4 Пачаби 9
9
Егьу ГӀизраилалъул пачалъун вахъин
1ЭлишагӀ аварагас гӀолохъанал аварагзабазул цоявги ахӀун, гьесда абуна: «Нухде вахъине къачӀай. Зайтуналъул нахул цӀураб хъабаги босе ва ГилгӀадалъул Рамоталде а. 2Гьениве щваравго Нимшил васасул вас, Егьошафатил вас Егьу валагье. Досухъеги ун, досул гьудул-гьалмагъзабазда аскӀоса ватӀа ахӀун, нахъарокъове ваче дов. 3Цинги босун гьаб хъаба чӀехье досул ботӀрода тӀаде ва гьадин абе: „Гьале БЕТӀЕРГЬАНАСУЛ рагӀи: ‘Дица ГӀизраилалда тӀад пачалъун толев вуго мун’“. Хадув, ричӀун нуцӀагун, нахъ валагьичӀого лъута!»
4Гьев гӀолохъанав авараг ГилгӀадалъул Рамоталде ана. 5Гьениве щваравго, цо сверуда гӀодор чӀун ратана аскаразул бутӀрул.
«Аскаралъул бетӀер, дир цо хабар буго духъе», – ян абуна гьев гӀолохъанав аварагас. «Нижер кисавасухъе?» – ян цӀехана Егьуца. «Духъе буго», – ян жаваб кьуна гьес.
6Егьу вахъун рокъове жаниве вилълъана. Цинги аварагас Егьул ботӀроде нах тӀуна ва гьес абуна: «Гьале ГӀизраилалъул БЕТӀЕРГЬАН Аллагьасул рагӀи: „Дица мун ГӀизраилалда, БЕТӀЕРГЬАНАСУЛ халкъалда тӀад пачалъун толев вуго. 7Дир аварагзабазул ва киналго БЕТӀЕРГЬАНАСУЛ лагъзазул Изавелица гӀодобе тӀураб бидухъ Дица рецӀел босизе гӀоло, дуца дурго бетӀергьан Ахавил агьлу-зуриятго тӀагӀинабе. 8Ахавил тӀолабго хъизан-агьлу хвезе ккола. Гьесул махӀ бугел бихьинал цо хутӀичӀого тӀагӀинаризе руго Дица ГӀизраилалдаса – лагъ вукӀа, эркенав вукӀа. 9Наватил вас Яровамил ва АхӀиягьил вас Баашал хъизан-агьлуялъе гьабураб гьабила дица гьесул агьлу-зурияталъеги. 10Жийго Изавелги Изреелалъул ракьалда гьабзаца тӀутӀун язе йиго ва лъицаниги гьей хабалъ юкъизе гьечӀо“».
Цинги ричӀун нуцӀагун, лъутана гьев. 11Егьу жиндирго гьудул-гьалмагъзабазухъе тӀадвуссиндал, гьезул цояс цӀехана: «Ккара-тараб жо бугищ? Щиб гьабизе дов бетӀерсвер духъе вачӀун вукӀарав?» «Нужедаго лъала дов чиги досул каламги», – ян жаваб гьабуна Егьуца.
12«Лъаларо нижеда! – ян абуна гьез. – Бице дос абураб жо».
Егьуца абуна: «Дос дида абуна: „Дица ГӀизраилалда тӀад пачалъун толев вуго мун“, – илан абунин БЕТӀЕРГЬАНАС».
13Цинги гьез хъатамасан тӀаса рахъун гӀабаби рехана балъазда тӀаде гьесул хӀатӀикье. Хадуб суралъубе пуна ва ахӀана: «Егьу вахъана пачалъун!» – ин.
Иорам ва Ахазиягь – кӀиявго пачаясул хвел
14Цинги Нимшил васасул вас, Егьошафатил вас Егьу Иорам чӀвазе ургъана. (Иорам, цадахъ ГӀизраилалъул тӀолабго аскаргун, ГилгӀадалъул Рамот цӀунун Сириялъул пача Хазаилгун вагъулев рукӀана. 15Амма Иорам пача рагъулъ сирияз лъукъ-лъукъун Изреелалде тӀадвуссун вукӀана ругънал сах гьаризе.)
Егьуца абуна: «Нуж дида рекъарал ратани, щивго чи виччаге гьаб шагьаралдаса къватӀиве гьаб хабарги босун Изреелалде ине».
16Гьев чолгьакида тӀаде вахана ва Изреелалде нух босана; Иорам гьенив вукӀана жеги бусада, Ягьудиялъул пача Ахазиягьги вукӀана гьенив, гьесухъе ваккизе вачӀун. 17Изреелалда сиялда тӀад эхетарав ворчӀухъанасда рихьана Егьул рагъухъаби гӀагарлъулел ва гьес ахӀи бана: «Дида рагъухъаби рихьулел руго!» «Рекъелгун рачӀунел чагӀийищан цӀехезе гьезда данде чотӀахъан витӀе», – ян абуна Иорамица.
18ЧотӀахъан ана Егьуда данде ва гьес абуна: «Пачаяс цӀехолеб буго, мун рекъелгун вачӀунев чийищ?» «Кинаб рекъел дуе букӀунеб? – ин абуна Егьуца. – Дида хадув вилълъа».
ВорчӀухъанас дов дозда аскӀове щванин, амма тӀадвуссунев гьечӀин лъазабуна.
