4 Пачаби 10

Ахавил хъизан-къай тӀагӀинаби

1Ахавил лъабкъоялда анцӀго вас вукӀана Самариялда. Изреелалъул бутӀрузухъе, кӀудиял чагӀазухъе ва Ахавил васазул тарбиячагӀазухъе хъван кагътал ритӀана Егьуца Самариялде. Гьениб хъван букӀана:

2«Нужехъ кодор ругелъул пачаясул васалги, гьакалги, чуялги, сверун къараб хъалаги, ярагъги – гьедин бугелъул, гьаб кагъат щварабго, 3пачаясул васазул бищун мустахӀикъав тӀаса вище ва жиндирго инсул тахида лъе. Хадур нужерго пачаясе ва гьесул хъизан-къаялъе гӀоло рагъизе рахъа».

4Амма гьел кутакалда хӀинкъана: «КӀиго пачаясда кӀвечӀо гьесда данде чӀезе, – ян кӀалъана гьел цоцада, – нилъедайищ кӀолеб?»

5КӀалгӀаялъул бетӀерав хъулухъчияс, шагьаралъул бетӀерас, кӀудиял чагӀаз ва тарбиячагӀаз Егьухъе гьадинаб ругьел битӀана: «Ниж дур лагъзал руго ва дуца абураб гьабизе хӀадурал руго. Нижеца щивго теларо пачалъун, дуца дуего бокьухъе гьабе».

6Цинги Егьуца кӀиабилеб кагъат хъвана: «Нужеца дир рахъ кколеб батани, дие мутӀигӀалги ратани, росун пачаясул васазул бутӀрулгун, метер гьаб гӀужалда дихъе Изреелалде рачӀа».

Пачаясул лъабкъоялда анцӀавго вас, гьезие тарбиячилъи гьабизе жинда тӀад къарал шагьаралъул чӀухӀбузухъ рукӀана. 7Гьеб кагъат щварабго, гьез пачаясул лъабкъоялда анцӀавго вас чӀвана, ва гьезул бутӀрул гьагьазда жанирги лъун, Егьухъе Изреелалде ритӀана. 8Пачаясул васазул бутӀрул гьанире щвезарун ругин бицана Егьуда вачӀун чапарас.

Егьуца абуна гьел кӀиго гохӀ гьабун шагьаралъул кавабазда аскӀор лъейилан ва рогьинегӀан гьенир теян.

9Нахъисеб къоялъ радал Егьу халкъалда цеве вахъана ва гьезда кӀалъана: «Гьале гьав дица, дунго ургъун чӀвана Иорам пача. Нужеда щибго гӀайиб гьечӀо гьелъул. Амма гьал киналго лъица чӀварал? 10Гьединлъидал, нужеда лъан букӀа, БЕТӀЕРГЬАНАС Ахавил хъизан-агьлуялъул рахъалъ бицараб цониги рагӀи тӀубачӀого хутӀичӀо. БЕТӀЕРГЬАНАС Жиндирго лагъ Иляс аварагги гьоркьов ккун кьураб рагӀи БЕТӀЕРГЬАНАС тӀубазабуна».

11Цинги киналго Ахавил хъизан-къаялъул чӀаго хутӀаралщинал чагӀи, гьесул божарал чагӀигун, гьудул-гьалмагъзабигун, кашишзабигун цадахъ, цо чи течӀого чӀвана Егьуца Изреелалда.

12Хадуб Егьуца Самариялде нух босана. Нухда унев вукӀаго, «ГӀухьбузул Бет-Экед» абураб бакӀалда 13Ягьудиялъул пача Ахазиягьил гӀагарал чагӀи данде ккана гьесда, ва гьес гьезда цӀехана: «Нуж щал?» – ин.

Гьез абуна: «Ниж, эбел-бикал лъималазухъе ва пачаясул хъизамалъухъе щвезе къватӀире рахъарал, Ахазиягьил гӀагарал чагӀи руго», – ян.

14«ЧӀаго кверде росе гьел!» – ин буюрухъ кьуна Егьуца.

Гьел кквезеги ккун Бет-Экедалда бугеб лъадал гъуялда аскӀор чӀвана – кинавниги кӀикъоялда кӀиго чи. Гьезул цониги чи чӀаго нахъе ворчӀизе виччачӀо Егьуца.

15Гьениса къватӀиве вахъаравго, Рехавил вас Егьонадав данде ккана гьесда. Егьуца гьесие саламги кьун абуна: «Дуе дун гӀадин мунги вугищ дие ритӀухъав?» Вугилан абуна Егьонадавица. «Гьедин батани, квер баче», – ян абуна Егьуца.

Гьез кверал рачана ва Егьуца жиндирго гьакиде вахине кумек гьабуна гьесие. 16Егьуца абуна: «Дида цадахъ вилълъа. Дуда бихьила БЕТӀЕРГЬАНАСЕ дун мутӀигӀав вугев куц», – ин. Егьонадав гьесда цадахъ вилълъана.

17Самариялде щваравго, БЕТӀЕРГЬАНАС Иляс аварагги гьоркьов ккун абураб рагӀуда рекъон, Ахавил агьлу-хъизамалъул нахъе хутӀаралщинал чагӀи чӀвана Егьуца.

