2 Пачаби 18
18
Давуд рагъде хӀадурлъи
1Давудица жиндирго аскаралъул хал-шал гьабуна ва гьезда тӀад азарилбутӀрулги нусилбутӀрулги лъуна. 2Гьес жиндирго аскар лъабиде бикьана: цо къокъаялъул цевехъанлъун Иоав, кӀиабилеб къокъаялъул – Церуягьил вас, Иоавил вац Авишай, лъабабилеб къокъаялъул – Гаталдаса Иттай тана.
Пачаяс рагъухъабазда абуна: «Гьайгьай дунгоги вилълъина нужеда цадахъ», – ин.
3Амма халкъалъ абуна: «Мун вилълъине бегьуларо! Щайгурелъул, ниж лъутизе ккани, гьеб кӀудияб жолъун букӀинаро дозие; нижер бащдал рагъухъаби чӀванигицин гьелъги дол мурадалде щвезариларо; амма дур гӀумру нижер анцӀазаргоясулалдасаги хирияб буго. Гьединлъидал, мун шагьаралда чӀеялдаса лъикӀаб кумек нижее букӀинаро».
4Цинги пачаяс абуна: «Нужеца абухъе гьабила дица», – ян.
Нус-нусккун, аза-азарккун рагъухъаби къватӀире рахъунаго, пача шагьаралъул кавабахъ вахъун чӀун вукӀана. 5Пачаяс Иоавие ва Авишайие буюрухъ кьуна: «Авессаломие зарал ккезе биччаге, дие гӀоло», – ян.
ТӀолабго халкъалда рагӀана пачаяс жив-жив рагъул цевехъанасе гьединаб буюрухъ кьолеб.
Авессаломил хвел
6Аскариял авлахъалде къокъана гӀизраилалгун рагъизе ва гьеб рагъ ккана Ефраимил ракьалда рохьоб. 7Давудил рагъухъабаз щущахъ базабуна гӀизраилазул аскар, гӀасияб чӀвай-хъвей ккана гьениб – кинавниги къоазарго чи чӀвана. 8Сверухълъиялдаго тӀибитӀана гьеб рагъ, амма хвалчаца чӀвараздасаги рохьил балагьаздаса хваразул къадар цӀикӀкӀана.
9Жиндирго гӀорцӀеналда рекӀун унев вукӀарав Авессалом тохлъукьего Давудил чагӀазда данде ккана. Гьесул гьеб гӀорцӀен цо кӀудияб гӀаркьахараб миккигъотӀода гъоркьан добехун бекерун унаго, Авессаломил бетӀер гьеб гъотӀол гӀаркьалабазда хурхун ана. Гьев живго гьенив зобалаздаги ракьалдаги гьоркьов далун хутӀана, гӀорцӀенин абуни жиндирго нухда бекерун ана. 10Гьеб бихьидал, цо чияс Иоавида бицана Авессалом вугин миккигъотӀода далун хутӀун.
11Иоавица гьеб хабар босун вачӀарав чиясда абуна: «Щиб жойилая?! Дуда Авессалом вихьанилая? Щайха цинги дуца гьев чӀван рехичӀев? Дица вохуца холаго рагъухъанасул рачелги анцӀго гӀарцул кесекги кьелаангури букӀараб дуе гьелъухъ!»
12Амма гьев чияс абуна:
«Бахъун дир хъатикь азарго гӀарац лъунигицин, пачаясул васасде дица квер борхилароан. Нижеда киназдаго рагӀана пачаяс дуеги, Авишайиеги, Иттайиеги „дие гӀоло дир вас Авессаломил гӀумру цӀунеян“ буюрухъ кьолеб. 13Нагагьлъун диего балагьалъе дица гьединаб хиянат гьабун букӀарабани, пачаясдаса бахчун щибго хутӀуларелъул, гьебмехалъ мунгогицин дида данде чӀелаан».
14«Дуда кӀалъан дица гӀадада заман хвезабиларо», – янги абун, миккигъотӀода далун вугев Авессаломил рекӀелъе ишанги босун Иоавица лъабго чӀор речӀчӀана. Гьев жеги чӀаго вукӀана. 15Цинги Иоавил ярагъ баччулел гӀолохъабазул анцӀгояс сверунги ккун, чӀвана Авессалом.
16Гьебмехалъ Иоавица суралъубе пуна, ва рагъухъабаз рагъ къотӀизабуна. Иоавил буюрухъалда рекъон, тӀокӀалъ гьел гӀизраилазда хадур лъугьинчӀо. 17Авессаломил жаназа гьез гьениса нахъе босун кӀудияб гвандинибе рехана, ва гьелда тӀад чӀахӀиял ганчӀазул гохӀ бана. ТӀолалго гӀизраилалги рокъо-рокъоре лъутун ана.
