YouVersion Logo
Search Icon

2 Пачаби 19

19
Иоавица Давудида кӀалгьикъи
1Пача кӀудияб рухӀалилъ Авессаломида хадув гӀодулев вугин бицана Иоавида.
2Пача жиндирго васасда хадув гӀодулев вугин рагӀидал, тӀолабго халкъалъе гьеб къоялъул бергьенлъи къварилъиялде сверана. 3Рагъдаса лъутун жинцаго жалго суризарурал, рахчун-кьерун унел чагӀи гӀадин лъугьана гьел шагьаралде жанире. 4Пачаяс гьурмада квералги чӀван, биччан гьаракьгун ахӀулеб букӀана:
«Вай дир вас Авессалом! Вай, Авессалом, дир вас, дир вас!»
5Пачаясул рокъове гьесда аскӀовеги вачӀун, Иоавица абуна:
«Жакъа дурги, дурго васал-ясазулги, лъудби-гъаравашазулги гӀумру хвасар гьабурал дурго рагъухъаби нечезарурел руго дуца. 6Мун рихарал рокьулел руго дуе, мун хиралъарал рихунел руго дуда. Жакъа дуца бихьизабулеб буго дурго рагъул церехъабиги хъулухъчагӀиги дуе щалго гурел чагӀилъун рукӀин. Авессаломги чӀаго хутӀун ниж киналгоги хун рукӀаралани, мун разилъизехъин вукӀун вугогури. 7КъватӀиве вахъун гьанже дурго гӀадамазул ракӀ батизабе. БЕТӀЕРГЬАНАСУЛ цӀаралхӀа, гьанже мун къватӀиве вахъинчӀони, сордо тӀаде щвелалде цо чи хутӀизе гьечӀо дуда аскӀов. Цинги, гьитӀинаб къоялдаса бахъараб жакъа къоялде щвезегӀан, дуда рихьарал киналго балагьаздасаги захӀматаб букӀина дуе гьеб».
8Гьебмехалда тӀадеги вахъун шагьаралъул кавабахъ гӀодов чӀана пача. Пача кавабахъ вугин рагӀидал, киналго рагъухъаби рачӀана гьесда цере.
Давуд Иерусалималде тӀадвусси
ТӀолалго гӀизраилаз лъутун жиде-жидер рокъобе нух босана. 9Цинги ГӀизраилалъул киналго агьлаби цоцалъ къацандизе лъугьана:
«Пачаяс нилъ нилъер киналго тушбабаздаса хвасар гьаруна. Пачаясин пилистимазул квердасаги нилъ эркен гьарурал. Гьанже Авессалом сабаблъун нилъер ракьалдаса лъутизе ккана дов. 10Нилъеца нилъедаго тӀад пачалъун тарав Авессаломин абуни, рагъда чӀван вуго. Щайха цинги лъицаниги пача тӀадвуссинавиялъул тӀалаб гьабулареб?»
11Давуд пачаяс кашишзаби Цадокихъеги Авиатарихъеги чагӀи ритӀана гьадинаб тӀадкъайгун:
«Ягьудиялъул чӀахӀиял чагӀазда кӀалъай: „Хан жиндирго кӀалгӀаялде тӀадвуссинавулезда гьоркьор ахириселлъун рукӀун щай нужее? ТӀолалго гӀизраилаз бицунеб хабарги пачаясухъе щун бугин. 12Нужлъидал дир гӀагарлъиги дир вацалги кколел. Щайха цинги пача тӀадвуссинави тӀалаб гьабулелъул нуж нахъе ккезе чӀолел?“ 13Амасадаги абе: „Мун дир цебесеб гӀагарлъиялъул чи гурищ кколев? Аллагьас балагьалъукье ккезавеги дун, гьаб жакъа къоялдаса нахъе Иоавил бакӀалда дица мун дирго аскаралъул бетӀерлъун течӀони“, – ян».
14Гьедин Давудица тӀолалго ягьудиязул ракӀал жиндехунго цӀазаруна.
Цинги ягьудияз пачаясухъе ругьел битӀана: «Дурго чагӀигун цадахъ тӀадвусса нижехъе», – ян.
