2 Пачаби 17
17
Ахитофелица ва Хушайица кьурал гӀакълаби
1Ахитофелица Авессаломида абуна:
«АнцӀила кӀиазарго рагъухъанги вачун, къаси Давудида хадув лъугьине виччай дун. 2Дов свакан тату хун вукӀадго дун досде тӀаде кӀанцӀила. ХӀинкъизавун, чара къосиналде ккезавила дица дов, тӀолалго досул чагӀиги лъутила гьебмехалда. Цинги дица живго пачаги чӀвала, 3кинабго халкъги, жиндирго хважаинасухъе гӀадин, духъе тӀадбуссинабила. Дуе чӀвазе къваригӀарав чи цохӀо вугелъул, тӀолабго халкъин абуни сах-саламат хутӀила».
4Авессаломие ва ГӀизраилалъул тӀолалго церехъабазе гьеб рагӀи рекӀее гӀуна. 5Амма Авессаломица абуна:
«Аркияв Хушайги ахӀе дихъе, гьес абулелъухъги гӀенеккизин».
6Хушай вачӀиндал, Авессаломица гьесда цӀехана: «Ахитофелица абуна гьадинги додинги гьабейилан. Гьедин гьабуни лъикӀ букӀинадай? Ялъуни, дур гьелда ракӀ рекъолеб батичӀони, дурго пикруги загьир гьабе нижее».
7Хушайица Авессаломида абуна:
«Ахитофелица гьаб нухалъ кьураб гӀакълу лъикӀаб гьечӀо. 8Дуда лъала дурго эменги гьесул чагӀиги. Гучал рагъухъаби руго дол ва хӀалалдаса ун хъетӀолеб, жиндир тӀанчӀаздаса батӀа гьабураб циялда релълъуна гьанже дол. Гьелда тӀадеги, дур эмен вуго хӀалбихьи бугев рагъухъан. Гьединлъидал, гьаб сардилъ досги досул чагӀазги кьижун хӀалхьи гьабизе гьечӀо. 9Гьанжего нохъо-къедазда, ялъуни цоги-цоги бакӀазда вахчун чӀун ватула дов. ТӀоцебесеб дандечӀеялъулъго дур чагӀи чӀвани, гьеб хабар рагӀаралщиназ абила: „Авессаломил рахъ ккурал гъурун рагӀула“, – ян. 10Гьебмехалъ бищун лебалав, жибго гъалбацӀалъулгӀан ракӀ къвакӀарав рагъухъанасулцин хӀинкъиялъ ракӀ тамахлъила. Щайгурелъул, тӀолабго ГӀизраилалда лъала дур эмен къуватав рагъухъан вукӀин ва гьесда цадахъ лебалал рагъухъабиги рукӀин.
11Гьединлъидал, дица дуе гьадинаб гӀакълу кьела: Даналдаса бахъараб къилбаялъул рахъалда Беэр-Шеваялде щвезегӀан тӀолабго ГӀизраил – ралъдал рагӀалда салигӀан гӀемераб гӀалам – бакӀаре абе духъе ва дуцаго баче гьеб рагъде. 12Цинги нилъ, киса-кибего ракьалде щущараб щуб гӀадин, циндаго Давудиде тӀаде кӀанцӀила, кив гьев ватаниги. Гьебмехалъ, я гьев, я гьесул цониги чи чӀаго хутӀиларо. 13Дов цо шагьаралде лъутани, рухьбиги росун, тӀолалго гӀизраилал тӀаде лъугьина ва лъарахъе бехъерхъила гьеб шагьар, гьелъул ганчӀида гамачӀ хутӀулареб хӀалалъ».
14Гьебмехалъ Авессаломицаги тӀолалго гӀизраилазги абуна: «Ахитофелил гӀакълуялдаса аркияв Хушайил гӀакълу камилаб буго», – ян.
Авессаломида тӀаде балагь бачине букӀине гӀоло гьедин Ахитофелил цӀодораб гӀакълу хвезабизе къотӀана БЕТӀЕРГЬАНАС.
