2 Пачаби 11

Давудги Батшебаги

1Ихдалил гӀужалда пачаби рагъде рахъунаан. Гьанжесала Давудица Иоав витӀана вагъизе, цадахъ жиндирго церехъабигун ва ГӀизраилалъул аскаргун. Гьез рагъулъ аммониял щущахъ риххизаруна, гьезул тахшагьар Раббагьги сверун ккуна. Давуд абуни, Иерусалималда чӀун вукӀана.

2Цо нухалъ сардилъ вахъун жиндирго кӀалгӀаялъул тӀохда#11:2 Доб мехалъ ГӀизраилалда рагъилъун хӀалтӀизабулаан тӀох. хьвада-чӀвадилев вукӀана Давуд. ТӀохдаса гъоркье валагьидал, гьесда чвердолей цо гӀадан йихьана. Гьей кутакалда берцинай гӀадан йигоан. 3Давудица гьей гӀадан лъил-щияли лъазабизе чи витӀана.

«Элиамил яс, хитияв Уриягьил лъади Батшеба йиго дой», – абун бицана гьев чияс.

4Гьебмехалъ Давудица гьей ячине чагӀи ритӀана. Гьей гьесухъе ячун ячӀана; гьев гьелда аскӀов вегана (гьей хъублъиялдаса яцӀцӀалъун лъугӀараб заман букӀана гьеб). Цинги гьей рокъое тӀадюссана.

5Гьей гӀаданалъул ургьибе лъимер ккана, цинги гьеб бицун чи витӀана гьелъ Давудихъе.

6Гьебмехалъ Давудица Иоавихъе буюрухъ битӀана: «Хитияв Уриягь витӀе дихъе», – ян.

Иоавица гьев витӀун вачӀана. 7Уриягь вачӀиндал, Давудица Иоавил, аскариязул ва рагъул хӀакъалъулъ гара-чӀвари гьабуна гьесулгун. 8Хадуб Давудица Уриягьида абуна: «Рокъове ун цодагьаб хӀалхьи гьабе», – ян.

Уриягь пачаясул кӀалгӀаялъуса къватӀиве вилълъана, гьесда хадуб пачаясул сайгъатги битӀун ана. 9Амма Уриягь, рокъовеги инчӀого, кӀалгӀаялъул кавабахъго, пачаясул рорчӀухъабазда аскӀов кьижизе вегана. 10Давудида Уриягь рокъове инчӀилан бициндал, гьес Уриягьида цӀехана:

«ГӀураб мех сапаралдаги бан вачӀарав чи, щай мун рокъове инчӀев?» – абун.

11Уриягьица абуна: «КъотӀиялъул гъамасги ягьудиялги чадразухъги тун, дир хважаин Иоавги гьесул чагӀиги рагьараб авлахъалдаги тун, дун цинги рокъовеги ун квана-гьекъон кепалда лъадуда аскӀов вегунищ вукӀинев? Дур гӀумруялхӀа, гьединаб хӀалихьалъи дица кидаго гьабуларо!» – ян.

12Цинги Давудица гьесда абуна: «Жакъаги шагьаралда чӀа, метер дица мун тӀадвуссун нухда витӀила», – ян.

Уриягьица гьеб къоги гьелда нахъисеб къоги Иерусалималда бана. 13Давудица жиндихъего ахӀун лъикӀаб хӀалалда мехтизегӀан квана-гьекъезавуна гьев. Амма, къаси Уриягь добго бакӀалде Давудил рорчӀухъабазда аскӀов кьижизе ана. Кинго рокъове инавизе кӀвечӀо гьев.

14Радал Давудица кагъат хъвана Иоавихъе ва гьеб Уриягьида цадахъ битӀана. 15Кагътида хъван букӀана: «Бищун гӀасияб рагъул кор боркьараб бакӀалде ккезаве Уриягь, гьев гьенив гӀажалалде кколеб хӀалалъ, нужгоги гьесдаса нахъегӀан къан чӀа», – ян. 16Шагьаралде гьужум гьабулаго, тушбабазул бищун гучал рагъухъаби ругеб бакӀги лъазабун, гьениве ккезавуна Иоавица Уриягь. 17Шагьаралъул чагӀи Иоавида данде рагъизе рахъана ва гьеб рагъулъ Давудил аскаралъул цо-цо рагъухъабиги чӀвана; хитияв Уриягьги вукӀана гьезда гьоркьов.

18Иоавица гьеб рагъулъ ккара-таралъул мухӀканаб хабар битӀана Давудихъе. 19Иоавица чапарасда абуна:

«Гьаб рагъда ккарабщиналъул кинабго хабар рагӀидал, 20пачаясул ццин гьалаглъизе бегьула ва гьес дуда абизе бегьула: „Щай нуж гьеб хӀалалда шагьаралде гӀагарде къарал? Нужеда лъаларогойищ букӀараб доз къадазда тӀасан нужеде ганчӀал ралеблъи, чӀорал речӀчӀулеблъи? 21Ерубешетил вас Авимелех#11:21 Ерубушет – Гедеонил батӀияб цӀар (бал. Къад. 6:32) лъица чӀварав? Тевецалда Шагьаралъул къададаса гӀодобе чӀужугӀаданалъ рехараб гьабил ганчӀица гуревищ гьев чӀварав? Щай нуж гьедигӀан шагьаралде гӀагарде арал?“ Гьедин пачаяс дуда абуни дуца абе: „Дур лагъ хитияв Уриягьги чӀвана“», – ян.

22Чапар нухде вахъана ва Давудихъе щведал, Иоавица тӀадкъарабщинаб гьесда бицана. 23Гьев чапарас Давудида абуна: «Дол нижеда тӀаде-тӀаде рачӀунел рукӀиндал, доз ниж цин рагьараб авлахъалде нахъе къазаруна, амма хадуб нижецаги тӀадруссинаруна дол шагьаралъул кавабахъе щвезегӀан. 24Гьенир, чӀорбутӀчагӀаз шагьаралъул къадазда тӀаса гӀодоре чӀорал речӀчӀун, пачаясул цо-цо чагӀи чӀвана. Дур лагъ хитияв Уриягьги чӀвана».

25Цинги Давудица гьесда абуна: «Иоавида гьадинан абе: „Рагъда чи хвечӀого хутӀуларелъул, дуца гьелъул ургъел гьабуге. Рагъул гуч цӀикӀкӀинабун гьеб шагьар тӀатӀала ккезабе“, – ян. Гьединги абун Иоавил ракӀбатизабе».

26Рос чӀван вугин рагӀидал, Уриягьил лъадуца гьесда хадуб магӀу бахъана. 27Хварав чиясда хадур гӀодулел къоял ахиралде щведал, Давудица гьей жиндирго рокъое ячана; гьей гьесул лъадилъун яхъана ва гьелъие вас гьавуна. Амма Давудица гьабураб иш БЕТӀЕРГЬАНАСДА квеш бихьун букӀана.

Currently Selected:

2 Пачаби 11: АварАК

Highlight

Copy