2 Пачаби 13
13
Тамар инжит гьайи
1Давудил вас Авессаломил Тамарин абун цӀар бугей тӀулбикьарай яц йикӀана; гьей йикӀана кутакалда берцинай яс. Давудил цогидав вас Амнонил рокьи ккана Тамарихъ. 2Эбел батӀияй яц Тамарихъ ккараб рокьуца битӀахъе холев вукӀана Амнон – гьей ясгӀадан йикӀиндал, гьелда аскӀове къазе рес гьечӀин жиндиеян пикрабаз чӀвалев вукӀана гьев. 3Егьонадав абурав цӀакъ сихӀирав цо вацгӀал вукӀана Амнонил; Давудил вац Шимагьил вас вукӀана гьев.
4Гьес Амнонида цӀехана: «Щай мун къойидаса къойиде тӀадго вакъван унев вугев? Дида бицине бегьулареб жойищ бугеб?»
Цинги Амноница абуна: «Авессаломил яц Тамарихъ рокьи ккун холев вуго дун», – ин.
5Егьонадавица абуна: «Вегун бусадагун унтараб ххвел гьабе. Духъе ваккизе эмен вачӀаравго гьесда абе: „Дир яц Тамар ячӀа абе бегьулеб батани дие квен гьабизе. Дие бокьилаан гьелъ щиб букӀаниги кваназе жо гьабизе гьаниб дида бихьулаго; гьелъ кьураб квен кваналаан дица“, – ян».
6Амнон унтараб ххвелги гьабун бусада вегана. Ваккизе эмен вачӀиндал, Амноница гьесда абуна: «Бегьулеб батани дир яц Тамар ячӀа абе дида цебе цо-кӀиго чед гьабизе; цинги гьелъ цебе лъураб квен кваналаан дица», – ян.
7Давудица кӀалгӀаялде Тамарида хадув чи витӀана: «Дурго вац Амнонил бакӀалдеги ун, гьесие кваназе жо гьабе», – ян.
8Бусада вугев жиндирго вац Амнонил бакӀалде йилълъана Тамар. Буцун ролъгун, гьесда цере режана чадал. 9Хадуб къоноялъуса росун гьесда цере лъуна гьел, амма гьес кваназе инкар гьабуна.
«Цо течӀого къватӀире а абе киналго чагӀи гьаниса», – ян абуна гьес.
Киналго къватӀире ана. 10Цинги Амноница Тамарида абуна: «Дун кьижулеб рокъобе босе гьеб квен, дуда кодоса кваназе букӀине дица», – ян.
Гьабураб квен босун гьесул кьижулеб рокъобе вацасда цебе щвезабуна Тамарица. 11Амма гьев кваназавизеян гьесда аскӀое къарайго, къан ккун гьейгун, жинда аскӀой ега яцакойилан абуна гьес.
12«Вай, бегьуларо, дир вац! Дун гьедин инжит гьаюге. ГӀизраилалда гьединаб жо гьабизе бегьуларо! Гьеб бетӀер сверараб жо гьабуге дуца! 13Цинги гьеб ничги босун дун кие иней? Мунгоги ГӀизраилалдаго къватӀив чӀвала. Пачаясда кӀалъай, дос дун дуе кьезе инкар гьабиларо», – ян гьардана гьей гьесда.
14Амма гьес гьелъухъ гӀинцин бачӀо. Гьесул къуват цӀикӀкӀараб букӀиндал, аскӀов вегун, инжит-хӀакъир гьаюна гьес гьей. 15Гьеб лахӀзаталдаго Амноние гьей кутакалда рихана. Гьелъухъ ккун букӀараб рокьиялдасаги къуватаб рокьукълъи бачӀана гьесул рекӀелъе.
«ТӀаде яхъа! ТӀагӀа дида цееса!» – ян ахӀдана Амнон гьелде.
16Тамарица абуна: «Вай, гьелъие ккараб гӀилла щиб?! Гьанже дун къватӀие къотӀи, дуца дие гьабуралдасаги жеги кӀудияб квешлъи ккола!» – ян.
Амма гьелъул рагӀи гӀадахъ босичӀо гьес. 17Жиндирго цо цеветелги ахӀун, гьесда абуна:
«Нахъе ахӀе гьай жо гьаниса, кавуги рахай гьалда хадуб», – ин.
18Гьесул цеветелас къватӀие тункана гьей, гьелда хадуб кавуги рахана. Гьелда тӀад ретӀун букӀана, батӀи-батӀиял накъишаз берцин гьабураб, росасе инчӀел пачаясул ясаз ретӀунеб хирияб ретӀел. 19Цинги хирияб тӀасанретӀелги бихъун, ботӀроде хӀатӀ бана Тамарица. Къан ккун бетӀергун, гӀек-гӀекиялда гӀодилаго нахъе йилълъана гьей гьениса.
20Гьелъул вац Авессаломица гьелда абуна: «Вац Амнонищ дуда аскӀов вукӀарав? Гьанже сихӀкъотӀун чӀа дир яц. Довги дур вацлъидал. ЯхӀ гьабе гьанже».
