2 Пачаби 12
12
Натаница Давудида бадибчӀвай гьаби
1БЕТӀЕРГЬАНАС Натан авараг витӀана цо къоялъ Давудихъе. ВачӀун гьес Давудида абуна:
«Цо шагьаралда вукӀаравила кӀиго чи – цо бечедав, цо мискинав. 2Бечедав чиясул букӀарабила рикӀкӀун хӀал кӀоларебгӀан гӀемераб гӀи-боцӀи. 3Мискинасул абуни, гьес бичун босараб цо гьитӀинаб кьегӀер тун тӀокӀаб щибго букӀинчӀебила. Гьеб кьегӀер гьес жиндирго лъималазда цадахъ хьихьун кӀудияб гӀурабила. Гьесул кӀалдиса кванан, гьесул щурминиса лъим гьекъон, гьесул каранда кьижун гӀурабила ва гьесие жиндирго ясгӀанги хириябги букӀарабила гьеб. 4Цо къоялъ бечедасухъе вачӀун вуго гьобол. Амма гьев гьоболасе квен гьабизе жиндирго гӀи-боцӀуда хъвазе барахщаравила гьев чи. Цинги арав гьев мискинасухъе, бачараб гьесул кьегӀер ва гьебги хъун, гьабураб тӀаде вачӀарав гьоболасе кваназе жо».
5Гьебмехалъ ццидаца гьалаглъана Давуд, ва гьес абуна: «ХӀакъав БЕТӀЕРГЬАНАЛХӀА, гьеб жо гьабурав чи гӀажалалъе мустахӀикъав вуго! 6ГурхӀел-рахӀму тун гьединаб иш гьабизе кӀварав гьев чияс гьеб кьагӀрихъ ункъо нухалъ цӀикӀкӀун багьа бецӀизе ккола».
7Цинги Натаница абуна:
«Мун вуго гьев чи! Гьале ГӀизраилалъул БЕТӀЕРГЬАН Аллагьасул калима: „Дица ГӀизраилалъе пачалъун вищана мун ва Шаулил квердаса ворчӀизавуна. 8Дица гьесул кӀалгӀаги, гьесул руччабиги кьуна дуе; тӀолабго ГӀизраилги Ягьудияги дур кверщаликье ккезабуна. Гьебги дуе гӀолеб букӀун батичӀони, Дица жеги тӀадеги жубалаан дуе. 9Щайха цинги дуца, БЕТӀЕРГЬАНАСУЛ амруялда малги бан, Гьесда цебе къабихӀаб иш гьабураб? Хвалчаца чӀван хитияв Уриягьгун, дуца гьесул лъади дуего ячана. Дуца аммониязул хвалчадалъун чӀвана гьев. 10Дунги малъие гьавичӀого, хитияв Уриягьил лъади дуего ячаралъухъ зулму-хӀалаб хвел дур хъизан-къаялдаса кидаго тӀаса инаро“.
11Гьадин лъазабулеб буго БЕТӀЕРГЬАНАС: „Дурго къавулъан бачӀинабила Дица дуда тӀаде балагь. Рачун дур руччаби Дица дур цевесев чиясул кверщаликье кьела, гьевги дур берда цеве гӀададакъад гьезда аскӀов вегила. 12Дуца бахчун гьабуна, Дицайин абуни ГӀизраилалдаго лъалеб хӀалалъ гьабила“, – ян».
13Цинги Давудица абуна: «БЕТӀЕРГЬАНАСДА цебе кӀудияб мунагь гьабуна дица!» – ян.
Натаница гьелда данде абуна: «БЕТӀЕРГЬАНАС дур мунагь тӀаса босана. Мун хвезе гьечӀо. 14Амма БЕТӀЕРГЬАНАСУЛ тушбабазда цебе Гьесул цӀар къабихӀ гьабулеб иш гьабуралъухъ дуе гьавурав вас хвезе вуго».
Давудил вас хвей
15Гьединги абун Натан авараг рокъове ана. Хадуб БЕТӀЕРГЬАНАС унти ккезабуна Уриягьида йикӀарай лъадуца Давудие гьабураб лъимаде. 16Цинги гьеб лъимадуе гӀоло Давуд Аллагьасде гьардана. Кванда кӀалцин хъвачӀого гӀодов чӀарбида вегун рана сардал. 17Гьесул гӀагарлъиялъул чӀахӀиял чагӀи рачӀана гьесда аскӀоре гьев тӀаде вахъинавизе, амма гьес тӀаде вахъине ва гьезда цадахъ квен кваназе инкар гьабуна.
