4 Пачаби 25
25
1Цидкиягь пачалъун вахъун ичӀабилеб соналъ, анцӀабилеб моцӀрол анцӀабилеб къоялъ#25:1 Цебесеб эраялъул 588 сон, 15 январь. Вавилоналъул пача Навуходоносор тӀолабго жиндирго аскаргун Иерусалималда данде рагъде вахъана. Гьес Иерусалималда сверун къайи чӀвана ва шагьаралда свера-тирун буцралги ран, гьеб сверун ккуна. 2Цидкиягь пачалъун вахъун анцӀила цоабилеб сон щвезегӀан сверун ккун букӀана Иерусалим.
3Ункъабилеб моцӀрол#25:3 Цебесеб эраялъул 586 сон, 18 июль. Ункъабилеб моцӀ (гӀизраилазул некӀсияб календаралда рекъон) букӀин лъала Йирмиягьил тӀехьалда бугеб хъвай-хъвагӀаялъул кьучӀалда. ичӀабилеб къоялъ ракъи кутаклъана шагьаралда ва гӀадамазе щибго кваназе жо хутӀичӀо. 4Гьебмехалда шагьаралъул къедги биххун, гьеб кверде босизе кӀвана тушбабазда. Цинги, шагьар тушбабаз сверун ккун букӀаниги, къаси сардилъ тӀолабго аскар, пачаясул ахалда аскӀоб кӀиго къадада гьоркьоб бугеб кавудухъа къватӀире рорчӀана ва иорданалъул расалъиялдехун ралагьун лъутана. 5Амма вавилониязул аскар пачаясда хадуб бортана ва Ерихоналъул расалъиялда гьесда нахъ гӀунтӀана. Цинги пачаясул рагъухъаби гьевги вугелъув тун, рахъ-рахъалде тӀурана. 6Цидкиягь кверде восун, Ривла абулеб шагьаралде Вавилоналъул пачаясухъе вачана, ва гьениб гьесие хӀукму къотӀана. 7Цидкиягьил васал гьесул берда цере чӀвана, цинги гьесул бералги рахъун, мазгарул рахсалги ран гьев Вавилоналде вачана.
8Вавилоналъул пачалъун Навуходоносор вахъун анцӀила ичӀабилеб соналъ, щуабилеб моцӀалъул анкьабилеб къоялъ, пачаясул рорчӀухъабазул бетӀер, Вавилоналъул пачаясул цевесев хъулухъчи Невузарадан вачӀана Иерусалималде. 9Гьес БЕТӀЕРГЬАНАСУЛ рукъалда, пачаясул кӀалгӀаялда ва киналго ярагьунелщинал минабазда цӀа гъуна. 10Иерусалим сверун къарал къадалги тӀуран щущахъ разаруна гьесул рагъухъабаз. 11РорчӀухъабазул бетӀер Невузараданица шагьаралда хутӀарабщинаб халкъ, Вавилоналъул пачаясул рахъалде лъутаралги рикӀкӀун, гӀемерал чагӀи асирлъуде рачун ана. 12Амма, цӀолбол ахазукь ва хурзабахъ хӀалтӀизаризе цо-цо мискинал чагӀи нахъа тана гьес.
13БЕТӀЕРГЬАНАСУЛ Рокъор рукӀарал мазгарул хӀубал, гьакал ва мазгарул хӀавуз рекана вавилонияз ва мазгар Вавилоналде босана. 14Гьединго гьез росана хъуби, гулдул, нахучирахъазул билтабазе хӀалтӀизарулел квекьмаххал, суркӀа-щурун ва как-диналъе хӀалтӀизарулел киналго пахь-мазгаралъул тӀагӀелал. 15Жеги рорчӀухъабазул бетӀерас росана гӀарац-меседалъул гьарурал киналго тӀагӀелал: кьеккен жаниб бухӀулел рагӀал ва суркӀа-щурун. 16Сулейманица БЕТӀЕРГЬАНАСУЛ Рукъалъе гьабураб кӀиго хӀободаса, хӀавузалдаса ва гьаказдаса бахъараб мазгар, гӀемерлъиялъ цӀазе хӀал кӀвечӀо. 17Жиб-жиб хӀуби анцӀила микьго натӀалъ борхатаб букӀана. Мазгарул хӀобокькквел лъабго натӀалъ борхатаб букӀана – мазгарул гьинкатаналъ ва мазгарул соноялъ къачӀан букӀана гьеб сверуда-сверун. Гьединабго букӀана кӀиабилеб хӀубиги.