19Цинги пачаяс кӀиабилеб нухалъ витӀана чотӀахъан. Гьезда аскӀове щваравго, гьес цӀехана: «Пачаяс цӀехолеб буго, мун рекъелгун вачӀунев чийищ?» «Кинаб рекъел дуе букӀунеб? – ин абуна Егьуца. – Дида хадув вилълъа».
20ВорчӀухъанас довги дозда аскӀове щванин, амма тӀадвуссунев гьечӀин лъазабуна. «Гьакида цеве-цеве вачӀунев чи Нимшил вас Егьуда релълъарав вуго. БетӀер сверарав чияс гӀадин тӀамулел руго дос чуял», – ин абуна гьес.
21«Дир гьакида чуял рай», – ян буюрухъ кьуна Иорамица.
ГӀизраилалъул пача Иорамги Ягьудиялъул пача Ахазиягьги, жинди-жиндир гьакидаги рекӀун Егьуда данде рахъана. Изреелалдаса Наватил букӀараб хуралда аскӀов дандчӀвана гьезда гьев.
22Егьу вихьидал, Иорамица цӀехана: «Мун рекъелгун вачӀунев чийищ, Егьу?». «Кинаб рекъел букӀунеб, – ин жаваб кьуна Егьуца, – дур эбелалъ гьересиаллагьзабазе гьабураб хъахӀбаяб хъулухъги сихӀручилъиги тӀадеялдаса тӀаде цӀикӀкӀунеб букӀадго?»
23«Хияналъи, Ахазиягь!» – инги ахӀун, Иорам нахъвуссун лъутизе жувана.
24Гьебмехалъ Егьуца чӀор речӀчӀана ва гьеб Иорамил бугьналугбузда гьоркьоб щвана. Гьеб чӀоралъ гьесул ракӀ борлъана ва гьев гьакида жанив гӀодов речӀчӀана. 25Егьуца жиндирго божарав чи Бидкарида абуна: «Изреелалдаса Наватил букӀараб хуриве рехе гъов. РакӀалда бугищ гъосул эмен Ахавгун чолгьаказда рекӀун гьесда цадахъ унаго БЕТӀЕРГЬАНАС гьесда данде бицараб рагӀи: 26„Дида бихьана сон Наватил ва гьесул васазул би гӀодобе тӀураб куц, – ин лъазабулеб буго БЕТӀЕРГЬАНАС, – ва, гьайгьай, гьелъухъ гьаб хуриб жанив жавабалде ахӀила Дицаги мун“, – инги абун? Гьединлъидал, БЕТӀЕРГЬАНАСУЛ рагӀуда рекъон, босун гьеб хурибе рехе Иорамил жаназа».
27Ккараб жо бихьарабго, Ягьудиялъул пача Ахазиягь Бет-Гьаганалде валагьун лъутана. Гьевги чӀвайиланги ахӀун, Егьу гьесда хадув лъугьана.
Жиндирго гьакидаги рекӀун Гуралде тӀаде унев вукӀаго, Йивлеамалда аскӀоб бугеб нухда лъукъана Ахазиягь, амма гьев гьениса Мегиддоялде лъутана ва гьенив хвана. 28Гьесул хъулухъчагӀаз гьакидаги лъун, Иерусалималде босана гьесул жаназа ва Давудил Шагьаралда гьесул умумузда аскӀов вукъана гьев. 29Ахавил вас Иорам пачалъун вахъун анцӀила цоабилеб соналъ вахъун вукӀана Ахазиягь Ягьудиялъул пачалъун.
Изавелил хвел
30Егьуца Изреелалде нух босана. Изавелида гьеб хабар рагӀидал, гьей бералги релъун, расги берцинго къачӀан, гординиса къватӀие ялагьун чӀана. 31Егьу кавабахъа жаниве лъугьидал, гьелъ абуна: «Рекъелгун вачӀинищха мун, Зимрида#9:31 Бал. 3 Пач. 16:9-20. релълъарав, жиндирго бетӀергьан чӀвалев чӀвадарухъан?»
32Гордухъе тӀадеги валагьун, гьес ахӀана: «Дир рахъ ккурав чи щив вугев гьенив?» – ин. Гордухъа кӀиго-лъабго ахта ваккана.
33«ГӀодое рехе гьей!» – илан абуна Егьуца.
Гьез гьей гордухъа гӀодое рехана ва гьелъул чвахараб би къадада ва гьенир рарал чуязда. Гьел чуяз мерхьана цинги гьелъул къаркъала речӀчӀ-речӀчӀана.
34Егьу жаниве вилълъун квана-гьекъана. Хадуб гьес абуна: «Гъой нагӀана батад ялагье ва хабалъ юкъе; кин букӀаниги пачаясул яс йикӀиндал гъой».
35Амма гьей юкъизе аразда гьелъул гвангвараги, хӀатӀалги, квералги гурони ратичӀо. 36ТӀадруссун гьеб Егьуда бицана гьез, ва гьес абуна: «Тишбиялдаса Иляс аварагас бицараб БЕТӀЕРГЬАНАСУЛ рагӀи буго гьеб: „Изреелалъул ракьалда гьабзаца тӀутӀун бала Изавелил къаркъала. 37Хурибе щвараб боцӀул рак гӀадин букӀина Изавелил жаназа: гьай Изавелищиланцин абиларо лъицаниги“».
Currently Selected:
4 Пачаби 9: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