Хушайица Давудихъе хабар битӀи
15Цинги Хушайица Цадокидаги Авиатаридаги абуна:
«Ахитофелица гьадинги додинги гьабейин абуна Авессаломида ва ГӀизраилалъул тӀадчагӀазда. Дицайин абуни, гӀаксалда, гьадинги гьадинги гьабейин абуна. 16Гьанже гӀедегӀил гьабун, Давудихъе хабар битӀе: „Вореги, гьаб сардилъ Иордан лъарахъ бугеб авлахъалда чӀел гьабуге. Щиб гьабунги лъар бахун добаб рахъалде а, пачаги гьесда цадахъ ругелщиналги хвалдаса цӀунун хутӀизе“».
17Ионатанги АхӀимаацги Рогел абураб иццухъ рукӀана. Цо цеетел ячӀунаан гьезухъе хабарги босун ва гьел Давудихъе унаан гьеб хабар щвезабизе. Лъиданиги рихьизе гурин абун гьел шагьаралде жанире унароан. 18Амма гьел цо васасда рихьана ва гьес Авессаломида бицана. Гьединлъидал, гьениса лъутун гьел Бехурималдаса цо чиясухъе рилълъана. Гьев чиясул азбаралда лъадал гъуй букӀана ва гьел гьенир жанир рахчана. 19Гьесул лъадуца, лъидаго щибго лъалареб хӀалалъ мугь-мучги тӀаде бан, юргъан рехана гьеб гъуялда тӀаде.
20Авессаломил чагӀи рачӀана гьей гӀадамалъул рокъоре ва гьез гьелда цӀехана: «Кир ругел АхӀимаацги Ионатанги?» – ян.
Гьей гӀаданалъ абуна: «Лъар бахун дорехун ана гьел».
КигӀан ралагьаниги гьелги ратичӀого, Иерусалималде тӀадруссана гьел чагӀи. 21Гьел чагӀи ун хадуб, гьел кӀиялго гъуялдаса къватӀиреги лъугьун, Давудихъе ине нухде рахъана. Гьез Давудида абуна: «Хехго нухде вахъа ва лъар бахе. Ахитофелица гьадинги додинги гьабизе кколин дуда дандеян абун буго».
22Жиндирго халкъгун цадахъ нухде вахъана Давуд. Радал хъахӀлъи рехилалде цо чи хутӀичӀого гьез киназго лъар бахана.
23Жиндир гӀакълу нахъ чӀван букӀин бихьидал, Ахитофелица хӀама кьолона ва жиндирго шагьаралде рокъове къокъана; гьениб васигатги хъван, кваридаги ван, гьес жинцаго живго гъанкъана. Гьедин хвана гьев ва жиндирго инсуда аскӀов хабалъ лъуна.
24Давуд Маханаималде щвана. Авессаломицаги тӀолалго гӀизраилалгун цадахъ Иордан лъар бахана. 25Авессаломица жиндирго аскаразул бетӀерлъун Иоавил бакӀалда гьесул вацгӀал Амаса тана. ИсмагӀелил агьлуялъул чи Етерил вас вукӀана гьев, гьесул эбелалда цӀар – Авигайл, гьейги йикӀана Нахашил яс, Иоавил эбел Церуягьил яц. 26Авессаломил нухмалъиялда гъоркь Иордан тун дорехун ГилгӀадалъул ракьалда къайи чӀван чӀана тӀолалго гӀизраилал.
27Давуд Маханаималде вачӀиндал, аммониязул тахшагьар Раббагьалдаса Нахашил вас Шови, Ло-Деваралдаса Аммиэлил вас Махир ва Рогелималдаса гилгӀадияв Барзиллай 28босун бусен-къайгун, суркӀа-щурунгун, щагӀил цӀарагӀгун гьесухъе рачӀана. ТӀадеги гьез босун бачӀана мугь-муч, пурчӀина, чӀер, гьоло ва гъолден, 29гьоцӀо ва нах, гӀиял ва гӀакдал хӀан – Давудие ва гьесул чагӀазе кваназе букӀине; щайгурелъул гьезда лъалеб букӀиндал гьел нухда ракъун, свакан ва къечон рукӀин.
Currently Selected:
2 Пачаби 17: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
