4 Пачаби 24
24
1Егьоякимил пачалъиялъул къояз Вавилоналъул пача Навуходоносор Ягьудиялде тӀаде кӀанцӀана ва лъабго соналъ гьесул кверщаликье ккана Егьояким. Хадув гьев Навуходоносорида данде чӀана. 2БЕТӀЕРГЬАНАС Касдималдаса#24:2 Касдим – Вавилоналъул батӀияб цӀар., Сириялдаса, МогӀавалдаса ва Аммоналдаса хъачагъал риччана ягьудиязда тӀаде, БЕТӀЕРГЬАНАСУЛ аварагзабаз цебеккун бицараб Гьесул рагӀуда рекъон гьел щущахъ разаризе. 3Ягьудиялъе гьеб кинабго БЕТӀЕРГЬАНАСУЛ амруялдалъун ккана, Гьесда цереса гьел нахъе гъезелъун – Манассил мунагьал ва кинабго гьес гьабурабщинаб, 4тӀокӀалъго гьес гӀайибго гьечӀого гӀодобе тӀураб би сабаблъун. ГӀайиб гьечӀого гӀодобе тӀураб бидулъ Иерусалимго ччун бахъидал гьес, – БЕТӀЕРГЬАН гьелда тӀаса лъугьинчӀо.
5Егьоякимил пачалъиялъул хутӀарал лъугьа-бахъинал ва киналго гьес гьарурал ишал – гьеб хъван буго «Ягьудиязул пачабазул тарих» абураб тӀехьалда. 6Егьояким хвана ва гьесул бакӀалда гьесул вас Егьояхин пачалъун вахъана.
7Мисриялъул пача тӀокӀав чабхъаде вахъинчӀо, щайгурелъул Мисриялъул лъадал мухъалдаса байбихьун Ефрат гӀурухъе щвезегӀан гьесул киналго ракьал Вавилоналъул пачаяс кверде росидал.
Егьояхин – Ягьудиялъул пача
8АнцӀила микьго сон барав чи вахъана Егьояхин пачалъун ва лъабго моцӀалъ пачалъи гьабуна гьес Иерусалималда. Гьесул эбелалда цӀар Нехушта букӀана ва гьей Иерусалималдаса Элнатанил яс йикӀана. 9Егьояхиница киналъулъго жиндирго инсуда релълъун БЕТӀЕРГЬАНАСДА квешбихьараб гьабуна.
10Гьеб заманалда Вавилоналъул пача Навуходоносорил аскарал Иерусалималде тӀаде кӀанцӀана ва гьеб сверун ккуна. 11Гьез гьеб сверун ккун букӀаго, живго Навуходоносорги вачӀана гьениве. 12Цинги Ягьудиялъул пача Егьояхин, цадахъ эбелгун, божарал чагӀигун, аскаразул бутӀрулгун ва хъулухъчагӀигун гьесухъе кверде ана.
Гьеб ккана Вавилоналъул пачалъун Навуходоносор вахъун микьабилеб соналъ. 13БЕТӀЕРГЬАНАС цебеккунго бицараб рагӀуда рекъон, БЕТӀЕРГЬАНАСУЛ Рокъоса ва пачаясул кӀалгӀаялъуса кинабго хазина Навуходоносорица босун ана, ва ГӀизраилалъул пача Сулейманица БЕТӀЕРГЬАНАСУЛ Рукъалъе гьарурал киналго меседил тӀагӀелазул гьес кескал гьаруна. 14Иерусалималъул жамагӀатги гьес асирлъуде бачана: киналго чӀухӀби, аскаразул бутӀрул ва рагъухъаби, цӀулал устарзаби, къебедзаби – кинавниги анцӀазарго чи. Мискинал чагӀи гурони хутӀичӀо гьенир. 15Навуходоносорица Егьояхин асирлъун Вавилоналде вачана; гьесда цадахъ пачаясул эбелги, лъудбиги, ахтабиги ва Ягьудиялъул чӀухӀби-хӀакимзабиги рачана Иерусалималдаса Вавилоналде. 16Гучал рагъухъаби – кинавниги анкьазарго чи, азарго устар ва къебед, ва рагъде махщел бугелщинал чагӀи, Вавилоналде асирлъуде рачун ана Вавилоналъул пачаяс. 17Егьояхинил инсул вац Матаниягь тана Вавилоналъул пачаяс гьесул бакӀалда ва гьесда цӀарги хисун Цидкиягь лъуна.
Цидкиягь – Ягьудиялъул пача
18Къоло цо сон барав чи вахъана Цидкиягь пачалъун ва анцӀила цо соналъ пачалъи гьабуна гьес Иерусалималда. Гьесул эбелалда цӀар Хамутал букӀана, гьей Ливнаялдаса Йирмиягьил яс йикӀана. 19Цидкиягьица киналъулъго Егьоякимида релълъун БЕТӀЕРГЬАНАСДА квешбихьараб гьабуна. 20Иерусалималде ва Ягьудиялде БЕТӀЕРГЬАНАСУЛ бахъараб ццидаца Гьес гьел Жиндаго цереса нахъе къотӀана ва гьезде квер хьвагӀана.
Иерусалим кверде боси
Цидкиягь Вавилоналъул пачаясда данде чӀана.
Currently Selected:
4 Пачаби 24: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