18Жеги живгоги чӀаго вукӀаго, Авессаломица Пачаясул абулеб расалъиялда жиндиего ганчӀил памятник лъун букӀана, «дир цӀар нахъе цӀунизе дир цониги вас гьечӀелъулин» пикруги гьабун. Жакъа къоялъги «Авессаломил памятникилан» абула гьелда.
Авессалом чӀваялъул Давудида бицин
19Цадокил вас АхӀимаацица абуна:
«БЕТӀЕРГЬАНАС гьев жиндирго тушбабаздаса хвасар гьавунин абун хабарги босун пачаясухъе векерун ине виччай дун».
20Амма Иоавица абуна: «Гьеб хабар босун жакъа мун гуро ине вугев. Мун цогидаб къоялъ ине бегьила, амма жакъа унге – пачаясул васлъидал хун вугев».
21Цинги Иоавица цо эфиопиясда абуна: «Векере, дуда бихьарабщинаб пачаясда бицине а», – ян.
Эфиопияв, Иоавие бетӀерги къулун, векерун нухда ана.
22Цадокил вас АхӀимаацица нахъеги абуна: «Щиб кканиги, дунги виччай эфиопиясда хадув ине».
Амма Иоавица абуна: «Я дир вас, гьеб щай дуе? Шапакъат щолеб хабар гурелъул гьаб бугеб».
23Гьес абуна: «Бокьараб кка абе, диеги бокьун буго ине».
Цинги Иоавица абуна: «Векере, гьедин батани!»
АхӀимаац Иорданалъул расалъиялдаса унеб нухккун векерун ана ва эфиопиясдасаги цеве ккана. 24Давуд шагьаралъул жанисеб ва къватӀисеб кавабазда гьоркьов гӀодов чӀун вукӀаго, ворчӀухъан шагьаралъул къадада тӀаде вахана ва кавабазда тӀасахунаб тӀохда эхетана. РикӀкӀаде бер щвезабидал, векерун вачӀунев цо чи вихьана гьесда. 25ВорчӀухъанас пачаясде ахӀана ва гьесда гьеб бицана.
Пачаяс абуна: «Живго цохӀо вачӀунев чи ватани, цӀияб хабарги босун вачӀунев чи ватула гьев», – ин.
Гьев чи тӀадеялдаса тӀаде гӀагарлъулев вукӀана, цинги 26гьединго векерун вачӀунев цоги чиги вихьана ворчӀухъанасда, ва гьес кавабазул хъаравуласде ахӀана цоги чиги вачӀунев вугин. Пачаяс абуна:
«Гьевги цо хабар босун вачӀунев чи ватизе ккола», – ян.
27ВорчӀухъанас абуна: «ТӀоцевесесул векери Цадокил вас АхӀимаацилалда релълъуна», – ян.
«Гьев лъикӀав чи вуго. Гьес лъикӀаб хабар босун бачӀунеб батула», – ян абуна пачаяс.
28АскӀове гӀагарлъулаго, кинабго лъикӀ бугин ахӀана АхӀимаацица. ГӀодоб гьумер цун пачаясеги къулун, гьес абуна: «Рецц БЕТӀЕРГЬАНАСЕ, дур Аллагьасе! Дир бетӀерчӀахъаяв пачаясда тӀаде квер борхаралщинал гьесул кверде кьуна Гьес!»
29Пачаяс цӀехана: «Авессалом сах-саламат вугищ?» – ин.
«Иоавица дун духъе витӀулелъул дида цо кӀудияб рагъа-рачари бихьана, амма гьелъул магӀна дида бичӀчӀичӀо», – ян абуна АхӀимаацица.
30Пачаяс абуна: «Цевеса нахъе вилълъун гьанив хьолбохъ эхетун чӀа», – ян. Гьев гьесул хьолбохъ эхетана.
31Гьениве щведал, эфиопияс абуна: «Дир бетӀерчӀахъаяв пача! Гьале рохалил хабар! БЕТӀЕРГЬАНАС дуда данде рахъаралщиназдаса хвасар гьавуна мун жакъа», – ян.
32Пачаяс эфиопиясда цӀехана: «Авессалом сах-саламат вугищ?»
Эфиопияс жаваб гьабуна: «Гьесие ккараб ккаги дир бетӀерчӀахъаяв пачаясул тӀолалго тушбабазе ва гьесда, данде чӀаралщиназе», – ян.
33Пача тӀуркӀана, дунял чӀегӀерлъун анин ккана. Шагьаралъул кавабазда тӀад бугеб рокъове вилълъана гьев, гӀек-гӀекиялда гӀодулаго.
«Вай дир вас Авессалом! Дир вас, дир вас! Авессалом! Дунго хвезе вукӀаравани дур бакӀалда! Вай дир вас Авессалом, дир вас!» – ин инагьдилаго унев вукӀана пача.
Currently Selected:
2 Пачаби 18: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