Гьелдаса нахъе Авессаломил минаялъуй йикӀана Тамар, ялгъузлъиялда гӀумру гьабун.
21Гьеб хабар Давудида лъайдал, гьесул Амнонида кутакалда ццин бахъана, амма хирияв вукӀиналъ щибго гӀадлу гьабичӀо гьес васасе; гьесул тӀоцеве гьавурав васлъидал гьев вукӀарав. 22Авессаломги Амнонида кӀалъачӀого чӀана – я лъикӀалъе, я квешалъе. Жиндирго яц Тамар гьес инжит гьаюралдаса нахъе гьесда рихана гьев.
Авессаломица Тамарие гӀоло Амнонидаса къисас боси
23КӀиго лъагӀалидасан, Авессаломил гӀи къунцӀулеб букӀана Ефраимил гӀорхъода аскӀоб бугеб БагӀал-Хацоралда, ва гьес киналго пачаясул васал ахӀана гьенире. 24Пачаясухъе вилълъана Авессалом ва гьесда кӀалъана: «Дир гӀи къунцӀулеб буго. Киналго цересел чагӀиги цадахъ рачун, гьениве вачӀине санагӀат ккелародай дир пачаясул?» – абун.
25Пачаяс жаваб кьуна: «Жо кколаро, дир вас. Ниж киналго гьениреги рачӀун, дуе бакӀлъи ккезабиларо», – ян.
Авессаломица кигӀан гьараниги, пачаяс живго гьениве вачӀине инкар гьабуна, амма васас гьабулебщиналда баракат лъегиян гьара-рахьи гьабуна. 26Цинги Авессаломица абуна: «Гьедин батани, дир вац Амнон виччай нижеда цадахъ».
Пачаяс цӀехана: «ГьевгӀаги щай дуе цадахъ?» – ин.
27Амма Авессалом тӀаса вичӀичӀелъул, гьес Амнонги хутӀарал киналго жиндирго васалги гьесда цадахъ риччана.
28Авессаломица жиндирго чагӀазда тӀадкъана: «ГӀенеккея, Амнон квана-гьекъон кеплъараб мехалъ, дица нужее ишан гьабила дов чӀвайин абун. Цинги чӀвай дов. Гьеб дир буюрухълъидал, нуж щибго хӀинкъуге. Квер тӀуркӀизе биччачӀого бахӀарзал гӀадин рукӀа!»
29Авессаломица малъухъе гьабуна гьесул чагӀаз Амноние. Ккараб жо бихьидал, хутӀарал пачаясул васал кӀанцӀун рахъун, жиде-жидер гӀорцӀмаздеги рахун, гьениса лъутун ана. 30Гьел жеги нухда рукӀадго, Давудихъе хабар бачӀана Авессаломица цо течӀого киналго пачаясул васал чӀван ругин.
31Кутакалда захӀмалъун гьеб хабаргун, тӀад букӀараб ретӀел бихъана Давудица ва гьев гӀодов чӀарбида кӀалагъоркье вегана. Гьесул тӀолабго чукъа-рахьаналъги тӀад букӀараб ретӀел бихъана. 32Амма Давудил вац Шимагьил вас Егьонадавица абуна:
«Дир бетӀерчӀахъаяв пача, дуда киналго васал чӀван ругин ракӀалде ккоге. ЦохӀо Амнон хвана. Доб Амноница гьесул тӀулбикьарай яц Тамар басра гьаюраб къоялдаса нахъего гьедин гьабизе хӀукму къотӀун букӀана Авессаломица. 33Киналго пачаясул васал хун ругин абураб харбидаги божун, пача къварилъахъдуге абе. ЦохӀо Амнон гурони хвечӀо», – ян.
34Гьебго заманалда Авессаломги лъутун ана. Шагьаралъул хъаравуллъуда эхетарав цо ворчӀухъанасда цинтӀаго бер чӀвана Хоронаималъул нухккун хьондаса гӀодоре рачӀунел гӀадамазул кӀудияб къокъаялда. Гьес, инеги ун, пачаясда бицана гьеб.
35Цинги Егьонадавица абуна: «Гьалеха пачаясул васал рачӀунел руго. Дица абухъе буго кинабго», – ян.
36Гьев кӀалъан вахъиналде, риччан гьаркьалгун гӀодилаго, жанире лъугьун рачӀана пачаясул васал. Гьебмехалъ пачаги гьесул киналго чагӀиги бухӀараб магӀуги тӀун гӀодана.
37Авессалом лъутана Гешуралъул пача, Аммигьудил вас, Талмайихъе. Давудица гӀемерал къояз магӀу тӀуна Амнонида хадуб. 38Гешуралде лъутарав Авессалом лъабго соналъ гьенив чӀана. 39Дагь-дагьккун Давудил рухӀел гӀодобе къан ана ва гьев тӀокӀалъ Авессаломида хадув лъугьинчӀо.
Currently Selected:
2 Пачаби 13: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
