4 Пачаби 23

Ёшиягьица БетӀергьанасулгун къотӀи цӀи гьаби

1Гьебмехалда пачаяс киналго Ягьудиялъул ва Иерусалималъул кӀудиял чагӀи жиндихъего ахӀана. 2Цадахъ Ягьудиялъул халкъгун, Иерусалималъул жамагӀатгун, кашишзабигун ва аварагзабигун, гӀисинал-чӀахӀиял киналго гӀадамалгун БЕТӀЕРГЬАНАСУЛ Рокъове вилълъана пача. БЕТӀЕРГЬАНАСУЛ Рокъоб батараб КъотӀиялъул тӀехьалда хъварабщинаб гьес гьезда рагӀун цӀалана. 3Цинги хӀобода аскӀов пачаясул бакӀалда вахъун чӀана пача ва ракӀ-ракӀалъго хӀаракат бахъун КъотӀиялъул тӀехьалда хъварал рагӀаби тӀуразаризе, БЕТӀЕРГЬАНАСУЛ нухда хьвадизе ва Бичасул амруялги, ахӀкамалги тӀуразаризе ругилан БЕТӀЕРГЬАНГУН къотӀи гьабуна гьес. ТӀолабго халкъги разилъана гьеб къотӀи цӀунизе.

4БЕТӀЕРГЬАНАСУЛ Рокъоса БагӀалие, Ашерае ва зобалазул цӀвабзазе гьарурал жал нахъе рехеян, КӀудияв кашиш Хилкиягьие, гьесул цогидал кашишзабазе ва кӀалтӀа хъаравуллъи гьабулел кашишзабазе буюрухъ кьуна пачаяс. Гьес гьел Иерусалим тун къватӀирехун, Кедрон расалъиялда рухӀана ва гьезул рахъу Бет-Элалде щвезабуна. 5Ягьудиялъул шагьаразда ва Иерусалималда сверухъ гохӀ-щобазда гьересиаллагьзабазе гӀибадаталъе рарал бакӀазда БагӀалие, бакъуе, моцӀрое, зобалазул жалазе ва цӀвабзазе кьеккен бухӀизе Ягьудиялъул пачабаз тарал кашишзабиги нахъе ахӀана гьес. 6БЕТӀЕРГЬАНАСУЛ Рокъоса нахъе босун Ашерал хӀуби Кедрон расалъиялда бухӀана. Гьелъул хӀур лъугьинабун жамагӀаталъул хабалалъ щущана гьеб. 7Гьединго, гьересиаллагьзабазе гӀибадат гьабулел бихьинал хъахӀбабаз#23:7 Бал. 3 Пач. 14:24. ва БЕТӀЕРГЬАНАСУЛ Рокъор рарал, Ашерал рукъарухъабаз чӀел гьабулел рукъзалги риххана гьес.

8Геваялдаса Беэр-Шеваялде гӀунтӀун, Ягьудиялъул шагьараздаса кашишзабиги нахъе ахӀана Ёшиягьица ва гьез кьеккен бухӀулел рукӀарал гохӀ-шобазул гӀибадаталъе бакӀалги хъублъизаруна. Гьединго шагьаралъул бетӀер Егьошуал кавуда цебе, шагьаралъул кавабазул квегӀаб рахъалда бараб борхалъиги биххана гьес. 9Гьел гохӀ-щобазул кашишзабаз, БЕТӀЕРГЬАНАСУЛАБ гӀибадаталъе бакӀалда тӀагӀат-гӀибадат гьабизе гьезул ихтияр букӀинчӀониги, Иерусалималъул кашишзабазго гӀадин реччичӀел чадал кваназе бегьулаан.

10Гьес Бен-Гьинном абураб расалъиялда бугеб Топет абураб къурбаналъе бакӀги хъублъизабуна, лъицаниги – я жиндирго яс, я вас Молохие#23:10 Бал. 3 Пач. 11:5. къурбаналъе рухӀичӀого рукӀине. 11Бакъуе гӀибадаталъе хӀалтӀизаризе рищун ратӀа гьарун тарал чуялги БЕТӀЕРГЬАНАСУЛ Рукъалъул кӀалтӀаса нахъе рачизаруна гьес. ХӀаким Натан-Мелехил рукъалда аскӀоб бугеб азбаралда эхетун рукӀунаан гьел.

