3 Пачаби 5

БетӀергьанасул Рукъ базе хӀадурлъи

1Тиралъул пача Хирамида Давудил бакӀалда пачалъун Сулейман тун вугилан рагӀидал, гьес жиндирго вакилзаби ритӀана Сулейманихъе, щайгурелъул Хирам кидаго Давудил лъикӀав гьудул вукӀана. 2Сулейманицаги гьадинаб хабар битӀана Хирамихъе:

3«Дуда лъала дир эмен Давудил рес букӀинчӀо БЕТӀЕРГЬАН Аллагьасе Мукъадасаб Рукъ базе. Ахирги БЕТӀЕРГЬАНАС киналго гьесул тушбаби гьесул хӀатӀикье ккезаризегӀан, сверухълъуда ругел халкъаз дир инсуда данде рагъ къотӀизе течӀелъулха. 4Гьанжеян абуни, БЕТӀЕРГЬАНАС киса-кибего сверухълъуда парахалъи кьун буго дие – я тушман гьечӀо, я щибго хӀинкъи гьечӀо. 5Дие бокьун буго, БЕТӀЕРГЬАНАС дир эмен Давудида, „дур бакӀалда дур тахида Дица лъезе вугев дур васас базе буго Дие Мукъадасаб Рукъ“, – илан абураб рагӀул кьучӀалда, БЕТӀЕРГЬАНАСЕ гьеб Мукъадасаб Рукъ базе. 6Гьединлъидал, дие кедралъул гъутӀби къотӀеян буюрухъ кье дуца. Дир хӀалтӀухъабиги хӀалтӀила дуразда цадахъ. Дуца чӀезабураб бокьараб мухьги кьела дица дуе дур хӀалтӀухъабазухъ. Дуда лъалелъул Сидониял гӀадин гъутӀби къотӀизе махщел бугел чагӀи нижеда гьоркьор гьечӀеллъи».

7Сулейманил гьел рагӀаби рагӀидал, Хирам кутакалда вохана ва гьес абуна: «Рецц БЕТӀЕРГЬАНАСЕ гьаб кӀудияб халкъалъе нухмалъи гьабизе гӀакъилав вас Давудие кьуралъухъ!»

8Хирамица гьадинаб хабар битӀана Сулейманихъе:

«Дуца битӀун бачӀараб харбихъ дун мухӀканго гӀенеккана. Дица кинабго гьеб кедралъул ва кипарисалъул цӀулада бараб жо дуца абухъе гьабила. 9Дир чагӀаз Ливаналдаса чӀалаби ралъдахъе щвезарила ва гьениса дица ралъдадасан дуца бихьизабураб бакӀалде щвезарун, гьенир сокӀкӀинарила, гьениса дуца росизе рукӀине. Дирги мурад тӀубазабун дуцаги дир кӀалгӀаялъе гӀураб квен-тӀех кье».

10Гьединан Хирамица Сулеймание бокьараб къадаралда кедралъул ва кипарисалъул цӀул чӀезабуна, 11Сулейманицаги къоазарго кор#5:11 20 000 кор ролъул – гӀага-шагарго 1560 тонна. ролъул ва къоазарго бат#5:11 20 000 бат нахул – гӀага-шагарго 440 000 литра. зайтуналъул нахул Хирамихъе щвезабуна – лъагӀалидаса лъагӀалиде щвезабулаан Сулейманица гьеб къадар Хирамихъе. 12БЕТӀЕРГЬАНАС, Жиндицаго бицараб рагӀуда рекъон, гӀакъиллъи кьуна Сулеймание. Сулейманицаги Хирамицаги жидедаго гьоркьоб ракълилаб къотӀи-къай гьабуна, ва гьезда гьоркьоб рекъел букӀана.

13Сулейман пачаяс ГӀизраилалдаса кисанго цере хӀалтӀизаризе чагӀи ракӀарана – лъеберазарго чи. 14Гьес иргаялда жиб-жиб моцӀалъ анцӀазарго чи витӀулаан Ливаналде хӀалтӀизе. Цо моцӀалъ Ливаналда, кӀиго моцӀалъ рокъор рукӀунаан гьел. Гьезда тӀад тадбирчилъун Адонирам тана. 15МугӀруздаги рукӀана Сулейманил лъабкъоялда анцӀазарго хӀамалиял ва ункъоазарго гамачӀ бекӀулел устарзаби. 16Гьединго гьесул рукӀана лъабазаралда лъабнусго хӀалтӀухъабазда ва бакӀал раялда тӀад тадбир гьабизе тарал церехъаби. 17Сулейманил буюрухъалда рекъон, бекӀараб ганчӀил кьучӀ лъезе, гьез бахъулаан чӀахӀияб ва багьаяб гамачӀ. 18Сулейманилгун Хирамил устарзабаз ва Гевалалдаса хӀалтӀухъабаз гъутӀби къотӀулаан ва Рукъ базе гамачӀги цӀулги хӀадур гьабулаан.

Currently Selected:

3 Пачаби 5: АварАК

Highlight

Copy