадув ине!» – ян.
12Амасал жаназа бидул хӀориниб нух бакьулъе рехун букӀана, ва гьев чиясда бихьана киналго рагъухъаби гьенир лъалхъулел рукӀин. Уне-уневщинав гьенив вахъун чӀолев вукӀин бихьидал, гьес гьеб жаназа гьениса нахъе бехъерхъун, авлахъалде щвезабуна ва гьелда тӀаде гӀабаги рехана. 13Амасал жаназа нухдаса нахъе босидал, тӀолабго халкъ Иоавида хадуб билълъана Бихрил вас Шева кверде восизе.
14Шевацайин абуни, Авел-Бет-Маахаялде щвезегӀан ГӀизраилалъул киналго агьлаби сверана; тӀолалго гьесул рахъ ккуралщинал гьесда сверухъ ракӀарана ва гьесда хадур шагьаралде жанире лъугьана. 15Иоавил аскарияз Авел-Бет-Мааха шагьар сверун ккуна. Гьез хӀатӀги гамачӀги баччун нух бана шагьаралъул къедалъул кьочӀокье рахине#20:15 Доб заманалда шагьар гохӀккараб бакӀалда балаан. Шагьар сверун ккураз шагьаралъул къадакье ганчӀилгун хӀатӀалъул гьабураб нух лъолаан, гьакибурдузда тӀад лъураб кӀудияб хӀосги тунк-тункизабун, гьеб къед борлъизелъун.. Къед борлъизе лъугьиндал, 16шагьаралъул къадада тӀасан яккун цо гӀакъилай гӀаданалъ ахӀана:
«Дихъ гӀенекке! Цо дихъ гӀенеккея! Иоавида абе гьаниве вачӀаян, гьесда бицине цо хабар буго дир», – ин.
17Гьев аскӀове вачӀиндал, гьелъ гьесда цӀехана: «Мунищ Иоав?»
Дун вугилан жаваб кьуна гьес.
18Цинги гьелъ абуна: «Авелалде ун гьениб цӀехеян абулеб гӀадат букӀана цебе заманалдасаго ва гьедин хӀукму къотӀулаан бокьараб дагӀба-рагӀиялъе. 19Ниж руго ГӀизраилалда жаниб рекъел ва ритӀухълъи цӀунарал гӀадамал. Мунин абуни, гьадинаб кӀудияб шагьар ва шагьаразулги эбел тӀагӀинабизе къеркьолев вуго. Щай дуе БЕТӀЕРГЬАНАСУЛ шагьар щущахъ базабизе бокьун бугеб?»
20Иоавица абуна: «Воре цӀунаги дун гьединаб жо гьабиялдаса! Щущахъ базабиларо, я щибго зарал гьабиларо шагьаралъе! 21Иш гьедин гуро бугеб. Ефраимил тӀалъиялдаса Шевайин цӀар бугев Бихрил васас Давуд пачаясде квер борхун буго. Гьев нижехъе кверде кье, цинги ниж нахъе ина».
Гьей гӀадамалъ Иоавида абуна: «Нижеца духъе гьаб къададаса гъоркье рехила гьесул бетӀер», – ин.
22Жиндирго гӀакъилаб рагӀигун тӀолабго халкъалъухъе ана гьей гӀадан, ва Бихрил вас Шевал бетӀер къотӀун, къададаса гӀодобе Иоавихъе рехана. Гьебмехалъ Иоавица суралъубе пуна, рагъухъаби гьеб шагьарги жибго тун рокъо-рокъоре руссана. Иоавги Иерусалималде пачаясухъе тӀадвуссана.
Давудил тӀадчагӀи
23Иоав вукӀана ГӀизраилалъул тӀолабго аскаралъул бетӀерлъун; ЕгьоядагӀил вас Бенаягь – керетиязул ва пелетиязул бетӀерлъун. 24Адорам – лагъзаллъун гьарун цере хӀалтӀизарулел чагӀазул бетӀерлъун; АхӀилудил вас Егьошафат – тарихчилъун; 25Шева – хъвадарухъанлъун; Цадок ва Авиатар – кашишзабилъун. 26Яиралдаса Ираги вукӀана Давудил кашишлъун.
Currently Selected:
2 Пачаби 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
