4 Пачаби 21
21
Манасс – Ягьудиялъул пача
1АнцӀила кӀиго сон барав чи вахъана Манасс пачалъун ва кӀикъоялда анцӀила щуго соналъ пачалъи гьабуна гьес Иерусалималда. Гьесул эбелалда цӀар Хефциба букӀана. 2БЕТӀЕРГЬАНАС гӀизраилазда цереса нахъе гъурал халкъазул къосарал гӀадатаздаса мисалги босун, гьес БЕТӀЕРГЬАНАСДА рихарабщинаб гьабуна. 3ГохӀ-щобазда гьересиаллагьзабазе гӀибадаталъе бакӀал цӀидасан рана гьес – гьесул инсуца риххизарун рукӀарал: ГӀизраилалъул пача Ахавидаса мисал босун, БагӀалие къурбаналъе бакӀ бана, Ашерае хӀуби чӀана. Гьес зобалазул цӀвабзазе сужда-гӀибадат гьабуна; 4«Иерусалималда букӀине буго Дир цӀар чӀвараб бакӀ», – инги абун БЕТӀЕРГЬАНАС тӀаса бищараб БЕТӀЕРГЬАНАСУЛ Рокъобцин гьересиаллагьзабазе къурбаналъе бакӀал рана. 5БЕТӀЕРГЬАНАСУЛ Рукъалъул кӀиябго азбаралдаги зобалазул цӀвабзазе къурбаналъе бакӀал рана. 6Гьес жиндирго вас къурбаналъе вухӀана, пал тӀамуна, сихӀру гьабуна, ва хварал чагӀазул рухӀазда кӀалъалел чагӀигун ва сихӀручагӀигун гьоркьоблъи ккуна. БЕТӀЕРГЬАНАСДА цебе гӀемераб квешлъи гьабуна гьес, Гьесул ццинги гьалаглъизабун.
7Манассица Мукъадасаб Рокъоб жаниб Ашерал хӀубигицин эхетана. БЕТӀЕРГЬАНАС Давудидаги гьесул вас Сулейманидаги абун букӀана: «ГӀизраилалъул наслабазул киналго бакӀазда гьоркьоб Дица тӀаса бищараб Иерусалималда, Гьаб Рокъоб букӀине буго Дие гӀибадаталъе бакӀ абадиялъего. 8Дица гьезие аманат гьабурабщинаб гӀизраилаз тӀубазабуни, ва Дир лагъ Мусаца гьезда тӀад лъураб Къануналда рекъон гьел хьвадани, Дица гьел кидаго, гьезул умумузе кьураб гьаб ракьги тун, апараглъуде ине ккезаризе гьечӀо», – ян.
9Амма халкъалъ гьеб гӀадахъ босичӀо. Манассица гьел тӀуран къосинаруна ва БЕТӀЕРГЬАНАС гьезда цереса нахъе гъурал халкъаздаса цӀикӀкӀунгицин мунагьал гьаруна гӀизраилаз. 10Жиндирго лагъзал аварагзабиги гьоркьор ккун, БЕТӀЕРГЬАНАС абуна:
11«Ягьудиялъул пача Манассица кутакалда гӀасиял мунагьал гьаруна. Гьес цебе гьениб букӀараб халкъ аморияздасаги цӀикӀкӀун квешлъаби гьаруна ва гьересиаллагьзабаздалъун Ягьудия къосинабуна. 12Гьединлъидал, гьале ГӀизраилалъул БЕТӀЕРГЬАН Аллагьасул рагӀи: „Дица Иерусалималде ва Ягьудиялде тӀаде бачине буго бицун гьеб рагӀарабщинав чиясул ракӀ сородизабулеб кутакаб балагь. 13Самариялъе ва Ахавил хъизан-агьлуялъе гьабураб жаза гьабила Дица Иерусалималъеги. Дица лъухъала Иерусалим – кванан хадуб чура-хулун тӀаса гъоркье буссун лъураб суркӀа гӀадин гьабила гьеб. 14Дирго халкъалъул наслабазул гьеб хутӀелалде мугъ рехила Дица ва тушбабазухъе кверде кьела. Киналго гьезул тушбабаца толохӀоч гьарун, жалгоги гьезул давлалъун ккезе руго гьел, 15щайгурелъул Мисриялдаса къватӀире гьезул умумул рахъаралдаса нахъего, жакъа къо щвезегӀан гьез Дир ццинги гьалаглъизабун Дида рихарабщинаб гьабуна“».
16БЕТӀЕРГЬАНАСУЛ нухдаса Ягьудия къосинабун гьабураб квешлъи гӀечӀого, Манассица гӀайибго гьечӀого чӀварал чагӀазул гӀемерлъиялъ бидул гӀорал чвахизаруна Иерусалималъул къватӀахъа.
17Манассил пачалъиялъул хутӀарал лъугьа-бахъинал, киналго гьесул ишал, гьес гьарурал мунагьал – гьеб кинабго хъван буго «Ягьудиялъул пачабазул тарих» абураб тӀехьалда. 18Манасс хвана ва жиндирго кӀалгӀаялъул ахикь – Уззал ахикь – умумузда аскӀов хабалъ лъуна. Гьесул вас Амон гьесул бакӀалда пачалъун вахъана.
Амон – Ягьудиялъул пача
19Къоло кӀиго сон барав чи вахъана Амон пачалъун ва гьес Иерусалималда кӀиго соналъ пачалъи гьабуна. Гьесул эбелалда цӀар Мешулемет букӀана ва гьей Ятбаялдаса ХӀарузил яс йикӀана. 20Жиндирго эмен Манассица гӀадин Амоницаги БЕТӀЕРГЬАНАСДА квешбихьанщинаб гьабуна. 21Гьев жиндирго инсул нухккун хьвадана – инсуца гӀадин гьесги гьересиаллагьзабазе тӀагӀат-гӀибадат гьабуна. 22БЕТӀЕРГЬАНАСДЕ, жиндирго умумузул Аллагьасде, мугъ рехана; БЕТӀЕРГЬАНАСУЛ нух Амоница гӀадахъцин босичӀо.
23Амонил божарал чагӀаз гъоркьчӀелги гьабун, гьев жиндирго кӀалгӀаялда чӀвана. 24Амма халкъалъ киналго Амонида данде гъоркьанго ургъаралщинал чагӀи чӀвана ва гьесул бакӀалда гьесул вас Ёшиягь пачалъун тана.
25Амонил пачалъиялъул хутӀарал лъугьа-бахъиназул хӀакъалъулъ хъван буго «Ягьудиялъул пачабазул тарих» абураб тӀехьалда. 26Гьев Уззал ахикь бугеб хабалъ лъуна ва гьесул бакӀалда гьесул вас Ёшиягь вахъана пачалъун.
Currently Selected:
4 Пачаби 21: АварАК
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2005-2023