18Анкьабилеб къоялъ лъимер хвана. Давудил чагӀи лъимер хванин гьесда абизе хӀинкъун рукӀана. Гьезда ккана: «Лъимер чӀаго букӀагоцин нилъехъ гӀенеккичӀо Давуд. Гьанже лъимер хванилан кин нилъеца гьесда абилеб. Цинги гьес гӀасияб хвел босизе гурин», – абун.
19Давудида рихьана сверухъ чагӀи цоцада щурщудилел рукӀин. Лъимер хун букӀин бичӀчӀана гьесда.
«Хварабищ лъимер?» – ин цӀехана Давудица. Хванин абуна гьез.
20Гьебмехалъ чӀарбидаса тӀаде вахъана Давуд. Черхги чура-хулун, гьуинал махӀалги рахун, ретӀелги хисун БЕТӀЕРГЬАНАСУЛ Мукъадасаб бакӀалде вилълъана ва Гьесие дугӀа гьабуна. Хадув жиндирго кӀалгӀаялде вилълъана Давуд ва квен босеян буюрухъ кьуна; гьесда цебе квен босун бачӀана ва гьев кванана.
21Гьесул чагӀаз хӀикмалъун гьесда абуна:
«Гьалъул магӀна щиб? Лъимер чӀаго букӀадго мун кӀалги ккун гӀодилев вукӀана. Гьанже лъимер хвараб мехалъ, мун тӀаде вахъун, квана-гьекъолев вуго?» – ян.
22Гьес жаваб кьуна: «„Щиб лъалеб БЕТӀЕРГЬАН гурхӀизе бегьула дида ва лъимер чӀаго хутӀизе бегьула“, – ян хьулги лъунин дица лъимер чӀаго бугебгӀан мехалъ кӀалги ккун магӀу тӀураб. 23Амма гьанже гьев хвана. ТӀокӀалъги кӀал ккун щай дие? Гьев нахъвуссинавизе дида бажарилищ? Дун гьесда хадув ани гурони, гьев тӀокӀав дихъе тӀадвуссинаро».
Сулейман гьави
24Цинги Давудица жиндирго лъади Батшебае ракӀ-макӀ гьабуна. Гьев гьелда аскӀов вегана ва гьелъул ургьибе лъимер ккана. Гьелъ вас гьавуна, гьесда цӀарги Сулейман лъуна. БЕТӀЕРГЬАНАСЕ хиралъана гьев вас, 25ва гьединлъидал Натан авараг витӀана БЕТӀЕРГЬАНАС Жиндирго рахъалъан Едидиягь#12:25 Едидиягь – гьаб рагӀул магӀна ккола БетӀергьанасе хирияв. абун цӀар лъе васасдаян тӀадкъайгун.
Давудица Раббагь шагьар кверде боси
26Гьебго заманалда Иоав аммониязул тахшагьар Раббагьалда данде вагъулев вукӀана ва гьес пачаясул кӀалгӀа кверде босана. 27Цинги Иоавица чапарзаби ритӀана Давудихъе гьадинаб хабаргун:
«Раббагьалде гьужум гьабуна нижеца ва гьезул шагьаралде лъим бачараб иццул бетӀер ккуна. 28Гьанже хутӀарал рагъухъабиги рачун, шагьаралде гьужум гьабизе ва гьеб кверде босизе вачӀа, гьеб дицаго гьабизе ккечӀого букӀине. Гурони гьеб бергьенлъиялъул цӀар дур бакӀалда дие щвела».
29ХутӀараб аскарги цадахъ бачун, Давудица Раббагьалда тӀаде гьужум гьабуна ва гьеб кверде босана. 30Давудица гьезул пачаясул#12:30 Ялъуни, Милхомил ботӀродаса. Милхом ккола Раббагьалъул аллагь (бал. 3 Пач. 11:5, 33). ботӀродаса меседил таж нахъе босана ва жиндирго ботӀрода лъуна. Жавгьар-якъуталъ къачӀараб цо талант#12:30 Талант – гӀага-шагарго 36 кило. цӀайиги бугеб таж букӀана гьеб. ЦӀакъ гӀемераб давлаги щвана гьезие гьеб шагьаралдаса. 31Гьеб шагьаралъул гӀадамалги ккун рачун хъухъадираби, маххул газаби, гӀащтӀал кодоре кьун хӀалтӀизе тӀамуна. Гьединго хӀарщул кирпичал гьаризеги тӀамуна гьел.
Аммониязул тӀолалго шагьаразе гьебго жо гьабуна Давудица. Хадуб, цадахъ тӀолабго жиндирго аскаргун, гьев Иерусалималде тӀадвуссана.
Currently Selected:
2 Пачаби 12: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
