4 Пачаби 20
20
Хизкиягь хвалил унтудаса ворчӀи
1Гьеб заманалда Хизкиягьида хвалил унти чӀвана. Амоцил вас Ишаягь авараг вачӀана гьесухъе гьадинаб калимагун: «Гьале БЕТӀЕРГЬАНАСУЛ рагӀи: „Амру-васигат гьабе дурго, щайин абуни, мун хвезе вугелъул; сахлъизе гьечӀо мун“».
2Гьебмехалъ къададехунги вуссун БЕТӀЕРГЬАНАСДЕ гьардана Хизкиягь: 3«Вай БЕТӀЕРГЬАН, Дуда лъалагури дун Дуе ритӀухъго, мутӀигӀго хьвадаравлъи ва ракӀ-ракӀалъго Дуда берцин бихьанщинаб дица гьабураблъи!»
Цинги гӀек-гӀекиялда гӀодана Хизкиягь.
4Ишаягь аварагас жеги кӀалгӀаялъул азбар тун букӀинчӀо, гьесухъе БЕТӀЕРГЬАНАСУЛ калима рещтӀана: 5«ТӀадги вуссун, Дир халкъалъул бетӀер Хизкиягьида абе: „Гьадин лъазабулеб буго дур умумузул чи Давудил БЕТӀЕРГЬАН Аллагьас: ‘Дида бихьана дур магӀу, ва дур гьари Дица къабул гьабуна – Дица сах гьавила мун. Лъабго къоялдаса мун вахъун БЕТӀЕРГЬАНАСУЛ Рокъове ине вуго. 6Дица дур гӀумруялда тӀаде анцӀила щуго сон жубалеб буго. Мунги гьаб шагьарги Ассириялъул пачаясул квердаса хвасар гьарила Дица. Диего гӀоло ва Дир лагъ Давудие гӀоло Дица цӀунила гьаб шагьар’“».
7Ишаягь аварагас абуна: «Пачаясе инжиралъул къараб чед босе гьанибе», – ян.
Пачаясул чагӀаз гьеб босун бачӀана ва гьесул тӀихьалда лъуна, пача сахлъизе вукӀине. 8Хизкиягьица Ишаягь аварагасда цӀехана: «Кинаб гӀаламаталдалъун дун божилев лъабго къоялдаса БЕТӀЕРГЬАНАС сахги гьавун, дун тӀаде вахъун, БЕТӀЕРГЬАНАСУЛ Рокъове ине вукӀиналда?»
9Ишаягь аварагас абуна: «БЕТӀЕРГЬАНАС Жиндирго рагӀи тӀубазе букӀиналъул гӀаламат гьале дуе: бице, анцӀго болъо тун нахъищ рагӀад буссинабилеб, ялъуни анцӀго болъо тун цебейищ инабилеб?»
10«Цебехун ине бигьаяб букӀина рагӀадалъе, – ян абуна Хизкиягьица. – Биччанте анцӀго болъоялъ нахъбуссине».
11Цинги Ишаягь аварагас БЕТӀЕРГЬАНАСДЕ дугӀа гьабуна ва Гьес рагӀад, Ахазица рарал балъаздаса гӀодобе, анцӀго болъоялъ нахъбуссинабуна.
Хизкиягьил гӀакъликъаб иш
12Гьеб заманалда Баладанил вас Вавилоналъул пача Меродах-Баладаница Хизкиягьихъе, гьев унтун вугин рагӀун, кагъатги сайгъат-саламги битӀана. 13Хизкиягьица гьесул вакилзабазе лъикӀаб гьоболлъи гьабуна ва гьезда жиндирго бугебщинаб бечелъи бихьизабуна: гӀарац-месед, махӀ гьуинал хурдул, хириял рахулел нахал, кинабго ярагъ ва цогидабги тӀолабго хазина. Я кӀалгӀаялда, я тӀолабго гьесул пачалъиялда, гьес гьезда бихьизабичӀеб жо щибго хутӀичӀо.
14Ишаягь авараг вачӀана цинги пачаясухъе ва гьес цӀехана: «Дол чагӀи кинаб хабаргун ва киса рачӀун рукӀарал чагӀи духъе?» «РикӀкӀадаса рачӀун рукӀана, – ян абуна Хизкиягьица. – Дол Вавилоналдаса чагӀи рукӀана».
15Ишаягь аварагас цӀехана: «Дур кӀалгӀаялда жаниб щиб дозда бихьараб?» «Дир кӀалгӀаялда жаниб кинабго бихьана дозда, – ян жаваб гьабуна Хизкиягьица. – Дир хазинаялъул дозда бихьизабичӀеб жо щибго хутӀичӀо».
16Гьебмехалъ Ишаягь аварагас Хизкиягьида абуна:
«ГӀенекке БЕТӀЕРГЬАНАСУЛ рагӀухъ: 17„Дур кӀалгӀаялъул кинабго буголъи ва дур умумуз жакъа къо щвезегӀан данде гьабураб тӀолабго бечелъи Вавилоналде хъамун унеб къо ракӀчӀун тӀаде щвезе буго гьанже. Щибго хутӀизе гьечӀо“, – ян лъазабулеб буго БЕТӀЕРГЬАНАС. 18– Дудаса гьарурал, дур зурияталъул цо-цоял Вавилоналде асирлъуде ккезе руго ва гьел гьенир пачаясул кӀалгӀаялда ахтабилъун#20:18 Ахтаби – бихьинлъиялъул къуваталдаса махӀрум гьарурал бихьинал ва пачабазул кӀалгӀаялда кӀудияб даражаялъул хӀакимзаби. рахъине руго».
19Жиндирго гӀумруялда жаниб рекъелги букӀинехъин бугин ва хӀинкъиги гьечӀин пикруги гьабун, Хизкиягьица жаваб гьабуна: «Гьеб дуца бицараб БЕТӀЕРГЬАНАСУЛ рагӀи лъикӀаб рагӀи буго», – ян.
Хизкиягьил хвел
20Хизкиягьил пачалъиялъул хутӀарал лъугьа-бахъинал ва шагьаралде лъим бачизе гьес бараб къулгӀаги рухъарал рахъалги рикӀкӀун, киналго гьес гьарурал ишазул хӀакъалъулъ хъван буго «Ягьудиялъул пачабазул тарих» абураб тӀехьалда. 21Хизкиягь хвана ва умумузда аскӀов хабалъ лъуна. Гьесул вас Манасс гьесул бакӀалда пачалъун вахъана.
Currently Selected:
4 Пачаби 20: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