15Пача нухде вахъана ва Иордан гӀурухъе щвана. Ягьудиял пачаясда дандчӀвазе ва гьесие Иордан гӀор бахине кумек гьабизе Гилгалалде рачӀана.
Давудил рахӀму
16Ягьудиялгун цадахъ Бахурималдаса буняминияв Герал вас ШимгӀиги гӀедегӀана Давудида данде. 17Гьесда цадахъ вукӀана азарго буняминиявги, цадахъ жиндирго анцӀила щуго васгун ва къого цеветелгун, Шаулил рукъалъул хъулухъчи Циваги. Гьел пачаясда данде Иордан гӀурухъе гӀедегӀана. 18Пачаясе ва гьесул тӀолабго хъизан-къаялъе гӀор бахине кумек гьабизелъун ва цоги гьесие къваригӀарабщинаб тӀубазабизелъун гьел гӀурул доб рахъалде рахана.
ГӀурул доб рахъалде щведал, ШимгӀи пачаясда цеве накабазде ккана, 19ва гьес абуна: «Дир бетӀерчӀахъаяв пача тӀаса лъугьа абе дир такъсиралда. КӀочон тезе биччай дир бетӀергьан пачаяс Иерусалим тараб къоялъ дица гьабураб квешлъи. Пачаяс ракӀалдего щвезабуге абе гьеб. 20Дида, дур лагъасда, лъалелъул дица такъсир гьабун букӀин. Амма жакъа тӀолабго Юсупил агьлуялъул чагӀазда гьоркьов дун бищун цеве гӀедегӀана дуда, дир бетӀерчӀахъаяв пачаясда, данде».
21Церуягьил вас Авишайица абуна: «БЕТӀЕРГЬАНАС тӀаса вищарав пачаясде рогьо барав ШимгӀи чӀвачӀого тезе бегьулевдай?!» – ин.
22Давудица абуна: «Церуягьил васал, диеги нужееги гьелъул милат гьабун щай гьанже? Нуж дида данде чӀарал чагӀи гӀадин рукӀунге. ГӀизраилазул цониги чи чӀвазе бегьилищ гьадинаб къоялъ – дун ракӀчӀун ГӀизраилалъул пача вукӀин дида лъараб къоялъ?»
23Цинги пачаяс гьедун ШимгӀида абуна: «Мун хвезе гьечӀо», – ян. 24Шаулил васасул вас Мефи-Бошетги вачӀана пачаясда данде. Пача лъутараб къоялдаса нахъе, гьев сах-саламат тӀадвуссинегӀан, Мефи-Бошетица я хӀатӀал чуричӀо, я мегеж кӀкӀвачӀо, я тӀад букӀараб ретӀел хисичӀо. 25Иерусалималдаса пачаясда дандчӀвазе гьев вачӀиндал, пачаяс гьесда цӀехана:
«Мефи-Бошет, мун щай дида цадахъ вилълъинчӀев?»
26Гьес жаваб кьуна:
«Вай дир бетӀерчӀахъаяв пача, дир хӀалтӀухъанас хиянатлъи гьабуна дие! Дица абуна: „Дир хӀама кьолой, дун гьелдаги рекӀун пачаясда цадахъ ине вукӀине“, – ян, – дур лагъ рекъав вугелъулха. 27Амма дир хъулухъчи дида, дур лагъасда, бугьтаналги лъун кӀалъан вуго дир бетӀерчӀахъаяв пачаясда. Дир бетӀерчӀахъаяв пача вуго Бичасул малаик гӀадав чи; гьединлъидал, гьанже дуца дуего бокьухъе гьабе. 28Дир кӀудияв инсул наслу пачаясдаса гӀажал босизе гуреб, тӀокӀаб сундуего мустахӀикъаб букӀинчӀониги, дуца дун, дур лагъ, дургун квен гӀахьал гьабулезда гьоркьове вачана. Гьанже дуде гӀарз бахъизе дир кинаб ихтияр бугеб?»
29Пачаяс гьесда абуна: «ГӀела гьанже, тӀокӀаб бицине ккеларо гьелъул. Гьале дир хӀукму: дурго ракь дудаги Цивадаги гьоркьоб бащад бикье».