Хадуб Ёшиягьица бакъуе гӀибадаталъе хӀалтӀизаризе ратӀа гьарурал чолгьакал рухӀана. 12Ягьудиязул пачабаз Ахазил тӀадрукъалъул тӀохда рарал ва Манассица БЕТӀЕРГЬАНАСУЛ Рукъалъул кӀиябго азбаралда рарал къурбаналъе бакӀалги гъурана. Гьес гьел гьениса нахъеги рахъун рек-рекана ва Кедрон расалъиялда бугеб гӀалагъважа балеб бакӀалде рехана.

13Иерусалималъул бакъбаккул рахъалда бугеб ГӀажалалъул мегӀералъул#23:13 Зайтуналъул магӀарда хъубал ишалги гьарун гьеб чорок гьабун букӀиндал, гьелда, иришгъат гьабун, ГӀажалалъул мегӀерилан абулеб буго гьаб бакӀалда. къилбаялъул рахъалдехун гохӀ-щобазда ГӀизраилалъул пача Сулейманица сидониязул балканай аллагь Ашторатие, МогӀавалъул балканав аллагь Кемошие#23:13 Бал. 3 Пач. 11:7. ва аммониязул хъубав аллагь Молохие гӀибадаталъе рарал бакӀалги щущахъ разаруна пачаяс. 14Ёшиягьица гьезул «хириял» ганчӀал гъурана, Ашерал хӀубалги нахъе рахъана ва гьел рукӀарал бакӀазде гӀадамасул рукьби рана.

15Наватил вас Яровамица ГӀизраилги къосинабун Бет-Элалъул борхалъиялда бараб къурбаналъе ва гӀибадаталъе бакӀгицин биххана гьес. Гьелъул бухӀун рахъу лъугьинабуна ва Ашерал хӀубиги бухӀана. 16Хадуб свера-тирун хал-шал гьабидал, гохӀалъул санда хабал рихьана Ёшиягьида ва гьениса рукьбиги рахъун, гьел къурбаналъе бакӀалда тӀад рухӀеян буюрухъ кьуна гьес – аварагас бицун букӀараб БЕТӀЕРГЬАНАСУЛ рагӀуда рекъон, гьеб хъублъизабизе.

17Цинги пачаяс цӀехана: «Гьаб зани лъил кколеб?»

Шагьаралъул жамагӀаталъ бицана: «Гьеб буго Аллагьасул аварагасул хоб. Гьес Ягьудиялдаса вачӀун цебеккунго бицун букӀана гьеб дуца Бет-Элалъул къурбаналъе бакӀалъе гьабулеб бугеб жо».

18«Гьесул хоб жибго те, – ян абуна гьес. – Гьесул рукьбиги парахат те».

Гьел гьесул рукьбуздаги ГӀизраилалдаса вачӀун вукӀарав цогидав аварагасул рукьбуздаги хъвачӀо.

19Жеги ГӀизраилалъул пачабаз, БетӀергьанасул ццинги бахъинабун, Самариялъул шагьаразда гохӀ-щобазда рарал киналго гӀибадаталъе бакӀалги щущахъ разаруна Ёшиягьица. Бет-Элалда гьабураб гьабуна гьес гьезиеги. 20Ёшиягьица гохӀ-щобазул киналго кашишал чӀвана ва гьезул къурбаналъул бакӀазда тӀад гӀадамасул рукьби рухӀана. Цинги гьев Иерусалималде тӀадвуссана.

ЦӀидасан Пасхаялъул байрам тӀобитӀи

21Пачаяс халкъалъе буюрухъ кьуна: «Нужерго БЕТӀЕРГЬАН Аллагь кӀодо гьавун, КъотӀиялъул тӀехьалда хъваралда рекъон, Пасхаялъул байрам тӀобитӀе».

22Къадизабазул нухмалъиялда гъоркь ГӀизраил букӀараб заманалдаса нахъе, я ГӀизраилалъул пачабазул заманалда, я Ягьудиялъул пачабазул заманалда гьелде бахъараб хӀалалда Пасхаялъул байрам тӀобитӀун букӀинчӀо. 23Ёшиягь пачалъун вахъун анцӀила микьабилеб соналъ БЕТӀЕРГЬАНАСЕ гьеб Пасхаялъул байрам тӀобитӀана Иерусалималда.

