2 Пачаби 21
21
Шаулил наслуялъе гьабураб жаза
1Давудил пачалъиялъул заманалда лъабго соналъул ракъи ккана. Цинги Давуд БЕТӀЕРГЬАНАСДЕ гьардана Гьесул амру цӀехон. БЕТӀЕРГЬАНАС Давудие жаваб гьабуна:
«Шаулги досул наслуги сабаблъун ккараб ракъи буго гьеб – дос гаваониял#21:1 Ханаан кверде босулаго гӀизраилаз гаваониялгун ракълилаб къотӀи-къай гьабун букӀана (бал. Егьош. 9:3-27). чӀваралъухъ». 2Гьебмехалъ пачаяс гаваониял жиндихъего ахӀана ва гьев гьезда кӀалъана. (Гаваониял ГӀизраилалъул халкълъун кколароан. Гьел рукӀана амориязул хутӀарал чагӀи. ГӀизраилал гьедун рукӀана гьезие зарал гьабиларин, амма Шаулие бокьун букӀана гьел гъурун лъугӀизаризе – гӀизраилаздаса ва ягьудияздаса гьоркьоса тӀагӀинаризе.)
3Давудица гаваониязда цӀехана: «Дица щиб нужее гьабун лъикӀ? Кин бецӀилеб нужее гьабураб зарал, нижедаса тӀаса лъугьун, нуж нижедехун, БЕТӀЕРГЬАНАСУЛ халкъалдехун, ракӀ битӀун рукӀине?»
4Гаваонияз гьадинаб жаваб кьуна: «Нижее Шаулил гӀагарлъиялдаса я гӀарац, я месед хӀажат гьечӀо ва гӀизраилазул цониги чиги чӀвазе гьечӀо», – ян.
«Дица щиб гьабизеха нужее бокьун бугеб?» – ин цӀехана Давудица.
5Гьез абуна: «Нижеда данде чӀун, ниж гъуризе ва ГӀизраилалъул ракьалдасаго ниж тӀагӀинаризе бокьун букӀарав чиясул бицани, 6гьесул наслуялъул анкьго бихьинчи кье абе нижехъе кверде, БЕТӀЕРГЬАНАС тӀаса вищарав Шаулил шагьар Гивеаялда гъотӀодаги ран, БЕТӀЕРГЬАНАСДА цере нижеца гъанкъизе рукӀине», – ян.
Пачаяс абуна: «Дица кьела гьел нужер кверде», – ян.
7Амма, Шаулил васасул (Ионатанил) вас Мефи-Бошетида пача гурхӀана, Давудицаги Шаулил вас Ионатаницаги жидедаго гьоркьоб БЕТӀЕРГЬАНАСУЛ цӀарги бахъун къотӀи-къай гьабун букӀиндал. 8Шаулие Аягьица гьаюн йикӀана Рицпа абурай яс. Пачаяс гьелъул васал Армонги, Мефибошетги рачана. Шаулил яс Меравица Мехолаялдаса Барзиллайил вас Адриэлие гьавурав щуго васги вачана гьес. 9Цинги гьел гаваониязул кверде кьуна ва гаваонияз БЕТӀЕРГЬАНАСДА цере мугӀрул борхалъиялда гъанкъизе рана. Гьеб бакӀалда анкьазего цадахъ гӀажал щвана. ТӀорщел бакӀарулеб заманалъул авалалда, пурчӀина бакӀариялъул байбихьуда#21:9 Их бащалъуде щвараб заман. хвана гьел.
10Цинги Аягьил яс Рицпаца кьурулъ, хӀебетги гӀодоб тӀамун, жиндиего бакӀ гьабуна. ТӀорщел бакӀариялъул авалалдаса бахъараб цӀадал ралеб гӀуж#21:10 Октябрь моцӀалда байбихьулаан цӀадал разе. тӀаде щвезегӀан гьений чӀун, къад зобалазул хӀанчӀи хъвазе течӀо гьелъ гьезул жаназабазда, къаси гӀалхул жанаварал аскӀоре къазе риччачӀо. 11Шаулил гъаравашалъул яс Рицпаца гьабураб жо Давудида рагӀидал, 12гьес, инеги ун, Шаулил ва Ионатанил рукьби ГилгӀадалъул Иавешалъул жамагӀаталъухъа нахъе росана. (Гьез къаси балъго ун Бет-Шеаналъул майданалдаса нахъе росун рукӀана гьел – пилистимаз Гилбоаялда Шаул чӀван хадуб гьезул жаназаби гьенир ран рукӀиндал.) 13Давудица Шаулилги Ионатанилги рукьби гьениса нахъе росана ва гъотӀода ран рукӀарал гӀолохъабазул рукьбиги данде ракӀарана.
14Шаулилги гьесул вас Ионатанилги рукьби Буняминил ракьалда Целаялда Шаулил эмен Кишил хабалъ рукъана, ва хутӀарабщинабги пачаясул амруялда рекъон тӀубазабуна. Гьебмехалъ Аллагьас гьезул гьари къабул гьабуна ва гьезул ракьалда цӀоб лъуна.
Пилистимазулгун рагъал
15Пилистимаздаги ГӀизраилалдаги гьоркьоб нахъеги рагъ ккана. Жиндирго рагъухъабигун Давуд рагъде вахъана; пилистималгун рагъул кор боркьана, амма Давуд кутакалда свакана. 16Ишбо-Бенов абурав рафаязул#21:16 Рафаял рукӀана кьуру гӀадал рорхатал, залимал гӀадамал. цо чияс Давуд чӀвазе къасд гьабуна. Гьесул мазгарул хочол мацӀалъул цӀайи лъабнусго шекел#21:16 300 шекел – гӀага-шагарго 3,5 кило. букӀана ва цӀияб хвалченги бан букӀана рачлида. 17Амма Церуягьил вас Авишай вортана Давудие кумекалъе ва гьес тӀадги речӀчӀун чӀвана гьев пилистимав. Гьебмехалъ Давудил чагӀаз, гьаги гьедун, гьесда абуна:
«ГӀизраилалъул чирахъ свинчӀого букӀине, мун тӀокӀалъ кидаго нижеда цадахъ вагъизе вахъине бегьуларо».
18Цодагьаб заман ун хадуб Говалда пилистимазулгун цӀияб рагъ ккана. Гьенив Хушалдаса Сиббехайица чӀвана рафаязул наслуялъул чи Саф.
19Гьелдаса хадуб цоги нухалъ ккана Говалда пилистимазулгун рагъ. Гьеб рагъулъ Бет-Лехемалдаса Яъре-Орегимил вас Элхананица чӀвана рессарухъабазул гӀурул чарх гӀадаб кӀудияб хечалъул хважаин Гаталдаса Голиафил вац.
20Гьелдаса хадуб Гаталдаги рагъ ккана. Гьенив вукӀана цо залим; гьесул кверазда ва хӀатӀазда анлъ-анлъ килищ букӀана – кинабниги къоло ункъо. Гьевги вукӀана рафаязул наслуялъул чи. 21ГӀизраил халкъ инжит гьабун кӀалъалев вукӀаго, Давудил вац Шимагьил вас Ионатаница чӀвана гьев.
22Гьел ункъалго рукӀана Гаталда гьарурал рафаязул наслуялъул чагӀи ва Давудилги гьесул чагӀазулги квердасан хвана гьел.
Currently Selected:
2 Пачаби 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