30Мефи-Бошетица абуна: «Гьанже дир бетӀерчӀахъаяв пача сах-саламат кӀалгӀаялде тӀадвуссун вугелъул, гьес кинабго жиндиего таниги, дие ургъел гьечӀо», – ян.
Давудица Барзиллайгун къо-лъикӀ гьаби
31Рогелималдаса гилгӀадияв Барзиллайги вачӀана пачагун цадахъ Иордан гӀор бахине ва гьенисан пача нухда регӀизе. 32Барзиллай вукӀана херав чи – ункъого сон бан букӀана гьес. Гьев кутакалда бечедав чи вукӀана, ва пача Маханаималда вугебгӀан мехалда, гьес пачаясе къваригӀарабщинаб чӀезабуна.
33Пачаяс Барзиллайида абуна: «Дида цадахъ вилълъа Иерусалималда чӀел гьабизе. Дицаги дуе щиб бокьаниги чӀезабила гьениб», – ин.
34Барзиллайица пачаясда абуна:
«Жеги чан сон дица базе бугеб гьаб дунялалда, пачаясда цадахъ Иерусалималде дун гочине ккани? 35ГьабсагӀат дир ункъого сон буго. ЛъикӀаб-квешаб батӀа бахъизе бажариладай гьанже дида? Кваналеб ва гьекъолеб жоялъул тӀагӀам лъалебдай? КочӀохъабазул гьаракь гӀундузда рагӀилебдай? БетӀерчӀахъаяв дир пачаясе гьирлъун лъугьун вукӀине щай дие, дур лагъасе? 36Дун, дур лагъ, Иордан тун довехун цодагьаб нухалъ вилълъина, амма пачаясдаса гьединаб тӀадегӀанаб шапакъат щайгурин дие. 37Дун рокъове тӀадвуссине виччай, дирго гӀагараб шагьаралда, эбел-эмен вукъараб ракьалда хвезе вукӀине. Амма гьале дур лагъ (дир вас) Кимхам. Гьев ине виччай дир бетӀерчӀахъаяв пачаясда цадахъ. Дудаго берцин бихьараб гьабе гьесие».
38Пачаяс абуна: «Дида цадахъ гӀор бахина Кимхамица ва дур ракӀ рекъанщинаб гьабила дица гьесие. Дуе щиб бокьаниги, гьеб гьабизе къачӀарав вуго дун».
39ТӀолабго халкъалъ Иордан гӀор бахана, ахиралда пачаясги бахана. Пачаяс, Барзиллайие баркалагун гьара-рахьиги гьабун, гьесулгун къо-лъикӀ гьабуна, цинги гьев рокъове тӀадвуссана.
40Кимхам Пачаясда цадахъ Гилгалалде вилълъана. Ягьудиялъул тӀолалго рагъухъабиги ГӀизраилалъул бащдаб аскарги гьесда цадахъ къокъана.
ГӀизраилазулги ягьудиязулги кьал
41ГӀизраилал рачӀана пачаясухъе гӀарзгун ва гьез пачаясда абуна: «Щай нижер вацал ягьудияз пача жидеего вахъарав ва, нижедаса балъго, пачаясдаги гьесул тӀолалго чагӀаздаги Иордан гӀор бахинабураб?»
42ТӀолалго ягьудиял цадахъ рекъон гьез гӀизраилазда абуна: «Нижеца гьеб гьедин гьабуна гьев нижее гӀагарав вукӀун. Щай нужер ццин бахъунеб? Пачаясул квенищ кванан бугеб нижеца, ялъуни гьесухъа сайгъаталищ росун ругел?»
43ГӀизраилаз ягьудиязда абуна: «Нижер анцӀго бутӀа буго Давудилъ, гьединлъидал нижер нужедаса цӀикӀкӀун ихтиярал руго. Щайха цинги нужеца ниж малъикъ гьаруларел? Пача тӀадвуссинавизе кколин тӀоцебе нижеца гуребищ абураб?»
Амма гӀизраилазулалдаса ягьудиязул кӀалъай хъачӀаб-кьварараб букӀана.

Highlight

Share

Copy

None

Want to have your highlights saved across all your devices? Sign up or sign in