Ёшиягьил пачалъиялъул цоги ишал

24Гьединго Ёшиягьица тӀагӀинаруна: хваразул рухӀазда кӀалъалел ва пал тӀамулел чагӀи, терафимал, киналго гьересиаллагьзаби ва цоги Ягьудиялда ва Иерусалималда ратарал киналго хъубалщинал жал. Гьес гьеб кинабго гьабуна Хилкиягьида БЕТӀЕРГЬАНАСУЛ Рокъоб батараб тӀехьалда хъвараб Къануналъул амруял тӀуразариялъе гӀоло. 25Я цеве, я нахъа Ёшиягь гӀадин Мусал Къануналда рекъон, ракӀ-ракӀалъго хӀаракат бахъун, тӀолабго къуват-жаналдалъун ва гӀакълу-хӀисабалдалъун БЕТӀЕРГЬАНАСДЕ вуссарав пача тӀокӀав вахъинчӀо.

26БукӀаниги, Манассица гьабурабщинаб сабаблъун, БЕТӀЕРГЬАНАСУЛ Ягьудиялде букӀараб гьелегьараб гьалагаб ццин гӀодобе къачӀо. 27БЕТӀЕРГЬАНАС абуна:

«Дица ГӀизраилго гӀадин цебеса тӀагӀинабила Ягьудия. Дица квер хьвагӀила Дицаго тӀаса бищараб Иерусалималде ва Дирго цӀар чӀвараб Мухъадасаб рукъалде».

Ёшиягьил хвел

28Ёшиягьил пачалъиялъул хутӀарал лъугьа-бахъинал ва гьес гьабурабщинаб – гьеб кинабго хъван буго «Ягьудиялъул пачабазул тарих» абураб тӀехьалда.

29Ёшиягьил пачалъиялъул къояз, Мисриялъул пиргӀавн Нехо, цадахъ жиндирго аскаргун, къватӀиве вахъана, Ефрат гӀурухъ Ассириялъул пачаясда данде вагъизе. Ёшиягь пача вахъана гьесда данде вагъизе, амма Мегиддоялде щваравго, гьев Нехоца чӀвана. 30Ёшиягьил чагӀаз гьесул жаназа чолгьакидаги лъун, Мегиддоялдаса Иерусалималде босана, ва гьенив жиндирго хабалъ лъуна гьев. Халкъалъ гьесул вас Егьоахаз ахӀана, гьесда зайтуналъул нахги бахун, гьев жиндирго инсул бакӀалда пачалъун тана.

Егьоахаз – Ягьудиялъул пача

31Къоло лъабго сон барав чи вахъана Егьоахаз пачалъун ва лъабго моцӀалъ пачалъи гьабуна гьес Иерусалималда. Гьесул эбелалда цӀар Хамутал букӀана, гьейги – Йирмеягьил яс; Ливнаялдаса гӀадан йикӀана гьей. 32Квешал умумуздаса мисалги босун, гьес БЕТӀЕРГЬАНАСДА квешбихьулебщинаб гьабуна.

33ПиргӀавн Нехоца хӀатӀазда маххалги ран Хаматалда бугеб Ривла абураб шагьаралда туснахъ гьавуна Егьоахаз – Иерусалималда гьес тӀокӀаб пачалъи гьабичӀого букӀине; Ягьудияги ясахъ кьезе тӀамуна – нусго талант гӀарцул#23:33 100 талант – гӀага-шагарго 3600 кило. ва цо талант меседил#23:33 Талант – гӀага-шагарго 36 кило.. 34ПиргӀавн Нехоца Ёшиягьил вас Элияким тана пачалъун жиндирго инсул бакӀалда ва гьесда цӀар хисун Егьояким лъуна. Егьоахазин абуни Мисриялде вачун ана ва гьев гьенив хвана.

Егьояким – Ягьудиялъул пача

35Егьоякимица пиргӀавн Нехое гьес тӀад лъураб гӀарац-месед кьуна. Гьелъул гӀураб къадар бакӀаризе гӀоло жив-живасул боцӀи-рикъзиялъул багьа гьабун халкъалдаго тӀад магъало лъуна ва, пиргӀавн Нехое кьезе, халкъалъухъа гӀарац-месед тӀалаб гьабуна. 36Къого сон барав чи вахъана Егьояким пачалъун ва анцӀила цо соналъ пачалъи гьабуна гьес Иерусалималда. Гьесул эбелалда цӀар Зевудда букӀана, гьейги Румалдаса Педаягьил яс йикӀана. 37Квешал умумуздаса мисалги босун, гьес БЕТӀЕРГЬАНАСДА квешбихьанщинаб гьабуна.

Currently Selected:

4 Пачаби 23: АварАК

Highlight

Copy