18Пачаясул рорчӀухъабазул бетӀерас кӀудияв кашиш Сераягьги гьесда хадусев кашиш Цепаниягьги Мукъадасаб Рукъалъул лъабго кӀудияв хъулухъчиги асир гьаруна. 19Шагьаралдасаги рагъухъабазе нухмалъиялъе тарав цо ахтаги, пачаясул щуго гӀакълучиги, халкъалъул хъвай-хъвагӀай гьабулев аскаразул бетӀерав хъвадарухъанги, жеги лъабкъого хӀакимчиги асир гьаруна гьес. 20Гьел киналго Невузараданица Вавилоналде Ривлаялде щвезаруна. 21Хаматалъул ракьалда бугеб Ривла абураб шагьаралда, Вавилоналъул пачаяс хӀукмуги къотӀун, чӀвана гьел.
Гьедин ягьудиял, жиндирго ракьги тезабун, чияр ракьалде къотӀана.
Гедалиягь чӀвай
22АхӀикамил вас, Шафанил васасул вас Гедалиягь тана Вавилоналъул пача Навуходоносорица Ягьудиялда хутӀараб халкъалда тӀад бетӀерлъун. 23Вавилоналъул пачаяс Гедалиягь тун вугин бетӀерлъунин рагӀидал аскаразул бутӀрулги цогидал гӀадамалги рачӀана Гедалиягьихъе Мицпаялде. Гьел рукӀана: Нетанягьил вас ИсмагӀел, Кареахил вас Ёханан, Нетофалдаса Танхуметил вас Сераягь, МагӀахаялдаса Яазаниягь ва гьезул чагӀи. 24Гьезул ракӀал гӀодоре риччазаризе гьезие ва гьезул чагӀазе гьа гьедана Гедалиягьица.
«Вавилониязул хӀакимзабазухъа хӀинкъуге нуж, – ин абуна гьес. – Вавилоналъул пачаясе хъулухъ гьабун парахатго гӀумру гьабе гьаб ракьалда ва нужее лъикӀ букӀине буго».
25Амма анкьабилеб моцӀалъ Нетанягьил вас, Элишамил васасул вас, пачаясул гӀагарлъиялъул чи ИсмагӀелица анцӀго чигун цадахъ вачӀун Гедалиягьги, ягьудиялги, гьесда цадахъ Мицпаялда рукӀарал вавилониялги чӀвана. 26Гьеб лъугьа-бахъиналдаса хадуб кинабго халкъ, гӀисинал-чӀахӀиял батӀалъи гьечӀого, аскаразул бутӀрулгун цадахъ, вавилониязухъа хӀинкъун Мисриялде лъутана.
Егьояхин туснахъалдаса эркен гьави
27Ягьудиялъул пача Егьояхин асир гьавун лъебералда анкьабилеб соналъ Эвил-Меродах вахъана Вавилоналъул пачалъун ва анцӀила кӀиабилеб моцӀрол къоло анкьабилеб къоялъ#25:27 Цебесеб эраялъул 561 сон, 2 апрель. гьес Егьояхин туснахъалдаса къватӀиве виччана. 28Цогидал асир гьарурал пачабазда гьоркьов гьес гьев бищун тӀадегӀан гьавуна. 29Туснахълъиялъул ретӀелги хисана ва гьелдаса хадув пачаясда цадахъ квана-гьекъолезда гьоркьове ккана. 30Щибаб къоялъ гьесие къваригӀараб-тараб чӀезабуна пачаяс.
Currently Selected:
4 Пачаби 25: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