БагӀалил кашишзаби гъурун тӀагӀинари

18Хадуб Егьуца тӀолабго халкъ данде ахӀана ва гьезда лъазабуна: «Ахавица гӀураб тӀагӀат-гӀибадат гьабичӀо БагӀалие – Егьуца гьеб цӀикӀкӀун гьабизе буго. 19Гьединлъидал, киналго БагӀалил аварагзаби, гьесул хъулухъчагӀи ва кашишзаби ахӀе дихъе. Вореха, цо хутӀичӀого киналго рачӀине ккола, щайгурелъул дие бокьун буго БагӀалие кӀудияб къурбан гьабизе. ВачӀинчӀев чиясе гӀумру гьечӀо».

Амма Егьул гьеб сихӀру букӀана; БагӀалие бетӀер чӀвалевщинав чи чӀвазе къасд букӀана гьесул. 20Гьес абуна: «БагӀал кӀодо гьавураб байрамалде халкъ бакӀареян ахӀи бай».

Гьелъул гӀакӀа ахӀана. 21Егьуца ГӀизраилалда киса-кибего хабар битӀана ва, цо хутӀичӀого, киналго БагӀалие бетӀер чӀвалевщинав чи гьениве вачӀана. Гьел киналго БагӀалил мукъадасаб рокъоре жанире ракӀарана ва гьеб рукъ гъункун цӀуна. 22РетӀел-куналъул тадбиралъе тарав чиясда абуна Егьуца: «Киналго БагӀалие тӀагӀат-гӀибадат гьабулел чагӀазе ретӀине, гьезул динияб ретӀел босе». Гьес гьезул ретӀел босун бачӀана гьезухъе тӀад ретӀине.

23Цинги Егьуги Рехавил вас Егьонадавги БагӀалил мукъадасаб рокъоре жанире рилълъана. Егьуца БагӀалил хъулухъчагӀазда абуна: «Хал-шал гьабе, гьанир БагӀалил тун БЕТӀЕРГЬАНАСУЛ хъулухъчагӀиги ратизе гурин».

24Хадур гьел къурбанал ва тӀуран рухӀулел къурбанал гьаризе рилълъана. Егьуца кӀалтӀаялъул къватӀисахун рахъалда ункъого чи тана ва гьезда лъазабун букӀана: «Дица нужехъе кверде кьурал чагӀазул цонигияв лъихъаниги хвасарлъун ворчӀани, гьев живго хвезе вуго дов хвасарлъарав чиясул бакӀалда», – ян.

25ТӀуран рухӀулел къурбанал тӀоритӀун лъугӀаралго, Егьуца жиндирго рорчӀухъабазда ва аскаразул бутӀрузда лъазабуна: «Рилълъа гьанже, чӀвай гьел киналго, цогӀаги чи лъутун ворчӀизе виччаге», – ян.

Гьез гьел хучдуз чӀвана. РорчӀухъабаз ва аскаразул бутӀруз гьезул жаназаби къватӀире рехана ва жалго БагӀалил рукъалъул бищунго мукъадасаб бакӀалде рилълъана. 26БагӀалие лъурал ганчӀил хӀубал гьениса къватӀиреги росун цӀадулъе рехана гьез. 27БагӀалил мукъадасаб гамачӀги бекана гьез ва БагӀалил рукъги щущахъ базабун, гьеб бакӀ хӀажатханалде сверизабуна – жакъа къоялъги гьедин буго гьеб.

28Гьеб хӀалалда БагӀалил диналъул ахир гьабуна Егьуца ГӀизраилалда. 29Амма ГӀизраилги къосинабун Наватил вас Яровамица гьарурал мунагьал течӀо гьесги, – меседил гьарурал Бет-Элалъул ва Даналъул бусбузе гӀибадат гьабуна.

30БЕТӀЕРГЬАНАС Егьуда абуна: «Дуца Дие бокьарабщинаб гьабуралъухъ ва Ахавил хъизан-агьлуялъе кинабго Дир амруялда рекъон тӀубазабуралъухъ, ункъабилеб кьералде гӀунтӀун дур наслуялъул чагӀи рукӀине руго ГӀизраилалъул тахида», – ян.

31Амма РакӀ-ракӀалъго мукӀурлъичӀо Егьу ГӀизраилалъул БЕТӀЕРГЬАН Аллагьасул Къануналъе – ГӀизраилги къосинабун, Яровамица гьарурал мунагьазде мугъ рехичӀо.

Егьул пачалъиялъул ахир

32Гьеб заманалда БЕТӀЕРГЬАНАС ГӀизраилалъул ракь тӀаса къотӀизе байбихьана. Сириялъул пача Хазаилица жиб-жиб гӀорхъи къотӀун тӀаде кӀанцӀун гӀизраилазул ракьал кверде росана: 33Иорданалъул бакъбаккул рахъ, ГилгӀадалъул кинабго ракь (Гадил, Рувимил ва Манассил ракьал), Арнон лъарахъ бугеб АрогӀер шагьаралдаса бахъараб ГилгӀад тун добехун Башаналде щвезегӀан ракьал.

34Егьул пачалъиялъул хутӀарал лъугьа-бахъинал, гьес гьарурал ишал ва гьесул гьунарал – гьеб кинабго хъван буго «ГӀизраилалъул пачабазул тарих» абураб тӀехьалда.

35Егьу хвана ва жиндирго умумузда аскӀов Самариялда хабалъ лъуна. Гьесул бакӀалда гьесул вас Егьоахаз пачалъун вахъана. 36Егьуца къоло микьго соналъ ГӀизраилалда тӀад пачалъи гьабуна.

Currently Selected:

4 Пачаби 10: АварАК

Highlight

Copy